ەلىمىز الداعىنى دۇرىس بولجاۋعا قۇرىلماعان, وقشاۋلانعان ستراتەگيادان باس تارتىپ, بولاشاققا ۇمتىلادى.
بۇدان ءسال ەرتەرەك, ناقتى ايتساق, وسى ايداعى قازاقستان حالقىنا جولداۋىمدا الدەقايدا ادىلەتتى دە اشىق قازاقستان تۋرالى ۇستانىمىمدى, جاڭا دەموكراتيالىق مانداتقا يە بولۋعا بەل بۋعانىمدى جاريالادىم.
تاياۋ ايلاردا ەلىمىزدەگى سايلاۋ قارساڭىندا, الەمدە بەيمازا ۋاقىت تۋعان كەزدە ءبىز وقشاۋلانۋعا قارسى تۇرۋعا ءتيىسپىز.
جاھاندانۋعا, ءوزارا تاۋەلدىلىككە جانە ەرەجەلەرگە نەگىزدەلگەن حالىقارالىق تارتىپكە بالاما بولۋ مۇمكىن ەمەس. تاۋەلدىلىكتى ازايتۋعا جانە تۇراقتىلىقتى ارتتىرۋعا كۇش سالۋ تۇسىنىكتى ءارى كوپ جاعدايدا اقىلعا قونىمدى بولعانىمەن, بۇل كەيىنگى ونجىلدىقتاردا جاھاندىق كوركەيۋدى قامتاماسىز ەتكەن نارسەنىڭ بارىنەن كەڭ كولەمدە كەرى شەگىنۋگە اكەلىپ سوقپاۋ ءۇشىن نازىك شەكتى ساقتاي ءبىلۋ قاجەت.
ءبىز تاۋەكەلدى ازايتۋعا, جاھاندىق جۇيەنىڭ وسالدىعىن كەمىتۋگە مىندەتتىمىز جانە بۇعان ىنتىماقتاستىقتان باس تارتا وتىرىپ ەمەس, ونى نىعايتۋ جولىمەن قول جەتكىزۋگە ءتيىسپىز.
مۇنى جاھاندىق بولىنىسكە بايلانىستى تۋىنداعان قاۋىپ-قاتەردىڭ العى شەبىندەگى ەلدىڭ كوشباسشىسى رەتىندە ايتىپ وتىرمىن.
قازاقستان ءاردايىم جىبەك جولىنىڭ ناق جۇرەگىندە, شىعىس پەن باتىستىڭ اراسىنداعى كوپىر بولدى. ءبىزدىڭ رەسەيمەن – 7600 كيلومەترلىك, قىتايمەن 1800 كيلومەترلىك شەكارامىز بار, ەۋروپامەن, جالپى الەممەن اۋقىمدى ساۋدا بايلانىستامىز.
بۇكىل تاريحىمىزدا, اسىرەسە تاۋەلسىزدىك العاننان بەرى ءبىز كورشىمەن اراداعى كۇردەلى ماسەلەلەرگە سىندارلى قاراپ, ونىڭ بايلانىستاردى ۇزبەۋگە, ىنتىماقتاستىققا جانە سەنىمگە نەگىزدەلمەۋىن باسشىلىققا الدىق.
بۇل قازاقستان مەن ورتالىق ازيانىڭ الەممەن ۇيلەسىمدىلىكتە ءوڭىر حالقىنىڭ مۇددەسىن كوزدەپ دامۋىنا ىقپال ەتتى.
ونىڭ ۇستىنە, ءبىز حالىقارالىق سالاداعى اشىقتىق پەن ىنتىماقتاستىق قاعيداتتارى ەل ىشىندە دە قۇندى دەپ سانايمىز. شىنىندا دا, وسى رۋح ءبىزدىڭ ساياساتىمىزدىڭ ىشكى رەفورمالار جولىن ايقىندادى.
ءتىپتى باسقا ەلدەردەگىدەي مەملەكەتىمىزدىڭ باسىنا قيىندىق تۋعاندا حالىقارالىق قىسىم جاعدايىندا دا ءبىز وقشاۋلانبايمىز.
