شەكارادان قازاقستان اۋماعىنا وتكەن رەسەيلىكتەر تۋرالى اقپارات قازىر حالىقتىڭ دەنىن الاڭداتىپ وتىر. ەلىمىزگە كەلۋشىلەردىڭ كوبى رەسەيدە جاريالانعان موبيليزاتسيادان كەيىن باس ساۋعالاپ كەتكەندەر ەكەنى ءمالىم. ءوز ەلىنىڭ زاڭىن ورىنداۋدان باس تارتقاندار ءبىزدىڭ جەرىمىزدە دە تىنىش جۇرە قويۋى كۇماندى. وسىعان الاڭداعاندار الەۋمەتتىك جەلىلەر ارقىلى ءتۇرلى قاۋەسەت تاراتىپ, ەلدى دۇرلىكتىرۋگە اۋەس بولىپ كەتتى.
ارينە, بۇۇ-نىڭ كونۆەنتسياسىنا سايكەس قۇقىعى مەن بوستاندىعى بۇزىلىپ, ءوز ەلىندە قۋعىنعا ۇشىراعانداردى بوسقىن رەتىندە پانالاتۋعا ءبىز دە مىندەتتىمىز. سونداي-اق باسىنا ءىس ءتۇسىپ, تابيعات نەمەسە تەحنوگەندىك اپاتتاردان زارداپ شەگىپ, ۇدەرە كوشكەندەر بولسا, ولاردى دا باس ساۋعالاتۋعا بولادى. الايدا مەملەكەت باسشىسىنىڭ جارلىعىن ورىنداۋدان باس تارتىپ, كورشى ەلدەرگە جىلىستاعىسى كەلگەندەرگە بوسقىن مارتەبەسى بەرىلمەيدى. سوعان قاراماي ءبىزدىڭ ەل ەكىجاقتى كەلىسىمشارتتارعا سايكەس ولاردى كوشىپ-قونۋشى, قوناق رەتىندە قابىلداۋعا ءماجبۇر. ونداي سىلتاۋلار دا كوپ. مىسالى, وتباسىمەن تابىسۋ, ەڭبەك ەتۋگە, وقۋعا, ەمدەلۋگە كەلۋ. ءتىپتى ميسسيونەرلىك ىستەرمەن دە كەلۋگە قاقىلى.
جۋىردا وبلىس اكىمىنىڭ ورىنباسارى داۋرەن جانداربەك جۋرناليستەر الدىنا شىعىپ, سولتۇستىك قازاقستان اۋماعىنداعى شەكارالىق بەكەتتەرىنەن 21-25 قىركۇيەك ارالىعىندا 30 مىڭنان استام رەسەيلىك ازامات قازاقستانعا وتكەن. ونىڭ 20 مىڭعا جۋىعى 18 بەن 60 جاس ارالىعىنداعى ازاماتتار. رەسەيدەگى ءىشىنارا موبيليزاتسياعا سايكەس اسكەرگە وسى جاستاعى ازاماتتار شاقىرىلعان.
د.جانداربەكتىڭ ايتۋىنا قاراعاندا, ولاردىڭ كوبى ءبىزدىڭ ەلدىڭ اۋماعىن ترانزيتتىك ءدالىز رەتىندە عانا پايدالانۋدا. تەك 64 رەسەي ازاماتى ۋاقىتشا تۇرۋعا ءوتىنىش بەرگەن. كەلگەندىگى تۋرالى جازباشا حابار بەرگەندەردىڭ سانى – 1 481. وتىز مىڭعا جۋىق ادامنىڭ ىشىندە تەك وسىنشاسى عانا ۋاقىتشا تۇرۋعا حاتتالعانى كۇدىك تۋدىرادى.
سونىمەن بىرگە وبلىس اكىمىنىڭ ورىنباسارى قازىر كەلۋشىلەردىڭ كۇرت ازايعانىن ايتتى. «ويتكەنى رەسەي فەدەراتسياسىندا اسكەري مىندەتكەرلىگى بار ازاماتتاردىڭ شەتەلدەرگە كەتۋىنە باقىلاۋ كۇشەيتىلدى», دەدى ول.
ال ۋاقىتشا كەلگەن شەتەلدىكتەرگە ارنالعان سالىق تولەۋشىنىڭ جەكە سايكەستەندىرۋ ءنومىرىن (جسن) الۋعا ءوتىنىش بەرگەندەر سانى – 1 340. ەگەر 19 بەن 23 قىركۇيەك ارالىعىنداعى كەزەڭمەن سالىستىرساق, بۇل سان 2,5 ەسەگە ارتىق. بۇل تۋرالى «ازاماتتارعا ارنالعان ۇكىمەت» مەملەكەتتىك كورپوراتسياسى سولتۇستىك قازاقستان فيليالىنىڭ ديرەكتورى جانىبەك قامباروۆ مالىمدەدى. سونداي-اق ج.قامباروۆ حقو-عا جۇگىنگەن شەتەلدىكتەردىڭ وتە كوپ بولۋىنا بايلانىستى قوسىمشا تاعى ءبىر ورتالىقتىڭ اشىلعانىن جەتكىزدى.
ازىرگە پەتروپاۆل قالاسىندا شەتەلدىكتەردىڭ قاتىسۋىمەن قۇقىق بۇزۋشىلىقتار تىركەلگەن جوق. جەرگىلىكتى پوليتسياعا جاياۋ جانە اۆتوموبيلمەن حالىق كوپ جينالاتىن جەرلەرگە پاترۋلدىك قىزمەتتەردى كۇشەيتۋگە تاپسىرما بەرىلگەن. قازىر قالاداعى 517 ءنومىرى بار 24 قوناقۇي تولىق. ونىڭ ۇستىنە پاتەرلەردى جالعا بەرۋمەن اينالىساتىن 20 بيۋرو دا قىزۋ جۇمىس ىستەۋدە.
كوشى-قون قىزمەتى بارلىق قوناقۇي مەن جالعا ءۇي بەرۋشىلەرگە شەتەلدىكتەر تۋرالى ميگراتسيالىق پورتالعا حابارلاۋىن تالاپ ەتكەن. سونىمەن بىرگە شەتەلدىكتەر وزدەرى تۇرعان اۋداندارداعى ميگراتسيالىق قىزمەتتەرگە كەلگەنى تۋرالى حاباردار ەتۋى قاجەت.
بۇگىنگى تاڭدا سولتۇستىك قازاقستاندا تىركەلگەن 7 مىڭداي شەتەلدىك تۇرىپ جاتىر. سونىڭ بەس مىڭدايى – رەسەيلىكتەر. كوشى-قون باسقارماسىنىڭ قىزمەتكەرلەرى جەرگىلىكتى پوليتسيا ينسپەكتورلارى, پروكۋراتۋرا جانە جەرگىلىكتى اكىمدىك قىزمەتكەرلەرىمەن بىرلەسىپ قازىر قوناقۇيلەردى, حوستەلدەردى, جالعا بەرىلەتىن پاتەرلەردى تەكسەرىپ, زاڭسىز تۇرىپ جاتقانداردى انىقتاۋ جۇمىستارىن جۇرگىزىپ جاتىر.
سولتۇستىك قازاقستان وبلىسى