بۇگىن ەلوردادا تۋرنيكتە تارتىلۋ بويىنشا Tartyl Fest سپورت فەستيۆالى رەسمي تۇردە اشىق دەپ جاريالاندى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
Tartyl Fest قازاقستان رەسپۋبليكاسى پرەزيدەنتىنىڭ جانىنداعى «دارا» تالانتتاردى قولداۋ قورى» قق جانە قالا اكىمدىگىنىڭ قولداۋىمەن وتكىزىلەدى.
نۇر-سۇلتان - تۋرنير وتەتىن سوڭعى 20-شى قالا. فەستيۆالدى وتكىزۋ ورنى رەتىندە EXPO اۋماعىنداعى ساحنا تاڭدالدى.
جوبا امباسسادورى ايتىم جاقىپوۆتىڭ ايتۋىنشا, ەلوردادا 650-دەن استام قاتىسۋشى تىركەلگەن.
ءتۋرنيردىڭ اشىلۋ سالتاناتىنا قر مادەنيەت جانە سپورت ءمينيسترى داۋرەن اباەۆ, نۇر-سۇلتان قالاسى اكىمىنىڭ ورىنباسارى ەرلان بەكمۋرزاەۆ, «دارا» قولداۋ قورىنىڭ باسشىسى نۇرلان قويانباەۆ, بەلگىلى سپورتشى دامير مۋمينوۆ, جوبا امباسسادورى, قوعام قايراتكەرى ايتىم جاقىپوۆ قاتىسىپ, قاتىسۋشىلارعا ساتتىلىك پەن جەڭىس تىلەدى.
«شىنىندا دا, بۇل ناعىز بۇقارالىق سپورت ءتۇرى بولىپ ەسەپتەلەتىن وقيعا. مۇندا كىلەڭ مىقتىلار جەڭەدى. بارلىق ۇيىمداستىرۋشىلارعا ۇلكەن العىس. بۇكىل ەل بويىنشا 12 مىڭنان استام قاتىسۋشى قاتىسقانىن بىلەمىن», دەدى مادەنيەت جانە سپورت ءمينيسترى.
ۆەدومستۆو باسشىسىنىڭ ايتۋىنشا, الداعى ۋاقىتتا Tartyl Fest فەستيۆالى ەلىمىزدە جىل سايىن وتكىزىلەتىن ءىس-شاراعا اينالادى دەپ جوسپارلانىپ وتىر.
فەستيۆال 10 شىلدەدەن باستاپ ەلىمىزدىڭ 20 قالاسىندا وتەدى. وعان قاتىسۋعا نيەت بىلدىرگەن ازاماتتار اقشالاي جۇلدەلەر ۇتىپ الا الادى.
ايتا كەتسەك, ءار قالادا 27 جەڭىمپاز تاڭدالادى. ءبىرىنشى ورىن ءۇشىن قاتىسۋشىلار 200 مىڭ تەڭگە, ەكىنشى ورىن ءۇشىن 100 مىڭ تەڭگە, ءۇشىنشى ورىن ءۇشىن 50 مىڭ تەڭگە اقشالاي سىيلىق الادى.
ءار قالانىڭ جەڭىمپازدارى ەلوردادا وتەتىن گراند-فينالعا قاتىسادى.