پرەمەر-مينيستر ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا الدىمەن مەملەكەتتىك قالا قۇرىلىسى كاداسترىن ەنگىزۋ ماسەلەسى قارالدى. اتالعان تاقىرىپ بويىنشا يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ, تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين, اتىراۋ وبلىسىنىڭ اكىمى سەرىك شاپكەنوۆ جانە قاراعاندى وبلىسىنىڭ اكىمى جەڭىس قاسىمبەك بايانداما جاسادى.
تىعىز قۇرىلىس سالۋدى توقتاتادى
ۆەدومستۆو باسشىسىنىڭ حابارلاۋىنشا, مەملەكەتتىك قالا قۇرىلىسى كاداسترىنىڭ اۆتوماتتاندىرىلعان جۇيەسى – ەلدى مەكەندەردىڭ اعىمداعى جانە جوسپارلانىپ وتىرعان دامۋى تۋرالى اقپاراتتى قامتاماسىز ەتۋدىڭ نەگىزگى قۇرالدارىنىڭ ءبىرى. بۇل جۇيە تسيفرلىق باس جوسپارلاردى, ەگجەي-تەگجەيلى جوسپارلاۋ جوبالارىن, عيماراتتار مەن قۇرىلىستاردىڭ ورنالاسۋى, ينجەنەرلىك ينفراقۇرىلىم, كوشە-جول جەلىسى, سونداي-اق اباتتاندىرۋ تۋرالى دەرەكتەردى جيناۋدى, وڭدەۋدى جانە ساقتاۋدى قامتاماسىز ەتەدى. جۇيەنىڭ نەگىزگى مىندەتتەرى – قالا قۇرىلىسى كاداسترى دەرەكتەرىن تولتىرۋ جانە وزەكتەندىرۋ, حالىقپەن بيزنەستى ينجەنەرلىك جەلىلەر تۋرالى وزەكتى اقپاراتپەن قامتاماسىز ەتۋ, ينفراقۇرىلىمدىق دەرەكتەردى تسيفرلاندىرۋ ەسەبىنەن تەحنيكالىق شارتتاردى الۋدىڭ اشىق پروتسەسىن قالىپتاستىرۋ.
قالا قۇرىلىسى كاداسترى جۇيەسى ونەركاسىپتىڭ جوسپارلانعان جانە جۇمىس ىستەپ تۇرعان وبەكتىلەرىنە, الەۋمەتتىك ينفراقۇرىلىم بويىنشا اقپاراتتىڭ كەڭ اۋقىمىن قامتيدى. قالا قۇرىلىسى كاداسترىنىڭ تاقىرىپتىق دەرەكتەر بازاسى, ءوڭىردىڭ ەكونوميكالىق ماماندانۋىن, ينفراقۇرىلىمدىق قامتاماسىز ەتىلۋىن, وڭىردە ۇقساس وبەكتىلەردىڭ بولۋىن جانە ونىڭ جۇكتەمەلىگىن ەسكەرە وتىرىپ, ينۆەستيتسيالىق جوبالاردى وڭتايلى ورنالاستىرۋدى تاڭداۋعا مۇمكىندىك بەرەدى. ءوز كەزەگىندە, الەۋمەتتىك وبەكتىلەردىڭ تسيفرلىق دەرەكتەرىنىڭ بولۋى, تىرشىلىك ينفراقۇرىلىمىن بازالىق قامتاماسىز ەتۋدى باعالاۋعا مۇمكىندىك بەرەدى. وسىلايشا, باسقارۋشىلىق شەشىمدەردى وڭتايلى قابىلداۋدىڭ تسيفرلىق قۇرالى قالىپتاستىرىلدى.
