قازاقستاننىڭ ەڭبەك سىڭىرگەن قايراتكەرى, وليمپيادا ويىندارىنىڭ كۇمىس جانە قولا جۇلدەگەرى داۋلەت تۇرلىحانوۆ پارتيا مۇشەلەرىن پرەزيدەنتتىككە كانديدات رەتىندە قاسىم-جومارت توقاەۆتىڭ كانديداتۋراسىن قولداۋعا شاقىردى, دەپ حابارلايدى Egemen.kz.
«ەلىمىزدە ادىلەتتى قوعام قۇرۋ, حالىقتى تىڭدايتىن مەملەكەت قالىپتاستىرۋ جۇمىستارى بەلسەندى جۇرگىزىلۋدە. جىلدار بويى قوردالانىپ قالعان كوپتەگەن ماسەلەلەر شەشىمىن تابا باستادى. ەل مۇددەسى ءۇشىن جۇيەلى رەفورمالار قولعا الىندى. سپورت سالاسىن دامىتۋعا ەرەكشە كوڭىل ءبولىنىپ, جاقسى قولداۋ كورسەتىلۋدە», دەدى ول «اماNات» پارتياسىنىڭ كەزەكتەن تىس XXIV سەزىندە.
بەلگىلى سپورتشى ەلىمىزدىڭ بارلىق ايماقتارىندا امبەباپ سپورت كەشەندەرى سالىنعانىن, اۋلالار مەن قوعامدىق ورىنداردا ترەناجەرلار ورناتىلعانىن تىلگە تيەك ەتتى.
«ۇرپاقتارىمىزدى دەنى ساۋ, مىقتى ەتىپ ءوسىرۋ ءۇشىن وسى مۇمكىندىكتەردى ۇتىمدى پايدالانۋىمىز كەرەك. بارلىعىمىزدىڭ ورتاق وتانىمىز – مەملەكەت. ءبىزدى ورتاق ماقساتتار مەن قۇندىلىقتار بىرىكتىرەدى. بارشاڭىزدى قاسىم-جومارت كەمەل ۇلى توقاەۆتى قيىن ساتتە قالدىرماي, ەلدىگىمىزدى ۇيىستىرعان قاجىرلى ەڭبەگىن باعالاي وتىرىپ, بولاشاققا, حالىق مۇددەسى جولىنداعى تىڭ باستامالار مەن جوسپارلارعا سەنە وتىرىپ, ونى ءبىراۋىزدان قولداۋعا شاقىرامىن», دەپ اتاپ ءوتتى داۋلەت تۇرلىحانوۆ.