قاراعاندى – ەلىمىزدەگى ۋربانيزاتسيا دەڭگەيى ەڭ جوعارى وبلىس. بۇل تۋرالى پرەزيدەنت قاسىم-جومارت توقاەۆ ءوڭىر جۇرتشىلىعىمەن كەزدەسۋىندە ايتتى, دەپ حابارلايدى Egemen.kz.
جيىن بارىسىندا ەل پرەزيدەنتى قاراعاندى وڭىرىندەگى ۋربانيزاتسيا ماسەلەسىنە نازار اۋداردى.
«قاراعاندى – ەلىمىزدەگى ۋربانيزاتسيا دەڭگەيى ەڭ جوعارى وبلىس. ءوڭىر حالقىنىڭ 80 پايىزى قالادا تۇرادى. مۇنداعى ءوندىرىستىڭ ەداۋىر بولىگى 5 مونوقالانىڭ ەنشىسىندە. وبلىس تۇرعىندارىنىڭ 40 پايىزى وسىندا قونىستانعان. قالا حالقىنىڭ تىرشىلىگى ونداعى ءىرى كاسىپورىندارعا تاۋەلدى ەكەنى جاسىرىن ەمەس. شاعىن قالالاردان حالىق كوشىپ جاتىر. بۇل – وزەكتى ماسەلە», دەدى مەملەكەت باسشىسى.
قاسىم-جومارت توقاەۆتىڭ ايتۋىنشا, جەرگىلىكتى بيلىك ۇكىمەتپەن بىرلەسىپ, وبلىستىڭ الەۋەتىن كوتەرۋ ماسەلەسى قولعا الىنۋى ءتيىس.
«ەلىمىزدە «قۋاتتى وڭىرلەر – ەل دامۋىنىڭ درايۆەرى» اتتى ۇلتتىق جوبا جۇزەگە اسىرىلىپ جاتىر. اكىمدىك ۇكىمەتپەن بىرلەسىپ, وسى جوبا اياسىندا باسقا دا شاعىن قالالاردا ىرگەلى باستامالاردى قولعا الۋى كەرەك. ەكونوميكانى ءارتاراپتاندىرۋ ىسىندە بالقاش وزگەلەرگە ۇلگى بولا الادى. مۇندا ءىرى ونەركاسىپ ورىندارىمەن قاتار تۋريزم سالاسىن وركەندەتۋگە زور مۇمكىندىك بار», دەپ تۇيىندەدى پرەزيدەنت.