ق.وسكەنباەۆتىڭ ايتۋىنشا, قالا قۇرىلىسى كاداسترى قالا قۇرىلىسى قىزمەتىنىڭ اشىقتىعىن, قالا قۇرىلىسى جوبالارىن ازىرلەۋ مەن ىسكە اسىرۋدىڭ سايكەستىگىن قامتاماسىز ەتۋگە مۇمكىندىك بەرەدى. «ول ءۇشىن ءبىز وبەكتىنىڭ بىرەگەي ءنومىرىن ەنگىزۋدى پىسىقتاپ جاتىرمىز. بۇل بىرىزدەندىرۋ, جەكە سايكەستەندىرۋ نومىرمەن ۇقساستىعى بويىنشا ساۋلەت-جوسپارلاۋ تاپسىرماسىن بەرۋدى, ادامي فاكتوردى بولدىرماي, باس جوسپارلارعا جانە ەگجەي-تەگجەيلى جوبالاۋ جوسپارلارىنا سايكەس جۇيەدە ەسكيزدىك جوبانى كەلىسۋدى قامتاماسىز ەتەدى. سونداي-اق قۇجاتتاردىڭ نىسانالى ماقساتقا سايكەستىگىنە تۇپكىلىكتى تەكسەرۋدى جۇرگىزۋگە مۇمكىندىك بەرەدى», دەدى ق.وسكەنباەۆ.
اۋماقتاردىڭ بوس قۋاتتارى بويىنشا دەرەكتەردىڭ اشىقتىعى – ينۆەستورلار مەن قاراپايىم حالىق ءۇشىن نەگىزگى پروبلەمالاردىڭ ءبىرى. قازىرگى ۋاقىتتا ەلىمىزدە تۇرعىن ءۇي-كوممۋنالدىق شارۋاشىلىق سالاسىندا 890-عا جۋىق تابيعي مونوپوليا سۋبەكتىلەرى بار. ونىڭ تەك 21-ءى گەواقپاراتتىق جۇيەلەردە جۇمىس ىستەيدى. تابيعي مونوپوليا سۋبەكتىلەرىنىڭ قالا قۇرىلىسى كاداسترى جۇيەسىنىڭ دەرەكتەرىن پايدالانا وتىرىپ تەحنيكالىق شارتتاردى بەرۋى, ءوز كەزەگىندە مەملەكەتتىك قالا قۇرىلىسى كاداسترىنىڭ اۆتوماتتاندىرىلعان اقپاراتتىق جۇيەسىندە ورنالاسقان جانە بوس قۋاتتاردى كورسەتۋ, حالىق پەن بيزنەس ءۇشىن اشىق پروتسەستى جۇزەگە اسىرۋعا قولايلى جاعداي تۋعىزادى. سونىمەن قاتار بوس قۋاتتاردى برونداۋ مۇمكىندىگىن قامتاماسىز ەتە وتىرىپ, سىبايلاس جەمقورلىق تاۋەكەلدەرىن بولدىرماۋعا مۇمكىندىك بەرەدى. سونداي-اق بۇل ينجەنەرلىك جەلىلەردىڭ دەرەكتەرىن قالا قۇرىلىسى كاداسترىنىڭ بىرىڭعاي اشىق گەوپلاتفورماسىندا ۇزدىكسىز وزەكتەندىرۋگە مۇمكىندىك بەرەدى. بۇل جۇيە پايدالانۋعا بەرىلگەن تۇرعىن ءۇي بويىنشا دەرەكتەردىڭ سەنىمدى ەنگىزىلۋىن قامتاماسىز ەتۋگە دە ىقپال ەتپەك.
