جىل باسىنان بەرى وڭىردە جول قوزعالىسى ەرەجەلەرىن بۇزعان 134 مىڭ قۇقىق بۇزۋشى اكىمشىلىك جاۋاپكەرشىلىككە تارتىلدى. ونىڭ 99 مىڭى ورەسكەل قۇقىق بۇزۋشىلىق ساناتىندا. ادام ولىمىنە اكەلىپ سوقتىراتىن قاۋىپ-قاتەردىڭ كوبەيۋى دە وسىنداي جاۋاپسىزدىقتان تۋىنداۋى ابدەن مۇمكىن عوي.
كۇنى كەشە عانا كوكشەتاۋ – رۋزاەۆكا باعىتىنداعى تاس جولدىڭ 30-ىنشى شاقىرىمىندا جول-كولىك وقيعاسى بولىپ, ەكى ادام وپات بولدى, ەكى ادام اۋرۋحاناعا جەتكىزىلدى. ايدىڭ-كۇننىڭ امانىندا قانشاما قايعى-قاسىرەت؟! وسىعان دەيىنگى جول-كولىك وقيعالارىن ساراپتاپ قاراساڭىز, شىعاسىعا يەسى باسشى بولاتىن, وقىس وقيعاعا سەبەپكەر بولىپ جاتقانداردىڭ باسىم كوپشىلىگى جۇرگىزۋشىلەردىڭ وزدەرى ەكەن. پوليتسيا قىزمەتكەرلەرى جول قوزعالىسى ەرەجەلەرىنىڭ ورەسكەل بۇزۋشىلىقتارىن انىقتاپ, شارا قولدانۋدا. جول قوزعالىسى قاۋىپسىزدىگىن جاقسارتۋ ماقساتىندا وبلىس اۋماعىندا تۇراقتى تۇردە جەدەل الدىن الۋ ءىس-شارالار جۇرگىزىلۋدە.
تاياۋدا «قاۋىپسىز جول» رەسپۋبليكالىق ايلىعى وتكىزىلدى. ايلىق بارىسىندا 15 مىڭعا جۋىق جول قاۋىپسىزدىگى ەرەجەسىن بۇزعان جۇرگىزۋشىلەر اكىمشىلىك جاۋاپكەرشىلىككە تارتىلدى. ولاردىڭ اراسىندا ماس كۇيىندە كولىك جۇرگىزگەندەر – 17, كولىك جۇرگىزۋ قۇقىعى جوق – 290, جۇرگىزۋ قۇقىعىنان ايىرىلعان 55 جۇرگىزۋشى انىقتالسا, قوزعالىس جىلدامدىعىن شامادان اسىرىپ جىبەرگەن 7 110 دەرەك تىركەلگەن. مىنە, وسىنداي جاۋاپسىزدىقتىڭ سالدارىنان قارا جولدىڭ بويىندا قانشاما قاسىرەتتى وقيعا ورىن الىپ جاتىر. توبە شاشىڭدى تىك تۇرعىزاتىن اپاتتار تۋرالى بۇقارالىق اقپارات قۇرالدارىندا ۇزبەي جازىلىپ, الەۋمەتتىك جەلىلەر ارقىلى تاراتىلىپ جاتسا دا, ساقتانۋعا سالاقتىعىمىز-اي! قاراپايىم عانا ءبىر مىسال كەلتىرە كەتەلىك. كەيدە ادام ءومىرىنىڭ امان قالۋىنا اسەر ەتەتىن قاۋىپسىزدىك بەلدىكتەرىن تاعۋدى ەسكەرە بەرمەيمىز. بەلدىك تاققان تالاي جۇرگىزۋشىنىڭ سۇراپىل جول-كولىك وقيعاسىندا امان قالعانىن ەستىپ تە, كورىپ تە ءجۇرمىز. ايلىق بارىسىندا قاۋىپسىزدىك بەلدىگىن پايدالانۋ ەرەجەلەرىن بۇزۋدىڭ 2 606 وقيعاسى تىركەلگەن.
قالا كوشەلەرىندە كولىك جۇرگىزىپ بارا جاتىپ تەلەفونمەن سويلەسەتىندەردىڭ دە قاتارى سەلدىرەمەي تۇر. مۇنى جاياۋ جۇرگىنشىلەردىڭ كوبى كورىپ تە ءجۇر. اسىرەسە جاستار جاعى وسىنداي كەلەڭسىز كورىنىسكە اۋەس. ايلىق بارىسىندا كولىك جۇرگىزىپ كەلە جاتىپ تەلەفونمەن سويلەسكەن 1 746 جۇرگىزۋشى انىقتالىپ, جول قوزعالىسى ەرەجەلەرىن بۇزعانى ءۇشىن 395 كولىك ايىپ تۇراعىنا جەتكىزىلدى.
وتكەن دەمالىس كۇندەرى وتكىزىلگەن رەيد بارىسىندا نەبارى ەكى تاۋلىكتە 632 جول قاۋىپسىزدىگى ەرەجەسىن بۇزۋ فاكتىلەرى بەلگىلى بولدى. ونىڭ ىشىندە, وكىنىشكە قاراي, ماس كۇيىندە كولىك جۇرگىزگەن 27 جۇرگىزۋشى بار. اپات ايتىپ كەلمەيدى دەگەنىمىزبەن, ءدال وسىنداي جاعدايدا ءبىر قاۋىپتىڭ ورىن الاتىنى بەلگىلى بولىپ تۇر ەمەس پە؟!
جول ينفراقۇرىلىمدارىن جەتىلدىرۋ جانە جول قوزعالىسىنىڭ قاۋىپسىزدىگىن جاقسارتۋ ماقساتىندا وبلىستىق اكىمشىلىك پوليتسيا باسقارماسى جول جانە كوممۋنالدىق قىزمەت وكىلدەرىمەن بىرلەسە وتىرىپ, جولدار مەن جول قۇرىلىستارىنا 562 تەكسەرۋ جۇرگىزدى. بالالار مەن جاسوسپىرىمدەر ءجيى جۇرەتىن وقۋ ورىندارىنىڭ ماڭى باستى نازارعا الىنىپ, قوسىمشا 188 جول بەلگىلەرى قويىلدى. كوممۋنالدىق قىزمەت مەكەمەلەرىنە جول بويىندا ورىن الىپ وتىرعان كەمشىلىكتەردى جويۋعا 562 ۇيعارىم بەرىلدى. مىنە, وسىلايشا, جول بويىنداعى قاۋىپسىزدىكتى ساقتاۋعا بايلانىستى جۇمىس جۇرگىزىلىپ وتىر. قالاي بولعان كۇندە دە جۇرگىزۋشىلەردىڭ ءوزى اباي بولعانى ءجون.
اقمولا وبلىسى