اقمولا وبلىسىنداعى التىن شىعاراتىن جولىمبەت فابريكاسىندا دورە قۇيمالارى تۇرىندەگى العاشقى ءجۇز كيلوگرامم التىن شىعارىلدى. فابريكا ايتارلىقتاي مودەرنيزاتسيالانىپ, التىنقۇرامدى كەن وڭدەۋ تسەحىنىڭ قۇرىلىسىنان كەيىن ىسكە قوسىلدى. بۇگىندە بۇل كەندى دە, تەحنوگەندى-مينەرالدى تۇزىلىمدەردى دە وڭدەپ, دورە قۇيمالارىن شىعاراتىن ەكى تسەحتىق زاۋىتقا اينالدى.
«قازاقالتىن Technology» جشس فابريكاسى تەحنوگەندى-مينەرالدى تۇزىلىمدەردى قايتا وڭدەۋ ماقساتىندا 2017 جىلى سالىنعان. تەحنوگەندى-مينەرالدى ءتۇزىلىم دەگەنىمىز – جولىمبەت التىن كەن ورنىنداعى بايىتۋ فابريكاسىن پايدالانعان الپىس جىل ىشىندە جيناقتالعان ءوندىرىس قالدىقتارى. بۇل قالدىقتار وڭدەلگەن سوڭ, قازىرگى ەكولوگيالىق زاڭنامانىڭ تالاپتارىنا ساي قايتا ورنالاستىرىلدى.
فابريكا تەحنوگەندى-مينەرالدى تۇزىلىمدەردى وڭدەۋدى 2021 جىلى اياقتادى. قۇرامىنا «قازاقالتىن Technology» جشس كىرەتىن «التىنالماس» كومپانياسى شيكىزات بىتكەندە فابريكانى جابۋدىڭ ورنىنا التىنقۇرامدى كەن وڭدەۋ ماقساتىندا مودەرنيزاتسيالاۋ تۋرالى شەشىم قابىلدادى.
سونداي-اق ءوندىرىس قالدىقتارىندا تەرەڭىرەك ورنالاسقان قىمبات مەتالدى شىعارۋ ءۇشىن تەحنوگەندى-مينەرالدى تۇزىلىمدەردى قايتا وڭدەۋ تۋرالى شەشىم قابىلداندى. ەكىنشى فازانى, ياعني جىلدىق ونىمدىلىگى 4 ملن توننا بولاتىن تسەحتى ىسكە قوسۋ جۇمىستارى 2022 جىلدىڭ ساۋىرىندە باستالىپ, شىلدە ايىندا اياقتالدى. بيىل 450 كيلوگرامم التىن شىعارۋ جوسپارلانعان.
كاسىپورىن ءوندىرىستى كىدىرتپەستەن 18 اي بويى مودەرنيزاتسيالاندى. 2021 جىلدىڭ قاراشاسىندا جىلدىق ونىمدىلىگى 650 مىڭ توننا بولاتىن كەن وڭدەۋ تسەحىن ىسكە قوسۋ جانە جوندەۋ جۇمىستارى باستالدى, ولار وسى جىلدىڭ قاڭتارىندا اياقتالدى. وتكەن جىلدىڭ جەلتوقسانىندا كونۆەيەردەن العاشقى قۇيما شىقتى. ال بيىل كاسىپورىن 710 كيلو التىن شىعارۋدى جوسپارلاپ وتىر.
– تەحنوگەندى-مينەرالدى تۇزىلىمدەردى وڭدەۋ فابريكاسىنىڭ بۇرىنعى وندىرىستىك قۋاتى جىلىنا 2,25 ملن توننانى قۇرايتىن. مودەرنيزاتسيالاۋدان كەيىن فابريكاسىنىڭ جىلدىق قۋاتى 4 ملن توننانى, ال كەن وڭدەۋدە 650 مىڭ توننانى قۇرادى, – دەيدى «قازاقالتىن Technology» جشس جولىمبەت فيليالىنىڭ ديرەكتورى ەدىل وتىنباەۆ.
جۇمىستى باستاماس بۇرىن قورشاعان ورتاعا تيەتىن اسەرگە كەشەندى باعالاۋ جۇرگىزىلگەن. ول جۇمىس ىستەپ تۇرعان «قازاقالتىن Technology» جشس ءوندىرىسىن مودەرنيزاتسيالاۋ سالدارىنان قورشاعان ورتا جاعدايى وزگەرمەيتىنىن كورسەتتى. اتاپ ايتساق, التىن شىعاراتىن فابريكا تەحنولوگيالىق سحەماسىندا سۋ رەسۋرستارىن پايدالانۋدىڭ تۇيىق تسيكلى كوزدەلگەن, ال وندىرىستىك اعىندىلار جەر بەدەرىنە اقپايدى.
جاڭارتىلعان فابريكا قاۋىپسىز ءوندىرىستىڭ بارلىق نورماسى مەن ستاندارتىنا ساي جانە زاماناۋي جابدىقتالعان. كاسىپورىندا تەك وسى جىلدىڭ وزىندە جاڭا 75 جۇمىس ورنى اشىلدى.
– «التىنالماس» – التىن وندىرىسىندە تەحنوگەندى-مينەرالدى ءتۇزىلىمدى قايتا وڭدەۋ تەحنولوگياسىن قولداناتىن قازاقستانداعى جالعىز كومپانيا. فابريكانى مودەرنيزاتسيالاۋداعى باستى ارتىقشىلىق – جاڭادان قۇرىلعان جۇمىس ورىندارى جانە بيۋدجەتكە تۇسەتىن قوسىمشا سالىق. سەنىمدى ينجەنەرلىك جۇيەلەردى پايدالانىپ, تسيفرلىق شەشىمدەردى ەنگىزگەندىكتەن, فابريكا ۇجىمى قاۋىپسىز ءارى جايلى جاعدايدا جۇمىس ىستەيدى, ۇزدىكسىز داميدى جانە جاڭا تەحنولوگيالاردى يگەرەدى, – دەيدى «التىنالماس اك» اق باسقارما توراعاسى ديار قاناشەۆ.
مودەرنيزاتسيالانعان فابريكاعا ارنالعان كەن جاقىن ماڭداعى جولىمبەت كەنىشىندە وندىرىلەدى. وسىلايشا, فابريكانى مودەرنيزاتسيالاۋ ناتيجەسىندە, جولىمبەت كەن ورنىنىڭ كەن وڭدەۋ كولەمى ارتتى. تەحنوگەندى-مينەرالدى ءتۇزىلىمدى قايتا وڭدەۋ تسەحىنداعى سوڭعى ءونىم – التىنقۇرامدى كومىر. ول «التىنالماس اك» اق اقسۋ التىن شىعارۋ فابريكاسىنا جىبەرىلەدى. كەن وڭدەۋ تسەحىندا التىن-كۇمىس قۇيمالار تۇرىندەگى دورە قورىتپاسى وندىرىلەدى.