بيىل مەملەكەت باسشىسىنىڭ تاپسىرماسى بويىنشا مەملەكەتتىك قالا قۇرىلىسى كاداسترىنىڭ اۆتوماتتاندىرىلعان اقپاراتتىق جۇيەسى ەسەپتىك دەرەكتەردىڭ مانيپۋلياتسياسىن, ستاتيستيكالىق ەسەپتىلىكتى ۇسىنۋ كەزىندە دەرەكتەردىڭ بىرنەشە رەت قايتالانۋىن انىقتادى. وسىعان بايلانىستى, وبەكتىلەردى پايدالانۋعا بەرۋ اكتىلەرىن گەوبايلانىستىرۋ مەن جىلجىمايتىن م ۇلىك ءتىزىلىمىنىڭ ستاتيستيكالىق دەرەكتەرىمەن جانە بازاسىمەن سالىستىرۋ ءۇشىن قالا قۇرىلىسى كاداسترى جۇيەسىن قولدانۋ ەنگىزىلدى. «سونىمەن قاتار ءبىز وبەكتىنى پايدالانۋعا بەرۋ اكتىلەرىمەن بىرگە اتقارۋشى تۇسىرىلىمدەردى مەملەكەتتىك قالا قۇرىلىسى كاداسترىنىڭ اۆتوماتتاندىرىلعان اقپاراتتىق جۇيەسىنە ەنگىزۋ بويىنشا زاڭنامالىق تۇزەتۋلەردى پىسىقتاپ جاتىرمىز. بۇل شارا قوسىمشا بيۋدجەتتىك شىعىستارسىز جەلىلەردى اعىمداعى تۇگەندەۋدى جاڭارتۋدى, سونداي-اق اۋماقتاردى ينفراقۇرىلىمدىق قامتاماسىز ەتۋ بويىنشا حالىققا جانە بيزنەسكە وزەكتى دەرەكتەردى ۇسىنۋدى قامتاماسىز ەتۋگە مۇمكىندىك بەرەدى», دەدى ق.وسكەنباەۆ.
ماسەلەنى قورىتىندىلاعان پرەمەر-مينيستر كوپشىلىك ۇدايى كوتەرەتىن قالالارداعى بەيبەرەكەت جانە تىعىز قۇرىلىس سالۋ ماسەلەسىن شەشۋ قاجەتتىلىگىنە نازار اۋداردى. مەملەكەت باسشىسىنىڭ جولداۋىن ىسكە اسىرۋ اياسىندا حالىق پەن بيزنەسكە جەر ۋچاسكەلەرى مەن ينجەنەرلىك سحەمالار تۋرالى اشىق اقپارات بەرىلەتىنىن اتاپ ءوتتى.
«سول ءۇشىن بۇكىل ەل اۋماعى بويىنشا بىرىڭعاي قالا قۇرىلىسى كاداسترى مەن ساراپتاماسى ەنگىزىلىپ جاتىر. جەر ۋچاسكەلەرى مەن ينفراقۇرىلىم جەلىلەرىنىڭ ينتەراكتيۆتى كارتاسى دايىندالۋدا. ول تۇرعىندار مەن كاسىپورىندارعا ينجەنەرلىك جانە كوممۋنالدىق نىساندارعا جەدەل قوسىلۋعا مۇمكىندىك بەرەدى», دەدى ءا.سمايىلوۆ.
قالا قۇرىلىسى ساراپتاماسى قالاداعى بەيبەرەكەت جانە ساپاسىز قۇرىلىستاردى توقتاتۋعا, قالا تۇرمىسىنا قولايلى جاعداي جاساۋعا باعىتتالعان.
«بۇل شارالار قۇرىلىستى جوبالاۋ كەزىندە قاراجاتتى بارىنشا ۇنەمدەۋگە جانە قۇرىلىس تالاپتارىن قاتاڭ ساقتاۋعا مۇمكىندىك بەرەدى. ينتەراكتيۆتى كارتالاردا بوس جاتقان جەر ۋچاسكەلەرى مەن ينفراقۇرىلىم تۋرالى سوڭعى مالىمەتتەر بولادى», دەدى پرەمەر-مينيستر.
ءا.سمايىلوۆ 2023 جىلدىڭ سوڭىنا دەيىن مەملەكەتتىك قالا قۇرىلىسى كاداسترىن تولىعىمەن ەنگىزۋدى جانە اۆتوماتتاندىرۋدى, كاداسترلىق اقپاراتتىق جۇيەلەردىڭ ينتەگراتسياسىن قامتاماسىز ەتۋدى, سونداي-اق وڭىرلىك جەلىلەردى ينۆەنتاريزاتسيالاۋ ۇلەسىن جىل سوڭىنا دەيىن 75%-عا, ال 2024 جىلعا قاراي 100%-عا دەيىن جەتكىزۋدى تاپسىردى.
