جاس سكريپكاشى ءامينا ارىستانبەك World Championships of Perfoming Arts (WCOPA, لوس-اندجەلەس) اۋقىمدى امەريكالىق جوبادان جۇلدەمەن ورالدى. ون جاستاعى ونەرپاز ۆوكال باعىتى بويىنشا كۇمىس, «اسپاپتىق ونەر» باعىتى بويىنشا قولا مەدالدى يەلەنىپ قايتتى.
اتالعان ونەر دوداسىنا 100 مەملەكەتتەن 6 000-عا جۋىق تالانتتى جاستار قاتىسقان. ال ءامينا ارىستانبەك چەمپيونات تاريحىندا جاسوسپىرىمدەر اراسىندا جوبانىڭ جارتىلاي فينالىنا دەيىن جەتكەن تۇڭعىش قازاقستاندىق ونەرپاز رەتىندە ءوز ونەرىن جوعارى دەڭگەيدە كورسەتە ءبىلدى. ايتا كەتەيىك, ونەرلى جاس بايقاۋدا «كوككە ورلە», «مەن – قازاق قىزى» شىعارمالارىن ورىندادى.
دۇنيەجۇزىلىك امەريكالىق تالانتتار چەمپيوناتى بۇل جولى ءوزىنىڭ 25 جىلدىق مەرەيتويىن اتاپ ءوتتى. سول سەبەپتى دە بايقاۋعا ءداستۇرلى 3 000 ۇمىتكەر ەمەس, 6 000 ونەرپاز قاتىسقان.
«بايقاۋدا باسەكەلەستىك دەڭگەيى وتە جوعارى بولدى. قاتىسۋشىلار شاما-شارقى جەتكەنشە وزدەرىن لايىقتى كورسەتە ءبىلدى. ءامينا دا جاستىعىنا قاراماستان ءوزىن وتە بايسالدى ۇستادى», دەيدى بالدىرعاننىڭ ۆوكال بويىنشا ۇستازى لەيلا بولاتبەك.
جاس تالانت بۇعان دەيىن دە كوپتەگەن بايقاۋدا جەڭىمپاز اتانىپ ءجۇردى. ماسەلەن, 2019 جىلى يسپانيادا وتكەن حالىقارالىق سكريپكاشىلار بايقاۋىندا 1-ورىن, 2021 جىلى يتاليادا وتكەن Sanremo Junior بايقاۋىندا 2-ورىن الدى.
ال وسى امەريكاعا ساپارىندا ونەرپاز ءوز اندەرىنىڭ بىرىنە بەينەبايان ءتۇسىرىپ ۇلگەرگەن. جاڭا تۋىندىعا ۇزاق جىلدار بويى اقش-تا تۇرىپ جاتقان باحودىر يۋلداشەۆ رەجيسسەرلىك ەتتى. كۇزدە قازاقستاندا اتالعان تۋىندىنىڭ تۇساۋكەسەرىن وتكىزۋ جوسپارلانىپ وتىر.