جامبىل وبلىسى ءىىد ەكسترەميزمگە قارسى كۇرەس باسقارماسىنىڭ قىزمەتكەرلەرى تارتىپسىزدىكتەر كەزىندە ۇرلانعان قارۋدى انىقتاۋ بويىنشا جەدەل-ىزدەستىرۋ ءىس-شارالارىن جۇرگىزۋ بارىسىندا قالاداعى كوپىرلەردىڭ ءبىرىنىڭ استىنان قارۋ-جاراق پەن وق-دارىلەردىڭ قويماسىن انىقتادى, دەپ حابارلايدى Egemen.kz.
«پوليەتيلەن پاكەتىنەن مپ-79-9 تراۆماتيكالىق تاپانشاسى, بەلگىسىز ماركالى 2 تاپانشا, 1 گراناتا, 5,45 مم كاليبرلى 22 پاترون, 9 مم كاليبرلى 27 پاترون, 12 كاليبرلى 5 پاترون, ماكاروۆ ماركالى تاپانشا تابىلدى», دەدى وبلىستىق ءىىد.
سوت-بالليستيكالىق ساراپتاما تاعايىندالعانى اتاپ ءوتىلدى.
«جامبىل وبلىسىنىڭ پوليتسيا دەپارتامەنتى قارۋ-جاراقتىڭ, وق-دارىلەردىڭ, ارنايى قۇرالداردىڭ ورنالاسقان جەرىن حابارلاعان نەمەسە پوليتسياعا ءوز ەركىمەن تاپسىرعان ادام قىلمىستىق جانە اكىمشىلىك جاۋاپكەرشىلىككە تارتىلمايتىنىن ەسكە سالادى. انونيمدىلىككە كەپىلدىك بەرىلەدى», دەپ قوستى پوليتسەيلەر.
ەسكە سالايىق, قازاقستاندا تارتىپسىزدىكتەر كەزىندە ۇرلانعان 2 مىڭنان استام قارۋ ىزدەستىرىلۋدە.