ينفوگرافيكانى جاساعان امانگەلدى قياس, «ەQ»
جول مەن كولىك قاۋىپسىزدىگىن قامتاماسىز ەتۋ قاجەت
ۇكىمەتتە جول قاۋىپسىزدىگىن قامتاماسىز ەتۋ شارالارى قارالىپ, پرەمەر-مينيستر وسى ماسەلە بويىنشا جول قوزعالىسى قاۋىپسىزدىگىن قامتاماسىز ەتۋ جونىندەگى شارالاردى كۇشەيتۋدى تاپسىردى.
ىشكى ىستەر ءمينيسترى مارات احمەتحانوۆ جىل باسىنان بەرى ەلىمىزدە اپات بويىنشا بارلىق كورسەتكىشتىڭ وسكەنىن ايتتى: جول-كولىك وقيعالارى (9 429), ونىڭ ىشىندە قازا تاپقاندار (1 478) مەن جارالانعاندار (12 394) سانى ايتارلىقتاي ارتتى. بۇل ورايدا تالداۋ اۆتومەكتەپتە وقىماي, كولىك ايداۋدى ء«وز بەتىنشە ۇيرەنگەندەر» ادام ولىمىنە الىپ كەلەتىن جكو-نىڭ 50%-نا جاۋاپتى ەكەنىن كورسەتىپ وتىر.
الماتى قالاسىندا, الماتى, جامبىل جانە تۇركىستان وبلىستارىندا جولدار اسا قاۋىپتى. اتالعان وڭىرلەرگە قازاقستان بويىنشا بارلىق جكو-نىڭ 56%-ى, جاراقات العانداردىڭ 55%-ى جانە قازا تاپقانداردىڭ 41%-ى تيەسىلى. جالپى ەسەپتى كەزەڭدە پوليتسيا 4,5 ملن-عا جۋىق جول قوزعالىسى ەرەجەلەرىن بۇزۋ فاكتىسىنىڭ جولىن كەستى, 17,5 مىڭنان استام ماس جۇرگىزۋشى ۇستالدى, 20 مىڭ جۇرگىزۋشى كولىك باسقارۋ قۇقىعىنان ايىرىلدى.
مينيستر تەحنيكالىق تەكسەرۋ ورتالىقتارىن اشۋعا قويىلاتىن تالاپتار تومەندەگەننەن كەيىن تەكسەرۋدەن ءوتۋ تۋرالى جالعان تالوندار بەرىلە باستاعانىن اتاپ ءوتتى. ماسەلەن 106 مىڭ جۇرگىزۋشى تەحنيكالىق رەگلامەنتتەردىڭ تالاپتارىنا ساي كەلمەيتىن كولىكتى باسقارعانى ءۇشىن جاۋاپقا تارتىلدى, تاعى 80 مىڭ جۇرگىزۋشىگە جالپى تەحنيكالىق تەكسەرۋدەن وتپەگەنى ءۇشىن ايىپپۇل سالىندى.
اۆتومەكتەپتەرگە قويىلاتىن تالاپتار مەن جۇرگىزۋشى دايارلاۋ ساپاسى السىرەدى. قازىر 747 وقۋ ورتالىعى بار. 2018 جىلدان باستاپ ولارعا ليتسەنزيالاۋمەن رۇقسات بەرۋ الىپ تاستالدى. 2020 جىلدان بەرى ولاردىڭ قىزمەتىنە مەملەكەتتىك باقىلاۋ دا جوق. دايىندىقتىڭ تومەن ساپاسى ءۇشىن اكىمشىلىك جاۋاپكەرشىلىك جويىلدى. وسىنىڭ كەسىرىنەن وقۋ پروتسەسى فورماليزمگە اينالدى. كوپ مەكتەپتە كەرەكتى ماتەريالدىق بازا جوق. تالداۋ كورسەتكەندەي, جۇرگىزۋشىلەر اراسىندا ادام ولىمىنە اكەپ سوقتىرعان اپاتتاردىڭ 50%-ى «وزدەرى جۇرگىزىپ ۇيرەنگەندەردىڭ» قاتىسۋىمەن بولادى.
