بۇل تۋرالى اقپارات جانە قوعامدىق دامۋ ءمينيسترى دارحان قىدىرالى فەيسبۋكتەگى پاراقشاسىندا جازدى, دەپ حابارلايدى Egemen.kz.
«TikTok كومپانياسىنىڭ ۆيتسە-پرەزيدەنتى تەو بەرتراممەن كەزدەستىم. بەرترام مىرزا Google كومپانياسىندا جاۋاپتى قىزمەت اتقارعان, ۇلىبريتانيانىڭ ەكى بىردەي پرەمەر-مينيسترىنە كەڭەسشى بولعان تاجىريبەلى ادام.
TikTok قازاقستاندا تۋريزم بويىنشا بىرىككەن جوبالاردى باستاعان ەكەن. ەندى ءباسپاسوز حاتشىلارىن وقىتۋ, تسيفرلىق ساۋاتتىلىقتى ارتتىرۋ, الەۋمەتتىك جەلىنى ءتيىمدى قولدانۋ جاعىنان ورتاق ترەنينگتەر ۇيىمداستىرۋ تۋرالى ايتتىم», دەپ جازدى مينيستر.
ونىڭ ايتۋىنشا, كومپانيا وكىلى مۇنى قۇپتاعان. سونىمەن قاتار كەلەشەكتە TikTok ينتەرفەيسى قازاقشالانادى.
«كەزدەسۋدە TikTok ينتەرفەيسىنە قازاق ءتىلىن ەنگىزۋ جانە قازاقشا كونتەنتتى بىرلەسە دامىتۋدى ۇسىندىم. كومپانيا وكىلى جەلىگە قازاق ءتىلىن ورناتۋ جايى قاراستىرىلىپ جاتقانىن جەتكىزدى.
مينيسترلىك اقپارات, جاستار, وتباسى جانە ازاماتتىق قوعامدى دامىتۋ بويىنشا ۋاكىلەتتى ورگان بولعاندىقتان, كومپانيامەن كرەاتيۆتى كونتەنتتەر جانە زاماناۋي ساپالى ماتەريالدار جاساۋعا مۇددەلى. ماسەلەن, جەلىدە Bala house, «ەل بىرلىگى» جوبالارى جاقسى كورىلىپ جاتىر. بۇل باعىتتاعى جوبالاردى بىرگە جالعاستىرىپ, TikTok حاۋستاردى ۇيىمداستىرامىز. سەبەبى كومپانيا جەلىدە ءبىلىم بەرۋگە قاتىستى, يميدجدىك كونتەنتتەردى كوبەيتۋدى دە جوسپارلاپ وتىر ەكەن», دەلىنگەن ماتىندە.
سونداي-اق مينيستر تەو بەرترامدى جۋىردا وتەتىن Astana Media Week اپتالىعىنا شاقىرعان. ال مارتەبەلى مەيمان اۋقىمدى ءىس-شاراعا قاتىسۋعا ىنتالى ەكەنىن بىلدىرگەن.
«تاعى ءبىر جاڭالىق, جۋىردا قازاقستاندا TikTok-تىڭ ءوفيسى اشىلادى. بۇل قازاقستاننىڭ بەلگىلى كومپانيامەن تىعىز بايلانىس ورناتىپ, ەلگە قاجەتتى دۇنيەلەردى اقىلداسا وتىرىپ جاساۋعا تاپتىرماس مۇمكىندىك دەپ ويلايمىن.
استانادا وتكەن Digital Bridge فورۋمىندا مەملەكەت باسشىسى قازاقستاننىڭ الدىندا تسيفرلىق ترانسفورماتسيانىڭ باسىمدىقتارىن جاريالاعانى بەلگىلى. اتالعان كەزدەسۋلەر پرەزيدەنت قويعان مىندەتتەردى ساپالى ورىنداۋعا مۇمكىندىك بەرەدى دەپ سەنەمىن», دەپ جازدى اۆتور ءسوز سوڭىندا.