سولتۇستىك قازاقستان وبلىسىنىڭ پوليتسەيلەرى 1,5 ميلليون تەڭگەگە جۋىق استىق ۇرلىعىنىڭ جولىن كەستى, دەپ حابارلايدى Egemen.kz.
ەسىل اۋدانىندا دالا جولىنداعى ءموبيلدى توپتاردىڭ ءبىرى ورمانعا كىرگەن كاماز كولىگىنىڭ ءىزىن بايقاعان. ءتارتىپ ساقشىلارى جاقىن جەردە ورنالاسقان جشس جۇمىسشىلارىنىڭ ءىزىن تەكسەرىپ, اعاشتاردىڭ ارتىندا شوپكە تۇسىرىلگەن جاڭا ەگىننىڭ ءدانىن تاپتى. شاقىرۋ بويىنشا كەلگەن جەدەل-تەرگەۋ توبى كاسىپورىننىڭ 39 جاستاعى قىزمەتكەرىنىڭ قاتىسى بارىن انىقتادى.
اتالعان فاكتى قر قىلمىستىق كودەكسىنىڭ 188-بابى «ۇرلىق» بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلگەن. وقيعا ورنىنان جالپى قۇنى 1,4 ميلليون تەڭگەدەن اساتىن 12 توننا 260 كەلى بيداي تاركىلەنىپ, يەسىنە قايتارىلدى.
«يەلەرى قابىلداعان قاۋىپسىزدىك شارالارى قىلمىستى جەدەل اشۋعا ىقپال ەتتى. القاپتاعى استىق پەن استىق ساقتايتىن توكتارداعى قاتاڭ ەسەپتەن باسقا, كاسىپورىن كۇزەتپەن قامتاماسىز ەتىلگەنىن, سيگناليزاتسيا جانە بەينەباقىلاۋمەن جابدىقتالعانىن اتاپ وتكەن ءجون. ايتا كەتەتىن بولساق, اۋىلدا كاسىپكەر قوعامدىق ورىندارعا 5 كامەرا ورناتقان, ول ۋچاسكەلىك پوليتسيا پۋنكتىنە قوسىلعان», دەيدى اۋداندىق ىشكى ىستەر ءبولىمىنىڭ باسشىسى ەرلىك ەسليامبەكوۆ.
بۇكىل وبلىس بويىنشا پوليتسيا قىزمەتكەرلەرى اۋىل شارۋاشىلىعى تاۋارىن وندىرۋشىلەرگە ءوز نىساندارىنىڭ تەحنيكالىق بەرىكتىگىن قامتاماسىز ەتۋدى, كۇزەت جۇيەسىن جەتىلدىرۋدى ۇسىنادى – بۇل ۇرلىق فاكتىلەرىنىڭ الدىن الۋعا جانە جەدەل اشۋعا ىقپال ەتەدى. 20 تامىزدان باستاپ «استىق» ءجپىش ىسكە قوسىلعاننان بەرى وبلىستا 5 قىلمىس تىركەلىپ, ونىڭ 4-ءى اشىلدى.