«مويىنداۋ كەرەك, مەملەكەت بۇل سالادا باقىلاۋدى السىرەتىپ الدى. سوندىقتان قازىرگى ۋاقىتتا مينيسترلىك ءتيىستى ۇسىنىستاردى ازىرلەپ جاتىر», دەدى مينيستر.
بىلتىر سىبايلاس جەمقورلىققا قارسى قىزمەت وسىنداي 350 مىڭ جالعان قۇجات جاساپ, 600 ملن تەڭگە زاڭسىز تابىس تاپقان ۇيىمداسقان قىلمىستىق توپتى ۇستادى. وعان قوسا, سوڭعى ءتورت جىلدا تەحنيكالىق جاعدايعا بايلانىستى بايقاۋدان وتپەي قالعان كولىك سانى ەكى ەسەگە ازايعان. ىشكى ىستەر ءمينيسترى بۇل جاعداي كۇمان تۋدىرادى دەپ ويلايدى. ويتكەنى كولىكتەردىڭ تەحنيكالىق رەگلامەنت تالاپتارىنا ساي كەلمەۋىنە بايلانىستى 106 مىڭ جۇرگىزۋشى جاۋاپكەرشىلىككە تارتىلعان. سونداي-اق تەحنيكالىق بايقاۋدان وتپەگەن 80 مىڭ جۇرگىزۋشىگە ايىپپۇل سالىندى. كەزىندە بۇل فۋنكتسيا كاسىپكەرلىك سالاسىنا بەرىلگەن. «بىراق پروتسەدۋرانى جەڭىلدەتەمىز دەپ كوپتەگەن تەرىس سالدارعا جول بەردىك. جول اپاتتارى كوبەيدى. ال جەمقورلىق ارتتى», دەدى م.احمەتجانوۆ. مينيستر وسىعان بايلانىستى يندۋستريا مينيسترلىگىنە اۆتوكولىكتى جالعان تەكسەرۋ فاكتىلەرى ءۇشىن تەحنيكالىق بايقاۋ وپەراتورلارىنىڭ جاۋاپكەرشىلىگىن كۇشەيتۋدى ۇسىندى. ونىڭ ايتۋىنشا, كەلەسى ءۇشىنشى جانە ەڭ نەگىزگى سەبەپ –جولداردىڭ جاعدايى جانە ينفراقۇرىلىمى. «جول-كولىك وقيعاسىنىڭ 75%-ى جانە جاياۋ ادامداردى قاعىپ كەتۋ سالدارىنان بولعان ءولىمنىڭ 28%-ى ەلدى مەكەندەردە ورىن العان. جالپى, جاياۋ كىسىلەرمەن بولعان اپاتتاردىڭ ەڭ كوپ ۇلەسى – الماتى, جامبىل, تۇركىستان, ماڭعىستاۋ وبلىستارىندا, شىمكەنت جانە الماتى قالالارىندا», دەدى ىشكى ىستەر ءمينيسترى. بۇل, كوبىنەسە جاياۋ جۇرۋگە ارنالعان جولداردىڭ, جارىقتىڭ جوقتىعىنا بايلانىستى. مىسالى, 19 قىركۇيەكتە الماتى وبلىسىنىڭ تالعار اۋدانىندا كەشكى ۋاقىتتا 10 جاسار بالانى قاعىپ كەتىپ, ول سول جەردە قازا بولدى. بۇل وقيعا سول اۋىلداعى العاشقى جاعداي ەمەس. «اكىمدەر تاراپىنان بۇل ماسەلە تەز ارادا شەشىلمەسە, جاعداي قيىن بولماق», دەدى م.