شىمكەنتتىك پوليتسەيلەر اتىس قارۋلارى مەن وق-دارىلەر جاسىرىلعان ەكى ورىندى انىقتادى, دەپ حابارلايدى Egemen.kz.
قر ءىىم مەن شىمكەنت قالاسى پد جانە ۇقكد-ءنىڭ قىزمەتكەرلەرى «قارۋ» جەدەل-پروفيلاكتيكالىق ءىس-شاراسىن وتكىزۋ بارىسىندا مەگاپوليس ورتالىعىنداعى ۇيلەردىڭ ءبىرىنىڭ قورشاۋى جانىنان جانە ورمان القابىنىڭ جىراسىنان قارۋ-جاراق جاسىرىلعان ورىنداردى انىقتادى.
ناتيجەسىندە پوليتسيا قىزمەتكەرلەرى ەكى شولاق مىلتىق, تت-عا ۇقساس تاپانشا, كارابين, كالاشنيكوۆ اۆتوماتى, «سايگا» تەگىس ۇڭعىلى مىلتىق, «بەنەللي» اڭشىلىق مىلتىعى, «شتۋرم» پوليتسيا قالقانى جانە دەنە بروندى جيلەتى, سونداي-اق 115 پاترون جانە ف-1 وقۋ گراناتاسىن تاركىلەدى.
قر قك 287-بابىنىڭ 1-ءشى جانە 3-بولىكتەرى «قارۋدى, وق-دارىلەردى جانە جارىلعىش زاتتاردى زاڭسىز ساتىپ الۋ, وتكىزۋ, ساقتاۋ جانە الىپ ءجۇرۋ» بويىنشا سوتقا دەيىنگى تەرگەۋ جۇرگىزىلۋدە.