قازاقستاندىق تانىمال ءانشى ديماش قۇدايبەرگەن ريم پاپاسىنىڭ قولىنان مەدال الدى. بۇل جاڭالىقتى ديماش ءوزىنىڭ ينستاگرام پاراقشاسىندا جاريالادى, دەپ حابارلايلى Egemen.kz.
«ريم پاپاسى, بەرگەن باتا-تىلەگىڭىز بەن ەستەلىك سىيلىعىڭىز ءۇشىن ۇلكەن العىس ايتامىز. عۇمىرىڭىز ۇزاق بولسىن», دەپ جازدى ديماش.
ەسكە سالا كەتەيىك, ريم پاپاسى فرانتسيسك 13 قىركۇيەكتە ەل پرەزيدەنتى قاسىم-جومارت توقاەۆتىڭ شاقىرۋىمەن قازاقستانعا رەسمي ساپارمەن كەلدى. پونتيفيكتى ەلوردا اۋەجايىندا مەملەكەت باسشىسى جەكە ءوزى قارسى الىپ, ولار ازاماتتىق قوعام جانە ديپلوماتيالىق كورپۋس وكىلدەرىمەن بىرگە كەزدەسۋ وتكىزدى. ريم پاپاسى 14 قىركۇيەكتە الەمدىك جانە ءداستۇرلى دىندەر كوشباسشىلارىنىڭ Vll سەزىنىڭ اشىلۋىنا قاتىستى. سونىمەن قاتار, پونتيفيك ەلوردادا مەسسا وتكىزدى.