احمەتجانوۆ. جول قورشاۋلارى بويىنشا دا جاعداي ءماز ەمەس. جالپى, رەسپۋبليكا بويىنشا قاجەتتىلىك – 2 ملن پاگوندىق مەتر. ولاردى ورناتۋ جۇمىستارى الماتى, جەتىسۋ وبلىستارىندا جانە شىمكەنت قالاسىندا ناشار ءجۇرىپ جاتىر. جالپى, ەل بويىنشا قيىلىستاردا 1 200 باعدارشام, 1 600 «كەرى ساناق» تابلوسى, 25 مىڭ جول بەلگىسى جانە 1 ملن شاقىرىمعا جول تاڭباسىن ورناتۋ قاجەت. بۇگىنگى تاڭدا جول ەرەجەسىن بۇزۋ فاكتىلەرىن تىركەيتىن 17 مىڭنان اسا اۆتوماتتى كامەرا جۇمىس ىستەيدى. بۇل ءوز تيىمدىلىگىن كورسەتۋدە. جول ەرەجەسىن بۇزۋدىڭ 50%-ىن وسى كامەرالار انىقتاپ جاتىر. ال استانا مەن شىمكەنتتە بۇل كورسەتكىش 70%-عا دەيىن جەتتى. مينيسترلىكتىڭ باستاماسىمەن شىلدە ايىنان باستاپ 6 قالادا – استانا, الماتى, شىمكەنت, وسكەمەن, اتىراۋ جانە تۇركىستان قالالارىندا «قورعاۋ» قوسىمشاسى ىسكە قوسىلدى. بۇل جالعان نومىرلەرى بار, ساقتاندىرۋ ءپوليسى جوق, ىزدەۋدە جۇرگەن نەمەسە جول ەرەجەسىن جۇيەلى تۇردە بۇزاتىن جانە ايىپپۇل تولەمەي جۇرگەن جۇرگىزۋشىلەردى انىقتايدى. بۇعان دەيىن مۇنداي فاكتىلەر بارلىق كولىكتى توقتاتىپ, ولاردىڭ قۇجاتتارىن جەكە تەكسەرۋ بارىسىندا عانا انىقتالاتىن.
سونداي-اق اتالعان ماسەلە بويىنشا جامبىل وبلىسىنىڭ اكىمى نۇرجان نۇرجىگىتوۆ, تۇركىستان وبلىسىنىڭ اكىمى دارحان ساتىبالدى جانە الماتى وبلىسى اكىمىنىڭ ورىنباسارى نۇرجان قۇدايبەرگەنوۆ بايانداما جاسادى.
ماسەلەنى قورىتىندىلاعان پرەمەر-ءمينيستردىڭ ايتۋىنشا, قازاقستان – جول قاۋىپسىزدىگى بويىنشا الەمدىك رەيتينگتە 107-ورىندا. دامىعان ەلدەرگە قاراعاندا, بىزدە جول اپاتتارىنان قازا تابۋ ىقتيمالدىعى 11 ەسە جوعارى.
«جالپى, ەلىمىزدە جول قاۋىپسىزدىگىنە قاتىستى جاعداي وتە كۇردەلى: 8 ايدا جول اپاتتارىنىڭ سانى 14%-عا, قازا تاپقانداردىڭ سانى 18%-عا كوبەيدى. ورتا ەسەپپەن جولدا تاۋلىگىنە 5-6 ادام قازا تابادى. بۇل – وتە اۋىر جاعداي», دەدى ءا.سمايىلوۆ.
ۇكىمەت باسشىسى ەلىمىزدە جۇرگىزۋشىلەر اراسىندا كولىك جۇرگىزۋ مادەنيەتى وتە تومەن ەكەنىن اتاپ ءوتتى. جول ەرەجەسىن ءجيى بۇزاتىن شامامەن 71 مىڭ جۇرگىزۋشى انىقتالدى. ولاردىڭ كەيبىرى بيىل جول ەرەجەسىن 150 رەت بۇزعان. «ارينە, مۇنداي جۇرگىزۋشىلەردى قاتاڭ جازاعا تارتۋ كەرەك», دەدى ءا. سمايىلوۆ.
