قوستانايداعى ورتتەن ەلدىمەكەندەرگە قاۋىپ جوق. جالىنداپ جانىپ جاتقان ۋچاسكەلەر جوق, قالدىق وت وشاقتارىن ءسوندىرۋ جۇمىستارى جۇرگىزىلۋدە. ءاربىر ەلدى مەكەندە (امانقاراعاي, لەسنوە, وزەرنوە جانە باعانالى اۋىلدارىنىڭ اۋماعىندا) قاراۋىلداۋ ۇيىمداستىرىلدى, دەپ حابارلايدى Egemen.kz تجم ءباسپاسوز قىزمەتىنىڭ 6 قىركۇيەك ساعات 12.00 ۋاقىتىنداعى جەدەل اقپاراتىنا سىلتەمە جاساپ.
ازداعان جاۋىن جاۋعاندىقتان وڭىردە اۋا ىلعالدىعى كۇشەيگەن.
«ساعات 7:30-دان 8.40-قا دەيىن ءورت اۋماعىنا ۇشۋ جۇمىستارى جۇرگىزىلدى.اۋەدەن بارلاۋ ناتيجەسىندە باعانالى اۋىلىنان قازانباسى اۋىلىنا قاراي اۋداندا ءورت تومەنگى بولىگىندە بايقالادى. وزەرنوە, لەسنوە جانە امانقاراعاي اۋىلدارىندا جاعداي تۇراقتالدى. وزەرنوە, امانقاراعاي اۋىلدارىندا تەك لوكالدى ءورت وشاقتارىنىڭ جانۋى, ءتۇتىن بايقالادى.كۇشتەر مەن قۇرالدار نەگىزگى جۇمىس جۇرگىزەتىن باعانالى اۋداندارىنا قايتا توپتاستىرىلدى. باعانالى, وزەرنوە, لەسنوە اۋىلدارىندا ەلدى مەكەندەرىندە جەردى جىرتۋ جۇمىستارىن جۇرگىزۋ ءۇشىن قورعانىس مينيسترلىگى مەن جەرگىلىكتى اتقارۋشى ورگانداردىڭ ينجەنەرلىك تەحنيكاسى دا جۇمىلدىرىلادى», دەلىنگەن حابارلامادا.
ءورت باستالعاننان بەرى بارلىعى 2091 ادام ەۆاكۋاتسيالاندى (3 قىركۇيەكتە امانقاراعاي, وزەرنوە جانە لەسنوە اۋىلدارىنان - 1841 ادام, 5 قىركۇيەكتە باعانالى اۋىلىنان قازانباسى اۋىلىنا - 250 ادام).
اۋليەكول ورتا مەكتەبى مەن اۋليەكول مەكتەپ-ينتەرناتىنىڭ ەۆاكۋاتسيالاۋ پۋنكتىندە 66 ادام بار. ەۆاكۋاتسيالانعانداردىڭ نەگىزگى بولىگى ءوز ۇيلەرىنە ورالدى, قالعاندارى تۋىستارىنىڭ ۇيىندە.
تجم مالىمەتىنشە, بارلىعى 91 تۇرعىن ءۇي زارداپ شەككەن. امانقاراعاي اۋىلىندا 85 ءۇي جانە وزەرنىي اۋىلىندا 6 ءۇي. ءورتتى سوندىرۋگە قۇرامىندا 224 بىرلىك تەحنيكا, 7 اۋە كەمەسى, 5 ءورت ءسوندىرۋ پويىزى, جەكە قۇرامنىڭ 2193 ادامى بار تجم, ءىىم, ۇۇ, قورعانىس مينيسترلىگى, جاو جانە وبلىستىڭ كوممۋنالدىق قىزمەتتەرىنىڭ كۇشتەرى مەن قۇرالدارى جۇمىلدىرىلعان.
11 ادام (حالىقتىڭ 6 ادامى, ونىڭ ىشىندە ءبىر كامەلەتكە تولماعان ادام, ورمان شارۋاشىلىعىنىڭ 1 قىزمەتكەرى, اكىمدىكتىڭ 1 قىزمەتكەرى, تجم 3 قىزمەتكەرى) جەڭىل جانە ورتاشا اۋىرلىقتاعى جاراقات, كۇيىك, ۋلانۋ الدى, 1935 جىلى تۋعان ءبىر ادام قازا تاپتى.
سۋاعار قۇرىلعىلارى ءۇشىن تىكۇشاقتارمەن سۋ الۋ تابيعي سۋ قويماسىنان 25 كم قاشىقتىقتا جۇرگىزىلەدى, ءورت ءسوندىرۋ باستالعان ساتتەن باستاپ 137 سۋ اعىزۋ جۇرگىزىلدى.
ايتا كەتەيىك, 4 قىركۇيەكتە ءورت اۋماعى 43 مىڭ گەكتاردان اسقان. ال ورمان شارۋاشىلىعىنىڭ جالپى اۋدانى 107 257 گا.
قازىر تجم جەدەل جەلىسى جۇمىس ىستەپ تۇر. تجم مەن قوستاناي وبلىسىنىڭ تجد پسيحولوگتارىنىڭ جۇمىسى ۇيىمداستىرىلعان. وسى ارالىقتا تجم جەدەل جەلىسىنە اقپاراتتىق سيپاتتاعى 37 قوڭىراۋ كەلىپ ءتۇسىپتى.
سونداي-اق, اۋليەكول اۋدانىنىڭ ەۆاكوپۋنكتىندە جەتى پسيحولوگ شۇعىل پسيحولوگيالىق كومەك كورسەتەدى. كونسۋلتاتيۆتىك كومەك 57 ادامعا كورسەتىلدى جانە توپتىق جۇمىس فورماتىمەن 45 بالا قامتىلدى.
ءورت ءسوندىرۋ جۇمىستارى ءالى دە جالعاسىپ جاتىر.