بۇگىن ۇلت ۇستازى, الاش ارداگەرى, ءتىل ءبىلىمىنىڭ اتاسى احمەت بايتۇرسىن ۇلىنىڭ 150 جىلدىق مەرەيتويى جانە ءتىل مەرەكەسى اياسىندا قر عىلىم جانە جوعارى ءبىلىم مينيسترلىگى ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «احمەت بايتۇرسىن ۇلىنىڭ عىلىمي مۇراسى جانە جاڭا قازاقستاننىڭ زياتكەرلىك ساباقتاستىعى» اتتى حالىقارالىق عىلىمي-پراكتيكالىق كونفەرەنتسيا ءوتتى, دەپ حابارلايدى Egemen.kz.
كونفەرەنتسياعا قر عىلىم جانە جوعارى ءبىلىم ءمينيسترى س.ن. نۇربەك, قر اقپارات جانە قوعامدىق دامۋ ءمينيسترى د.ق. قىدىرالى, قر مادەنيەت جانە سپورت ءمينيسترى د.ءا. اباەۆ, قازاقستان, رەسەي, اقش, تۇركيا, ۆەنگريا, پولشا, تۇرىكمەنستان, وزبەكستان, تاتارستان, قىرعىزستاننىڭ, ت.ب. ەلدەردىڭ عالىمدارى قاتىسىپ, بايانداما جاسادى.
«ۇلت ۇستازى, ۇلتتىق عىلىمنىڭ نەگىزىن سالۋشى احمەت بايتۇرسىن ۇلىنا ارنالعان بۇگىنگى عىلىمي كونفەرەنتسيا ۇلى تۇلعانىڭ سان سالالى شىعارماشىلىق مۇراسىن زەردەلەي كەلە, تاريحي ءداۋىردىڭ دە عىلىمي تانىمىن, قوعامدىق-مادەني سيپاتىن تانىتادى دەپ ويلايمىن. ءبىز احمەت بايتۇرسىن ۇلى سياقتى اسا ءىرى وقىمىستى عالىمنىڭ مۇرالارى جونىندە عىلىمي تۇجىرىمدار جاساۋ ارقىلى ونىڭ ەڭبەكتەرىنىڭ وزەكتىلىگىن, ياعني بۇگىنىمىزبەن ساباقتاستىعىن دا تاني تۇسەمىز», دەپ اتاپ ءوتتى قر عىلىم جانە جوعارى ءبىلىم ءمينيسترى ساياسات نۇربەك.
ءىس-شارا اياسىندا قر عىلىم جانە جوعارى ءبىلىم مينيسترلىگى ءتىل ساياساتى كوميتەتىنىڭ «احمەت بايتۇرسىن ۇلى مەن الاش زيالىلارى تۋرالى جاڭا مۇراعات دەرەكتەرى» اتتى تانىستىرىلىمى جانە ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, اكادەميك ە. سىدىقوۆتىڭ ماسكەۋدىڭ «حۋدوجەستۆەننايا ليتەراتۋرا» باسپاسىنان شىققان «احمەت بايتۋرسىنوۆ – ۋچيتەل ناتسي» اتتى كىتابىنىڭ تۇساۋكەسەرى ءوتتى.
سونىمەن قاتار مەرەيتوي اياسىندا ەلورداداعى قالامگەرلەر اللەياسىندا «الاش قايراتكەرلەرى» ەسكەرتكىشىنە گۇل قويۋ ءراسىمى ءوتتى. وعان قر عىلىم جانە جوعارى ءبىلىم ءمينيسترى س.ن. نۇربەك, قر اقپارات جانە قوعامدىق دامۋ ءمينيسترى د.قىدىرالى, قر مادەنيەت جانە سپورت ءمينيسترى د.ءا. اباەۆ, نۇر-سۇلتان قالاسى ءماسليحاتىنىڭ حاتشىسى ە.ە.كاناليموۆ جانە احمەتتانۋشى, الاشتانۋشى عالىمدار قاتىستى.
ءىس-شارا ا.بايتۇرسىن ۇلى اتىنداعى № 48 مەكتەپ-ليتسەيدەگى ۇلت ۇستازى مۋزەيىنە بارۋ, «مەكتەپ جانە احمەت بايتۇرسىن ۇلى» كورمەسىن تاماشالاۋ, مەكتەپ مۇعالىمدەرى ءىس-تاجىريبەسىمەن تانىسۋمەن جالعاستى.