سونىمەن قاتار پرەمەر-مينيستر جۇرگىزۋشىلەردى دايارلاۋ ساپاسى دا كۇمان تۋدىراتىنىنا نازار اۋداردى. ۇكىمەت باسشىسىنىڭ ويىنشا, اۆتومەكتەپتەر جۇمىسىنداعى تاسىلدەردى وزگەرتۋ قاجەت. سەبەبى بۇگىندە ولاردى باقىلاپ جاتقان ەشكىم جوق, ليتسەنزيا بەرىلمەيدى. «كولىك جۇرگىزۋگە ارنالعان اۆتودرومدار جەتكىلىكسىز. اكىمدىكتەر بۇل ماسەلەنى بيزنەسپەن بىرگە قاراۋى ءتيىس», دەدى ول.
ءا.سمايىلوۆ جالپى ءبىلىم بەرەتىن مەكتەپتەردە بالالارعا جول ءجۇرۋ ەرەجەسى وقىتىلمايتىنىن ايتىپ ءوتتى. اۆتوكولىكتەردى تەحنيكالىق تەكسەرۋ ساپاسىنا قاتىستى دا سۇراق كوپ. كولىك اپاتتارىنىڭ نەگىزگى سەبەبى – جولداردىڭ ناشار جاعدايى. «قازاقستاندىقتار تاراپىنان جولدىڭ ساپاسىنا قاتىستى شاعىم وتە كوپ. ماسەلەن, 26 قىركۇيەكتە اقتوبەدە تۇرعىندار اينالما جولدى جاۋىپ تاستادى. سەبەبى ول جولدا نە جارىق جوق, نە جاياۋ جۇرگىنشى وتەتىن جەر, نە قاۋىپسىزدىك ەلەمەنتتەرى جوق. مۇنىڭ ءبارى جول اپاتىنا الىپ كەلەدى», دەدى ءا.سمايىلوۆ.
پرەمەر-مينيستر جول قاۋىپسىزدىگى سالاسىندا بەينەكامەرالار مەن باسقا دا تەحنيكالىق باقىلاۋ قۇرالدارى جەتكىلىكسىز ەكەنىن دە اتاپ ءوتتى. ماسەلەن, رەسپۋبليكالىق ماڭىزى بار اۆتوجولداردا بەينەباقىلاۋ جۇيەسى اقمولا وبلىسىندا عانا بار.
ء«بىزدىڭ باستى مىندەتىمىز – جول قاۋىپسىزدىگى, جول اپاتتارى مەن ودان قازا بولۋ جاعدايلارىن ازايتۋ بويىنشا كەشەندى شەشىمدەر قابىلداۋ», دەدى ءا.سمايىلوۆ.
وسىعان وراي ۇكىمەت باسشىسى جول اپاتتارىنىڭ كوبەيۋىنە قاتىستى جان-جاقتى تالداۋ جۇرگىزۋدى, جول اپاتتارى ءجيى بولاتىن ۋچاسكەلەردەگى قوزعالىستى قاداعالاۋ جۇمىستارىن كۇشەيتۋدى, قاۋىپسىز جول ينفراقۇرىلىمىن جاساۋ بويىنشا قوسىمشا شارالار قابىلداۋدى, سونداي-اق جولداعى كامەرالاردى كوبەيتۋدى تاپسىردى. ودان بولەك, يندۋستريا جانە ينفراقۇرىلىمدىق دامۋ مينيسترلىگىنە كولىك قۇرالدارىن تەحنيكالىق تەكسەرۋ ساپاسىن ءتيىمدى باقىلاۋ تەتىگىن جاساۋ, جولداردىڭ جاي-كۇيىن باقىلاۋدى كۇشەيتۋ, ال ادىلەت جانە ىشكى ىستەر مينيسترلىكتەرىنە ساپاسىز جۇرگىزۋشىلەردى دايارلايتىن اۆتومەكتەپتەردىڭ جاۋاپكەرشىلىگى ماسەلەسىن قاراۋ تاپسىرىلدى.