مەكتەپتىڭ جۇرەگى بولىپ سانالاتىن مۇعالىمنىڭ ءبىر قىرى سپورتتا تانىلادى. سونىڭ جارقىن دالەلى رەتىندە ءبىلىم جانە عىلىم قىزمەتكەرلەرى كاسىپوداعى «قورعاۋ-زاششيتا» قاۋىمداستىعىنىڭ ۇيىمداستىرۋىمەن «كاسىپوداق – ەڭبەككەردىڭ تىرەگى, جالىندى جاستار – تاۋەلسىزدىك جۇرەگى» اتتى جارىستى ايتۋعا بولادى. الماتى وبلىسى, ىلە اۋدانىنىڭ ورتالىعىندا وتكەن ءداستۇرلى شارادا جەتىسۋلىق جاس ۇستازدار سپورتتىڭ 6 تۇرىنەن سىنعا ءتۇستى.
«ەلباسى مەملەكەتتىڭ ەڭبەك قاتىناستارىن جەتىلدىرۋ ماسەلەلەرىندەگى ارىپتەستەردىڭ ءبىرى كاسىپوداقتار ەكەنىن ناقتىلاعانى ءمالىم. ۇلگى تۇتارلىق يگى شارانىڭ باستى شارتى – جاستار تاربيەسىندە ىستەلىنىپ جاتقان جۇمىستى جانداندىرۋ, ەلىمىزدە سالاۋاتتى ءومىر سالتىن جاقسارتا تۇسۋگە ۇلەس قوسۋ» دەدى قازاقستان كاسىپوداقتار فەدەراتسياسىنىڭ توراعاسى ابىلعازى قۇسايىنوۆ.
كەلەسى كەزەكتە, ءبىلىم جانە عىلىم قىزمەتكەرلەرى كاسىپوداعى «قورعاۋ-زاششيتا» قاۋىمداستىعىنىڭ توراعاسى توققوجا ەستەنوۆ, الماتى وبلىستىق ءماسليحاتىنىڭ حاتشىسى ەرمەك كەلەمسەيىت جالىندى جاستار ەلىمىزدىڭ ەرتەڭى, تاۋەلسىز قازاقستانىمىزدىڭ جارقىن بولاشاعى, ءبىلىمدى, بىلىكتى, دەنى ساۋ ۇرپاقتى وقۋ مەن سپورت جولىنا باۋلۋ مىندەت ەكەندىگىن باسا ايتتى.
سونىمەن, توعىزقۇمالاقتان قاراساي اۋدانى, شاحماتتان ىلە اۋدانى, ۇستەل تەننيسىنەن تالعار اۋدانى, جەڭىل اتلەتيكادا ەڭبەكشىقازاق اۋدانىنىڭ جەلاياقتارى 60 مەترگە جۇگىرۋدەن اينۇر قاسىموۆا, 100 مەترگە جۇگىرۋدەن سەرىك ابيروۆ, ۆولەيبولدان ايەلدەر اراسىندا تالعار اۋدانى, ەرلەر كومانداسىندا جامبىل اۋدانى, فۋتبولدان ىلە اۋدانىنىڭ اياق دوپ شەبەرلەرى جۇلدەلى ءى-ورىندى جەڭىپ الدى. ءسويتىپ, الماتى وبلىستىق ءبىلىم سالاسى قىزمەتكەرلەرى اراسىندا وتكەن ح وبلىستىق جاستار سپارتاكياداسىنىڭ جەڭىمپازدارى 3 ملن. تەڭگە كولەمىندە سىيلىق الىپ, كوڭىلدەرى حوش بولۋمەن قاتار وقۋشىلار اراسىندا سالاماتتى ءومىر سالتىن ناسيحاتتاۋعا ەرەكشە كىرىسۋگە قۇلشىنىپ قايتتى.
نۇربول الدىباەۆ,
«ەگەمەن قازاقستان».
الماتى وبلىسى.