پرەمەر-ءمينيستردىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين الماتى قالاسىنا جۇمىس ساپارى اياسىندا الەۋمەتتىك ماڭىزى بار ازىق-ت ۇلىك شىعاراتىن زاۋىتتاردىڭ جۇمىسىمەن تانىستى.
Eurasian Foods Corporation زاۋىتى – قازاقستان مەن ورتالىق ازيا ەلدەرىندەگى تاماق ونەركاسىبىنىڭ ءىرى جانە ماڭىزدى كاسىپورىندارىنىڭ ءبىرى. ءوندىرىس كولەمى جىلىنا 150 مىڭ توننادان استام وسىمدىك مايىن قۇرايدى.
سەرىك جۇمانعارين 3 مىڭنان ادامدى جۇمىسپەن قامتاماسىز ەتىپ وتىرعان زاۋىتقا ارنايى كەلىپ, الەۋمەتتىك ماڭىزى بار ازىق-ت ۇلىك تىزىمىنە ەنەتىن وسىمدىك مايى جانە ت.ب. ونىمدەرىن شىعارۋ پروتسەسىمەن تانىستى.
سونىمەن قاتار ۆيتسە-پرەمەر جۇمىس ساپارى اياسىندا قالانىڭ كاسىپكەرلەرىمەن, تۇرعىندارىمەن كەزدەسۋ وتكىزدى. ەكسپورتقا دەن قويعاندار اراسىندا مەملەكەتتەن ءتيىستى كومەك الا الماي جۇرگەندەر دە بولدى. بۇل ماسەلەنى شەشۋ ماقساتىندا س.جۇمانعارين ساۋدا مينيسترلىگىنە قاراستى QazTrade ساۋدا ساياساتىن دامىتۋ ورتالىعىنا ءتيىستى تاپسىرمالار بەردى.
«ەكسپورتتاۋشىلاردى قولداۋدىڭ بىرنەشە تەتىگى بار. سونىڭ ءبىرى – QazTrade ساۋدا ساياساتىن دامىتۋ ورتالىعى ارقىلى قولداۋ. ەكسپورتتاۋشىلاردىڭ شىعىندارىن وتەۋگە قاتىستى سىزدەردە الداعى ۋاقىتتا پروبلەما بولماس ءۇشىن تۇسىندىرمە جۇمىستارىن كۇشەيتەمىز», دەدى س.جۇمانعارين.
ۆيتسە-مينيستر كەزدەسۋدەن بولەك ازاماتتاردى جەكە قابىلدادى. كوتەرىلگەن ماسەلەلەر اراسىندا بازاردى جاڭعىرتۋ, زارداپ شەككەن بيزنەسكە كومەك كورسەتۋ جانە تاعى باسقا سۇراقتار بولدى.