20 قىركۇيەك كۇنى تاڭعى ساعات 08:57-دە اتىراۋ قالاسى, كەڭوزەك اۋىلى, كاسپي تەڭىزىنىڭ جاعالاۋىنداعى تاسقالا اۋىلىنان 40 شاقىرىم جەردە قامىس ورتەندى. بۇگىل اۋماقتى شارپىعان قارا ءتۇتىن جەرگىلىكتى تۇرعىنداردىڭ ۇرەيىن ۇشىردى, دەپ حابارلايدى Egemen.kz وبلىستىق تج دەپارتامەنتىنە سىلتەمە جاساپ.
«ساعات 18:00-دەگى جاعداي بويىنشا جانۋ اۋماعى شامامەن 60 گەكتارعا ۇلعايدى. ءورتتى ءسوندىرۋ جالعاسۋدا. ەلدى مەكەندەرگە قاۋىپ ءتونىپ تۇرعان جوق. اتىراۋ قالاسىندا كۇيىك ءيىسى سەزىلەدى. ساعات 19:40-تا ءورت «اق جايىق» ءوسب اۋماعىنا جايىلدى», دەلىنگەن حابارلامادا.
ءورت ورنىندا تەلەفون جانە راديو بايلانىسى جوق ەكەنىن ايتا كەتۋ كەرەك.
سينوپتيكتەردىڭ ايتۋىنشا, وڭتۇستىك-شىعىستان 5-7 م/س جەل سوعادى, اۋا تەمپەراتۋراسى +30 س بولىپ ساقتالادى.
وقيعا ورنىنا اتىراۋ وبلىسى تجد (31 قىزمەتكەر جانە 10 تەحنيكا, 1 سۋ كولىگى), «اق جايىق» گپر (20 جۇمىسشى جانە 5 تەحنيكا), جەرگىلىكتى اتقارۋشى ورگاندار (3 جۇمىسشى جانە 3 تەحنيكا), ەوسج (15 ادام 2 بىرلىك تەحنيكا) جۇمىلدىرىلدى.
«جەردىڭ باتپاقتى بولۋىنا بايلانىستى ءورت ءسوندىرۋ تەحنيكالارى وتە الماي جاتىر. سوندىقتان ءورتتى ءسوندىرۋ مۇمكىن ەمەس. ءورت وشاعىنا شىققان «TREKOL» اۆتوكولىگى باتپاقتى جەردە باتىپ, تولىعىمەن جانىپ كەتتى. زارداپ شەككەندەر جوق. ەلدى مەكەندەرگە دە قاۋىپ ءتونىپ تۇرعان جوق. دەپارتامەنتتە جەدەل شتاب قۇرىلدى», دەپ قوستى دەپارتامەنتتەن.
بۇگىن ءورتتى اۋەدەن ءسوندىرۋ ءۇشىن قر توتەنشە جاعدايلار مينيسترلىگى «قازاۆياپاس» اق-نىڭ مي-8 تىكۇشاعى سۋ توگەتىن قۇرىلعىسىمەن ۇشۋى جوسپارلانعان.