پرەزيدەنت قاسىم-جومارت توقاەۆ پارلامەنت پالاتالارىنىڭ بىرلەسكەن وتىرىسىندا سۋديالار مەن قازىلار قايتا ىرىكتەلىپ, جاڭاشا جاساقتالاتىنىن ايتتى, دەپ حابارلايدى Egemen.kz.
«قوعامدا زاڭ ۇستەمدىگى بەرىك ورنىعىپ, سوت تورەلىگى ءادىل اتقارىلۋى قاجەت. وسىعان وراي, قازىلار قاۋىمىن شۇعىل تۇردە قايتا ىرىكتەپ, جاڭارتىپ جاساقتاۋ كەرەك. قازىلار جوعارى بىلىكتى, ادال, سونداي-اق, جەمقورلىقتان تازا بولۋى قاجەت. ەڭ الدىمەن, بارلىق سۋديالاردىڭ مارتەبەسىن تەڭەستىرگەن ءجون», دەدى مەملەكەت باسشىسى.
قاسىم-جومارت كەمەل ۇلىنىڭ ايتۋىنشا, قازىلار وزىنەن جوعارى تۇرعان ارىپتەستەرىنە تاۋەلدى بولماۋى كەرەك.
«سوت توراعاسى لاۋازىمى سۋديا لاۋازىمى بولىپ وزگەرەدى. سوت توراعاسى جانە سوت القاسىنىڭ توراعاسى لاۋازىمىنا ۇمىتكەردى سۋديالار وزدەرى سايلايتىن ءتاسىل ەنگىزۋدى ۇسىنامىن. جوعارعى سوت سۋديالارىن دا سايلاۋ ارقىلى تاڭداۋ ءتاسىلىن ەنگىزگەن ءجون. ول ءۇشىن پرەزيدەنت ۇمىتكەرلەردى بالامالى نەگىزدە سەناتقا ۇسىنۋى كەرەك. اتالعان سالاعا مىقتى زاڭگەرلەردى تارتۋ ءۇشىن ماتەريالدىق جاعداي جاساۋ قاجەت», دەپ تولىقتىردى پرەزيدەنت.