ونىڭ ورنىنا ءبىز بۇكىل الەمدەگى ءومىر ءسۇرۋ دەڭگەيىنىڭ ايتارلىقتاي كوتەرىلۋىنە اكەلگەن ليبەرالدى, حالىقارالىق, اشىق ساياساتتى كۇشەيتۋگە نيەتتەنىپ وتىرمىز.
مەنىڭ ەلىم جول ايرىعىندا تۇر. وسى كەزەڭدە الدىمىزداعى اسا ماڭىزدى ماسەلەلەردى دەر كەزىندە شەشپەسەك, «ورتاشا كىرىس تۇزاعىنا» ءتۇسىپ, وپتيميست, جىگەرلى, ءورشىل تۇتاس بۋىندى جاسىتىپ الۋىمىز مۇمكىن.
ەكى اپتا بۇرىن مەن پارلامەنتتە «ادىلەتتى جانە بەرەكەلى قازاقستاندى» قۇرۋ جوسپارىن ۇسىندىم. بۇل جوسپار شەشىم قابىلداۋدى ورتالىقسىزداندىرۋعا, زاڭ ۇستەمدىگىن نىعايتۋعا, حالىقارالىق باسەكەگە قابىلەتتىلىكتى ارتتىرۋعا, ءار ازامات ءۇشىن تەڭ مۇمكىندىكتەردى قامتاماسىز ەتۋگە باعىتتالعان.
ول ساياسي جۇيەمىزدى تۇبەگەيلى قايتا قۇرۋعا جانە جاڭا امبيتسيامىزدى جۇزەگە اسىرۋعا, ءتيىمدى باسقارۋ ۇلگىسى سانالمايتىن «سۋپەرپرەزيدەنتتىكتەن» باس تارتۋعا باعىتتالعان.
ونىڭ ورنىنا ءبىز پارلامەنت پەن جەرگىلىكتى بيلىك ورگاندارىنىڭ ءرولىن كۇشەيتە وتىرىپ, بيلىكتى ورتالىقسىزداندىرىپ, حالىق پەن قوعامنىڭ ءرولىن ارتتىرىپ جاتىرمىز.
ءبىز ساياسي پارتيالاردى تىركەۋ مەن قۇرۋعا قويىلعان شەكتەۋلەردى الىپ تاستاۋ ارقىلى ءپليۋراليزمنىڭ جاڭا ءداۋىرىن اشىپ وتىرمىز.
جانە دە مەن بىرىڭعاي جەتى جىلدىق پرەزيدەنتتىك مەرزىم ەنگىزۋ تۋرالى باستاما كوتەردىم, ويتكەنى بۇل قازاقستاندا دەموكراتيانى دامىتۋ مەن ەلىمىزدى دامىعان مەملەكەت رەتىندە جاڭعىرتۋدىڭ ايقىن سەرپىلىسى بولادى دەپ ويلايمىن. بىزگە قاتىستى الەم بولىگىندە بىردە-ءبىر مەملەكەت بۇعان دەيىن مۇنداي باتىل قادامعا بارعان ەمەس.
وسى وزگەرىستەردىڭ بارلىعى بىزگە جاڭا ۇلگىگە – كۇشتى پارلامەنتى مەن ەسەپ بەرەتىن ۇكىمەتى بار پرەزيدەنتتىك رەسپۋبليكا ۇلگىسىنە قاراي جىلجۋعا مۇمكىندىك بەرەدى.
مۇنى ۇلتتىق ساياساتىمىزدى تولىق ترانسفورماتسيالاۋ دەۋگە بولادى. سوندىقتان دا وسى رەفورمانى ىلگەرىلەتۋ ءۇشىن بەرىك سەنىم مانداتى قاجەت.
