ەل پرەزيدەنتى قاسىم-جومارت كەمەل ۇلى توقاەۆ وسى جولعى جولداۋىندا بالالار جىلى اياسىندا «ۇلتتىق قور – بالالارعا» جاڭا باعدارلاماسىن ىسكە قوسۋدى تاپسىردى. ەندى ۇلتتىق قوردىڭ جىلدىق ينۆەستيتسيالىق كىرىسىنىڭ 50 پايىزى بالالار 18 جاسقا تولعانعا دەيىن مەرزىمىنەن بۇرىن الۋ قۇقىعىنسىز ارنايى جيناق شوتتارىنا بولىنەدى. بالالار كامەلەتتىك جاسقا تولعاننان كەيىن جيناقتالعان سوما تۇرعىن ءۇي ساتىپ الۋعا جانە ءبىلىم الۋعا جۇمسالادى. مەملەكەت باسشىسى جوبانى ىسكە اسىرۋدىڭ ناقتى مەرزىمىن دە بەلگىلەپ بەردى, ياعني اتالعان جوبا 2024 جىلدىڭ 1 قاڭتارىنان باستاپ ىسكە قوسىلماق.
مەملەكەت باسشىسىنىڭ وسى ۇسىنىسى وتە ورىندى بولدى. وسىعان وراي وتانداستارىمدى بالالاردىڭ بولاشاعىنا جاسالىپ جاتقان رەفورمالاردى جۇزەگە اسىرۋ ءۇشىن قولدان كەلگەننىڭ ءبارىن جاساۋعا شاقىرعىم كەلەدى. مەن بۇل جەردە ArtSport رەفورماسىن ايتىپ وتىرمىن, سونىڭ ناتيجەسىندە جۇزدەگەن مىڭ بالاعا مەملەكەت ەسەبىنەن تەگىن, سۇيىكتى سپورت تۇرىمەن جانە شىعارماشىلىعىمەن اينالىسۋعا مۇمكىندىك بەرىلدى. ال بۇعان قازىر دالادا دا, ورتالىقتا دا جەكەلەگەن شەنەۋنىكتەر قارسىلىق كورسەتىپ جاتىر. مەن بالالاردى مۇگەدەكتىكتەن, ونىڭ اۋىر تۇرلەرىنەن قۇتقارۋدى كوزدەيتىن بالالىق شاقتاعى مۇگەدەكتىكتى ازايتۋ باعدارلاماسى تۋرالى ايتىپ وتىرمىن. مۇنداي ءىستى جۇزەگە اسىرۋ ءۇشىن قاۋىپ توبىنا جاتاتىن بالالاردى دەر كەزىندە (تۋعاننان كەيىن) انىقتاۋ قاجەت. ءبىز ءاربىر بالانىڭ ءومىرى مەن دەنساۋلىعىن, قۇقىقتارىن ساقتايتىن جۇيە قۇرۋىمىز كەرەك.
مىنە, بۇگىن مەملەكەت باسشىسى بارلىق وقۋشى ءۇشىن مەكتەپ فورماسىنىڭ بارىنشا قولجەتىمدى بولۋىن قامتاماسىز ەتۋ وتە ماڭىزدى ەكەنىن, الەۋمەتتىك وسال ساناتتاعى بالالارعا مەكتەپ فورماسىن بيۋدجەت ەسەبىنەن بەرۋى كەرەگىن ايتتى. وسى رەتتە تاعى دا مەكتەپتەگى تەگىن ىستىق تاماق پەن جەڭىلدەتىلگەن مەكتەپ فورماسى ماسەلەسىن كوتەرەمىن. ىستىق تاماق پەن جەڭىلدەتىلگەن مەكتەپ فورماسىنا قاتىستى وي ىسكە اسسا, بالالاردىڭ يگىلىگىنە, ولاردىڭ دەنساۋلىعىنا, ادامداردىڭ مەملەكەتكە دەگەن كوزقاراسىن جاقسى جاققا وزگەرتۋگە عانا ەمەس, بىرنەشە باعىتتاعى (اۋىل شارۋاشىلىعى ونىمدەرىن وڭدەۋ, قوعامدىق تاماقتاندىرۋ جانە جەڭىل ونەركاسىپ) سالالار دامىپ, جاڭا جۇمىس ورىندارى اشىلادى, سالىق تۇسىمدەرى ارتادى.
جولداۋدا شەشىمىن تاپقان تاعى ءبىر وزەكتى ماسەلە – جاردەماقى. 2023 جىلدىڭ 1 قاڭتارىنان باستاپ اتا-انالار مەن بالالارعا ارنالعان ۇلكەن قولداۋ بالا كۇتىمى بويىنشا تولەم مەرزىمىن ءبىر جارىم جىلعا دەيىن ۇلعايتۋ شاراسى بولماق. مەنىڭشە, بۇل بالالار ءۇيى مەن بالالار ۇيىندەگى بالالاردىڭ سانىن ايتارلىقتاي ازايتادى. ويتكەنى كوپتەگەن اتا-انا مەن انالار قارجىلىق قيىندىقتارعا توزە الماعاندىقتان سابيلەرىن سول جاققا جىبەرەدى. بۇل ماسەلەدە دە بيىل كاسىبي وتباسىلار تۋرالى زاڭ قابىلدانىپ, وعان بارلىق قاجەتتى نورماتيۆتىك-قۇقىقتىق اكت ازىرلەنەدى دەپ سەنەمىن. تەك وسىلاي عانا ءبىز ينتەرناتتىق مەكەمەلەردەن (بالالار ۇيلەرى, مۇمكىندىگى شەكتەۋلى بالالارعا ارنالعان مەديتسينالىق-الەۋمەتتىك مەكەمەلەر) كاسىبي وتباسىلار ينستيتۋتىنىڭ پايداسىنا قۇتىلا الامىز.
مۇنىڭ ءبارى ءبىزدىڭ پرەزيدەنتتىڭ «جاڭا قازاقستانعا» باعىتتالعان باستامالارىن ءسوز جۇزىندە ەمەس, شىنايى قولداۋ بولادى.
ارۋجان ساين,
بالا قۇقىقتارى جونىندەگى ۋاكىل