«سىقيعان سق»... «سوتسياليستىك قازاقستان» كەزىندە ءبىزدىڭ گازەتكە جامىلاتىن اتاۋلاردىڭ ءبىر سيپاتى وسىلاي بولىپ كەلەتىن. مەملەكەتىمىز حالىقتىڭ مەملەكەتىنە اينالا باستاعانىن مويىندامايتىنداردىڭ, باق اتاۋلى بيلىك بىتكەنگە قالايدا وپپوزيتسيادا تۇرۋعا ءتيىس دەپ سانايتىنداردىڭ ساناتىنان قازىر دە ءبىزدىڭ باسىلىمدى «وكىمەتتىڭ گازەتى» دەپ سويلەيتىندەر تابىلىپ قالادى. جۇرتتىڭ ءبارى بىردەي جاپا-تارماعاي وقي بەرمەيتىن بولعاندىقتان باسقا گازەتتەر باسۋدى ويىنا دا المايتىن سالا قۇلاش زاڭداردى بەت-بەت ەتىپ جاريالاپ جاتاتىنىمىز راس, بيلىك تىنىسىن تانىتاتىن رەسمي دۇنيەلەرگە تيىسىنشە ورىن بەرىپ تۇراتىنىمىز دا راس, شەنەۋنىكتەردىڭ از عانا ءبىر بولىگىنەن باسقا جان بالاسىنا قاجەتى جوق «بوس اكىمشىلىك مەملەكەتتىك لاۋازىمدارعا ورنالاسۋعا كونكۋرستار تۋرالى حابارلاندىرۋلارعا» دا ورىن تابۋعا ءتيىستى ەكەنىمىز جانە راس. ونسىز بولمايدى دا. ءبىر جاعىنان, مەملەكەت ساياساتىن ۇعىندىرۋ ءمىندەتىن ەلدىڭ باس باسىلىمى موينىنا الماسا باسقالار مۇنى اتقارمايتىنى ايدان انىق. ەكىنشى جاعىنان, مۇنىڭ ءوزى گازەتتىڭ وقىرمان ءۇشىن تارتىمدىلىعىن تومەندەتۋى مۇمكىن ەكەندىگىن ەسكەرمەي تاعى تۇرا المايمىز».
بۇل جولداردى «ەتجەڭدى» «ەگەمەن قازاقستان» - 2001» جيناعىنا العىسوزىمىزدە جازعان ەكەنبىز. گازەتتى وقىرمانعا جاقىنداتا ءتۇسۋدىڭ جولدارىن قاراستىراتىنىمىزدى ايتا كەلىپ, «وسى ورايدا جاسالىپ جاتقان شارالاردىڭ اراسىنان جۇرتشىلىق اي سايىن سوڭعى اپتانىڭ سارسەنبىسىندە تاعاتسىزدانا توساتىن «ەتجەڭدى» نومىرلەردى الدىمەن ايتۋعا بولار ەدى» دەگەنبىز سوندا. ودان بەرى دە اتتاي زۋلاپ ون ءتورت جىل وتە شىقتى. بۇل كەزەڭدە «ەتجەڭدى» ەلمەن ءابدەن ەتەنە بولىپ, باسىلىمنىڭ وقىلىمدىلىعىن اناعۇرلىم ارتتىرا ءتۇستى. «ەگەمەن قازاقستان» تارالىمىنىڭ بۇگىندە 200 مىڭنان اسىپ كەتۋىندە ايتارى مىنا ومىردە قام-قارەكەتى ءبىر ءبىتپەيتىن دە قويمايتىن قىم-قۋىت تىرشىلىكتىڭ اۋماعىنان اسىپ, كەشەگىمىزدى, بۇگىنىمىزدى, ەرتەڭىمىزدى باعامدايتىن, وي-ءورىسىمىزدى كەڭەيتىپ, بوي-ورەمىزدى بيىكتەتەتىن تۇرلاۋلى تاقىرىپتاردى التىن ارقاۋ ەتۋشى وسىنداي نومىرلەردىڭ ۇلەسى ۇلكەن. ەل وڭىرلەرىندەگى وقىرماندارمەن كەزدەسۋلەر كەزىندە «ەتجەڭدىنى» نەگە ءجيى شىعارمايسىزدار؟ ايدىڭ سوڭعى سارسەنبىسىن كۇتىپ جۇرەمىز» دەگەن سىڭايداعى تىلەكتەردى دە تالاي ەستىگەنبىز. ەندى, مىنە, قالىڭ جۇرتشىلىقتىڭ سول ۇسىنىسىن دا جۇزەگە اسىرۋدىڭ ءساتى ءتۇسىپ وتىر. بۇگىننەن باستاپ ءسىز, قادىرمەندى وقىرمان, گازەتىمىزدىڭ «ەتجەڭدى» نومىرلەرىن ەكى رەت سارسەنبىنىڭ ساتىندە – اي ورتاسىندا جانە ايدىڭ سوڭعى اپتاسىندا قولعا الاتىن بولدىڭىز. بۇل نومىرلەر دە, ارينە, باس گازەت قامتيتىن, قامتۋعا ءتيىستى كۇندەلىكتى كوكەيكەستى ءماسەلەلەردى اتىمەن اينالىپ وتە المايتىنى انىق, وزگە جۇمىسىمىزدى جوندەم جۇرگىزۋگە جاعداي جاسايتىن جارنامانىڭ جاردەمىنەن دە باس تارتاتىن جايىمىز جانە جوق. سونىڭ وزىندە دە «ەتجەڭدى» نومىرلەردىڭ تانىمدىق جۋرناليستيكا قاعيداتتارىنا قۇرىلعان بولمىس-ءبىتىمى, تارتىمدىلىقتى, قىزىقتىلىقتى الدىمەن قامدايتىن قالپى, گازەتتىڭ ءوزىن جاتا-جاستانا وقيتىن قازاقى ولشەمگە ەسەپپەن كەڭدەۋ پىشىلگەن بەتتەلۋ مانەرى ەركىندەۋ تاقىرىپتارعا ەندەپ ەنۋگە مۇمكىندىك بەرەرى كۇمانسىز. ءسوز سوڭىندا بۇدان بىلاي ايىنا ەكى رەت شىعاتىن «ەتجەڭدىگە» يەلىك ەتەتىن «رۋحانيات» شىعارماشىلىق توبىنا تىكەلەي باسشىلىق جاساۋ اكتسيونەرلىك قوعامنىڭ ۆيتسە-پرەزيدەنتى – باس رەداكتور, قازاقتىڭ كورنەكتى قالامگەرى جانبولات اۋپباەۆقا جۇكتەلگەنىن قوسا ايتپاقشىمىز.
ءسويتىپ, ەندى «ەتجەڭدى» ەلمەن ەتەلەنە تۇسپەكشى. ونىڭ قادامى قايىرلى بولارىنا سەنەمىز. ويتكەنى, ءبىز وقىرماندارىمىزدىڭ قازاق تاريحىنداعى تاعىلىمدى جايلارعا قانىققىسى كەلەتىنىنە, الاش ارداقتىلارىنىڭ عيبراتتى عۇمىرىنا پەرزەنتتىك جۇرەكپەن كوڭىل بولەتىنىنە, الەمدەگى, ەلدەگى ەلەۋلى ۇدەرىستەردىڭ مانىنە ازاماتتىق بەلسەندىلىكپەن قىزىعا بەرەتىنىنە سەنەمىز. قىزىقتى ماقالالارىن ءدامدى دۇنيەلەرىنىڭ 200 مىڭنان استام وقىرمانعا جەتۋىنە جاعداي جاسايتىن «ەگەمەن قازاقستانعا» ۇسىناتىن اۆتورلار قاتارىنىڭ قالىڭداي تۇسەتىنىنە دە سەنەمىز. الاشقا ايتارى بار ازاماتتاردىڭ ءبارىن رەداكتسيامەن تىعىز بايلانىسقا شاقىرامىز.
ساۋىتبەك ابدراحمانوۆ.