ۆەنادا العاش رەت «One world. New generation» مادەني ءىس-شارالار اپتالىعى اياسىندا قازاقستان بالالارىنىڭ سۋرەت كورمەسى اشىلدى. ەۋروپا جۇرەگىنە قازاق ەلىنىڭ اتىنان بارعان جاس تالانتتار – بالالار شىعارماشىلىعىن دامىتۋعا ارنالعان «جانۋارلار – مەنىڭ دوستارىم» جانە «مەنىڭ جاسىل پلانەتام» بايقاۋلارىنىڭ جەڭىمپازدارى.
«جانۋارلار – مەنىڭ دوستارىم» جانە «مەنىڭ جاسىل پلانەتام» كونكۋرستارى 2020 جىلى بالا قۇقىعى جونىندەگى ۋاكىل ارۋجان سايننىڭ يدەياسى نەگىزىندە پرەزيدەنت قاسىم-جومارت توقاەۆتىڭ قامقورلىعىمەن وتكەن بولاتىن. باستامانى دۇنيەجۇزىلىك قورشاعان ورتانى قورعاۋ كۇنىن اتاپ ءوتۋ اياسىندا بۇۇ قورشاعان ورتانى قورعاۋ باعدارلاماسى, ءبىلىم جانە عىلىم مينيسترلىگى, مادەنيەت جانە سپورت مينيسترلىگى, «بالالار بەيبىتشىلىكتى سالادى» جانە «مەيىرىمدىلىك» قورلارى قولدادى. وسى جوبادا قاتارلاستارىنان وق بويى وزعان 10 جەتكىنشەك ايتۋلى كورمەگە قازاقستاننىڭ اۋسترياداعى ەلشىلىگىنىڭ جانە باس دەمەۋشى EduStream كومپانياسىنىڭ قولداۋىمەن كەلدى.
«جوبانىڭ باستى ماقساتى – قوعام ساناسىنىڭ جانۋارلارعا دەگەن قارىم-قاتىناسىن وزگەرتۋ جانە قاتىگەزدىككە جول بەرمەۋ», دەيدى ۇيىمداستىرۋشىلار. تاقىرىپقا تەرەڭ ۇڭىلگەن 6 مىڭنان استام ورەن تەك سۋرەت سالىپ قويعان جوق, سونىمەن قاتار ەرەسەكتەرگە ارناپ ەسسە, بەينەۇندەۋ جازىپ, قاتىگەزدىكتى سىنعا الدى, قوعامدى مەيىرىمدىلىك پەن ماحابباتقا شاقىردى.
«ەرەسەكتەر كىپ-كىشكەنتاي قورعانسىزداردى قالاي قاڭعىتىپ قويادى, بۇل مەنىڭ ميىما سىيمايدى. ادامدىق قاسيەتىمىزدى جوعالتپايىق, ءۇي جانۋارلارىن جانە جەر شارىنداعى بارشا حايۋاناتتاردى قورعايىق», دەپ جازدى ءوز ەسسەسىندە سارىوزەكتىك اقجان قايىربەكقىزى. ال پاۆلودارلىق ارتەم كۋستوۆ بالاڭ ءۇنىن تابيعاتتى قورعاۋ تاقىرىبىندا جازعان ولەڭىمەن جەتكىزدى.
– بالالارىمىزدىڭ جان ايقايى ەلەنەتىنىنە ءۇمىتىمىز زور. ولاردىڭ ەرەسەكتەرگە, پارلامەنتكە جانە ۇكىمەتكە جاساعان ۇسىنىستارى جەر شارىن, ءبىزدىڭ سۇيىكتى قازاقستانىمىزدى, تابيعاتتى, جانۋارلار الەمىن ساقتاپ قالۋعا ىقپالىن تيگىزەر. بالالاردان بۇرىن, ەرەسەكتەردىڭ ساناسى وزگەرىستى قاجەت ەتەدى, نەگە دەسەڭىز, بالا جاعدايى مەن عالامشارىمىزدىڭ قاۋىپسىزدىگى سولارعا بايلانىستى, – دەيدى قازاقستانداعى بالا قۇقىعى جونىندەگى ۋاكىل ارۋجان ساين.
اپتالىق اياسىندا قازاقستاننىڭ اۋسترياداعى ەلشىسى قايرات وماروۆتىڭ قاتىسۋىمەن بالالار سۋرەتى كورمەسىنىڭ سالتاناتتى اشىلۋ ءراسىمى ءوتتى. جاس جەڭىمپازداردىڭ تۋىندىسىن بۇۇ ۆەناداعى ءبولىم جەتەكشىسى گادا ۆالي, اۋستريالىق پارلامەنت دەپۋتاتتارى, بىرقاتار مەملەكەت ەلشىلەرى, ەقىۇ باسشىلارى, سونداي-اق ۆەنا مەرياسى مەن جەرگىلىكتى مەملەكەتتىك ءبىلىم ورگاندارى باعالادى.
– بالاعا ءبىلىم بەرۋ ىسىندە مادەنيەت پەن ونەر قاتار جۇرگەنى ابزال. ادام بويىنا قورشاعان ورتاعا دەگەن سۇيىسپەنشىلىكتى جاستايىنان ءسىڭىرۋ, پرينتسيپتىك تۇرعىدا ماڭىزدى. جالپى, ادامزات قۇندىلىعى تابيعاتىمىزدى قورعاۋ دامىعان ەلدەردىڭ مەكتەپتە ءبىلىم بەرۋ ستاندارتىندا ەسكەرىلەدى. قازاقستاننىڭ ءبىلىم بەرۋ سالاسىنىڭ قاتىسۋشىسى ءارى نوۆاتورى رەتىندە ءبىز مەكتەپكە وقۋلىق دايىنداعاندا الەمدىك تالاپتى نەگىزگە الامىز, – دەيدى EduStream كومپانياسىنىڭ باس ديرەكتورى ناتاليا مۇحامەدجانوۆا.
بالعىن سۋرەتشىلەرگە شابىت بەرگەن باعدارلاما كورمەمەن قاتار ءتىل مەكتەبىندە شەبەرلىك ساباعىن وتۋگە, سونداي-اق اۋستريانىڭ ايشىقتى ورىندارىن ارالاۋعا مۇمكىندىك سىيلادى.
الماتى