مەنىڭ بيىلعى كۇزدە پرەزيدەنتتىك سايلاۋ وتكىزۋ تۋرالى شەشىم قابىلداعانىمنىڭ جانە ەلىمىزدەگى بولاشاق پرەزيدەنتتەردىڭ ءبىر مەرزىمنەن ارتىق قىزمەت ەتۋىنە تىيىم سالاتىن زاڭ ەنگىزگەنىمنىڭ سەبەبى وسى.
كەيبىر بايقاۋشىلار مۇنداي امبيتسيالى رەفورمالاردى جۇزەگە اسىرا الاتىنىمىزعا كۇماندانۋى مۇمكىن. الايدا تاريحي وزگەرىستەردىڭ بارلىعى ساياسي باتىلدىق پەن جانكەشتىلىكتى تالاپ ەتەدى. مەن بۇل مىندەتتىڭ قانشالىقتى اۋقىمدى ەكەنىن جاقسى سەزىنەمىن.
سونداي-اق ءبىزدىڭ ۇلتتىق وي-سانامىز كەيىنگى جىلدارى باستان وتكەرگەن تەرەڭ الەۋمەتتىك وزگەرىستەردەن, ەكونوميكالىق جانە قاۋىپسىزدىك داعدارىسىنان تۋىنداعان, بارىنەن دە گورى ءبىز الدەقايدا ادىلەتتى, ءاربىر ازاماتقا قىزمەت ەتەتىن ەل قۇرۋىمىز كەرەك ەكەنىن ايقىنداعان تۇبەگەيلى وزگەرىس دەڭگەيىنە كوتەرىلدى دەپ سانايمىن.
ەگەر ءبىز توقىراۋعا ۇرىنعىمىز كەلمەسە, ۇدەمەلى رەفورمالارعا قاراي بارىنشا جىلدام العا باسۋعا ءتيىسپىز.
بۇل ءبىزدىڭ قاپەرسىزدىگىمىزدى نەمەسە اڭعالدىعىمىزدى بىلدىرمەيدى. قاجەتتى قارقىنمەن, ءبارىن ويلاستىرىپ ءارى بايسالدى تۇردە ىلگەرىلەيمىز. ىشكى جانە سىرتقى ۇستانىمىمىز دا وسى جولدا.
ءبىز كەز كەلگەن پروبلەما – مەيلى مەملەكەتتىك بولسىن, مەيلى جاھاندىق بولسىن – ورتاق پروبلەما ەكەنىن مويىنداۋ ارقىلى عانا العا جىلجي الامىز. ال وسى ورتاق سىن-قاتەرلەرگە تەك توپتاسقان, بىرلەسكەن ءىس-قيمىلمەن جاۋاپ بەرە الامىز.
ءبىز قازاقستاندا بيلىكتى نەعۇرلىم اشىقتىق پەن ورتالىقسىزداندىرۋ ارقىلى ءادىل ءبولۋ, ۇلتتىق دامۋ جانە ەكونوميكانى ءارتاراپتاندىرۋ ماسەلەلەرىن شەشىپ جاتقانىمىز سياقتى, كليماتتىڭ وزگەرۋى, ازىق-ت ۇلىك, ەنەرگەتيكالىق قاۋىپسىزدىك پروبلەمالارىن شەشۋ ءۇشىن حالىقارالىق دەڭگەيدە بىرلەسىپ جۇمىس ىستەۋىمىز كەرەك. وسى جاھاندىق پروبلەمالاردىڭ بارلىعىن شەشۋدە قازاقستاننىڭ ءوز ورنى بار. مۇنى قالاي اتقاراتىنىمىزدى بۇۇ باس اسسامبلەياسىنداعى ۇندەۋىمدە ەگجەي-تەگجەيلى ايتامىن.
وسى كۇردەلى بەتبۇرىستى كەزەڭدە ۇلتتىق, جاھاندىق دەڭگەيدەگى داعدارىستاردان دۇرىس ساباق الىپ, جولىمىزدى جاڭارتىپ, جابىق وقشاۋلانعان تاسىلدەن باس تارتىپ, نىعايۋعا ۇمتىلۋىمىز قاجەت.
2022 جىلعى 20 قىركۇيەك