پاكىستاننىڭ ميلليونداعان تۇرعىنى قاتتى سۋ تاسقىنىنان زارداپ شەكتى, مىڭنان استام ادام كوز جۇمدى. عيماراتتار, كوپىرلەر مەن جولدار قيرادى, دەپ حابارلايدى Egemen.kz Daily Mail باسىلىمىنا سىلتەمە جاساپ.
بۇۇ پاكىستاندىقتارعا گۋمانيتارلىق كومەك كورسەتۋ جوسپارىن جاريالادى. بۇۇ باس حاتشىسى انتونيۋ گۋتەرريش حالىقارالىق قاۋىمداستىققا ۇندەۋ جاريالاپ, 5,2 ملن ادامعا ازىق-ت ۇلىك, سۋ, سانيتارلىق جانە مەديتسينالىق كومەك كورسەتۋ ءۇشىن 160 ملن دوللار بولۋگە شاقىردى.
«پاكىستان ازاپ شەگۋدە», دەدى بۇۇ باس حاتشىسى انتونيۋ گۋتەرريش بەينەۇندەۋىندە. ول ەل تۇرعىندارى بۇرىن-سوڭدى بولماعان جاڭبىر مەن سۋ تاسقىنىنان زارداپ شەگىپ جاتقانىن اتاپ ءوتتى.
پاكىستان بيلىگىنىڭ ەسەبى بويىنشا, تابيعي اپاتتان 33 ميلليون ادام زارداپ شەككەن. بۇل – ەل تۇرعىندارىنىڭ 15 پايىزى. 50 مىڭنان استام ادام ەلدىڭ سولتۇستىك-باتىسىنا كوشىرىلدى.
تابيعي اپاتتاردى باسقارۋ ۇلتتىق اگەنتتىگىنىڭ باسشىسى احتار ناۆاز پاكىستانداعى 160 اۋداننىڭ 72-ءسى تابيعي اپاتتان زارداپ شەككەنىن ايتتى. 800 مىڭ گەكتاردان استام اۋىل شارۋاشىلىعى القاپتارى سۋ استىندا قالدى.