قازاقستاندىق بەيبىت جۋكاەۆ نونتابۋريدە (تايلاند) ءوتىپ جاتقان ATP Challenger Tour Bangkok Open 3 ءتۋرنيرىن جەڭىسپەن باستادى, دەپ حابارلايدى Egemen.kz ەلىمىزدىڭ تەننيس فەدەراتسياسى تاراتقان اقپاراتقا سىلتەمە جاساپ.
دۇنيەجۇزىلىك رەيتينگتە 395-ورىندا تۇرعان جۋكاەۆ العاشقى اينالىمدا الەمنىڭ 331-راكەتكاسى, قازاقستان پرەزيدەنتى كۋبوگىنىڭ ءۇش دۇركىن چەمپيونى, رەسەيلىك ەۆگەني دونسكويمەن كەزدەستى.
قازاقستاندىق تەننيسشى تارتىستى ماتچتا 7:6 (7:4), 7:6 (7:4) ەسەبىمەن جەڭىسكە جەتتى.
ەكى ساعاتتان ءسال استام ۋاقىتقا سوزىلعان باسەكە بارىسىندا جۋكاەۆ 7 ەيس جاساپ, 8 برەيك-پوينتتىڭ ەكەۋىن پايدالاندى. قارسىلاسى 9 ەيس, 2 برەيكپەن (6 برەيك-پوينت) كوزگە ءتۇستى.
اقتاۋ تەننيس مەكتەبىنىڭ تۇلەگى شيرەك فينالعا شىعۋ ءۇشىن الەمنىڭ 242-ءىنشى, جارىستىڭ 1-راكەتكاسى, جاپونيالىق ەسۋكە ۆاتانۋكيمەن سايىسقا تۇسەدى.
تاعى ءبىر قازاقستاندىق, الەمنىڭ 250-راكەتكاسى تيموفەي سكاتوۆ سەۆيليا (يسپانيا) چەللەندجەر دوداسىنىڭ ەكىنشى اينالىمىنا شىقتى. ول باستاپقى كەزدەسۋىندە الەمنىڭ 208-راكەتكاسى, يتاليالىق راۋل برانكاچيونى 6:4, 6:4 ەسەبىمەن تىزە بۇكتىردى.
سكاتوۆ دۇنيەجۇزىلىك رەيتينگتە 408-ساتىدا تۇرعان يسپانيالىق حاۆەر كوسانو باررانكومەن شيرەك فينال جولداماسىن ساراپقا سالادى.