قۇرلىق اسكەرلەرى اسكەري ينستيتۋتى مەن راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ كۋرسانتتارى ءۇشىن جاڭا وقۋ جىلى وتانعا ادال بولۋعا انت بەرۋدەن باستالدى, دەپ حابارلايدى Egemen.kz.
سالتاناتتى راسىمدەر بارىسىندا اسكەري جوعارى وقۋ ورىندارىنىڭ 360-تان استام ءبىرىنشى كۋرس كۋرسانتى اسكەري انت بەردى.
28 گۆارديالىق-پانفيلوۆشىلار اتىنداعى ساياباقتا 246 كۋرسانت وتانعا ادال بولۋعا انت بەردى. ولاردىڭ 226-سى ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىندا وقۋدان وتەدى, ال 20-سى شەتەلدىك جوعارى وقۋ ورىندارىنا وقۋعا جىبەرىلەدى.
راديوەلەكترونيكا جانە بايلانىس اسكەري-ينجەنەرلىك ينستيتۋتىندا 120-دان استام كۋرسانت اسكەري انت بەردى.
ءبىرىنشى كۋرس كۋرسانتتارىنا ارناعان سوزىندە راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ باستىعى پولكوۆنيك قايرات ءداۋىتوۆ اسكەري انت ءاربىر اسكەري قىزمەتشىنى ەڭ الدىمەن قازاقستان حالقىنا, ونىڭ زاڭدى سايلانعان پرەزيدەنتىنە ادال بولۋعا, ەلدىڭ كونستيتۋتسياسى مەن زاڭدارىن قاستەرلەۋگە مىندەتتەيتىنىن اتاپ ءوتتى.
- ناعىز وتان قورعاۋشىلار قاتارىنا كىرە وتىرىپ, سىزدەر اسكەري ءىستى ادال زەردەلەۋگە مىندەت الاسىزدار. بۇل - قارۋلى كۇشتەردىڭ جاۋىنگەرلىك قابىلەتىن قولداۋدىڭ نەگىزى. اسكەري انت سىزدەردەن قىراعى بولۋدى, اسكەري جانە مەملەكەتتىك قۇپيانى قاتاڭ ساقتاۋدى تالاپ ەتەدى. سىزدەردىڭ ارقايسىلارىڭىز ەلىمىزدى قورعاۋدا اسكەري بورىشىن لايىقتى ءارى باتىل اتقارادى دەپ سەنەمىن, - دەدى اسكەري وقۋ ورنىنىڭ باستىعى.
انت بەرگەنگە دەيىن بارلىق ءبىرىنشى كۋرس كۋرسانتتارى ءبىر اي بويى جاس جاۋىنگەر كۋرسىنان ءساتتى ءوتىپ, اتىس, ساپتىق جانە دەنە شىنىقتىرۋ دايارلىعىنىڭ نەگىزدەرىن مەڭگەرىپ, جالپىاسكەري جارعىلاردىڭ نەگىزگى ەرەجەلەرىن زەردەلەگەنىن اتاپ وتكەن ءجون.