باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ توراعاسى ءسابيت نۇرلىباي قىلمىستىق ىستەردى تەرگەۋ پراكتيكاسىنىڭ جاي-كۇيى ماسەلەلەرى بويىنشا ۆەدومستۆوارالىق كەڭەس وتكىزدى, دەپ حابارلايدى, Egemen.kz.
كەڭەسكە ىشكى ىستەر مينيسترلىگىنىڭ, باس پروكۋراتۋرانىڭ, جوعارعى سوتتىڭ وكىلدەرى مەن جاۋاپتى قىزمەتكەرلەر قاتىستى.
حابارلانعانداي, قازىرگى ۋاقىتتا 134 مىڭنان استام قىلمىستىق ءىس ەلەكتروندىق فورماتتا تەرگەلۋدە, بۇل سوتقا دەيىنگى تەرگەۋ ورگاندارىنىڭ وندىرىسىندەگى ىستەردىڭ جالپى سانىنىڭ 90%-دان استامىن قۇرايدى.
كەڭەس بارىسىندا وڭىرلەر بويىنشا ەلەكتروندىق قىلمىستىق ىستەردى جۇرگىزۋ تاجىريبەسى قارالدى.
جيىن قورىتىندىسى بويىنشا كوميتەت توراعاسى ەلەكتروندىق فورماتتا قىلمىستىق ىستەردى تەرگەۋدىڭ تيىمدىلىگىن ارتتىرۋعا باعىتتالعان ۇيىمداستىرۋشىلىق جانە تەحنيكالىق شارالار كەشەنىن ازىرلەۋ بويىنشا بىرقاتار ۇسىنىستار ايتتى.
اتاپ ايتقاندا, ءىىم-گە پروكۋراتۋرا ورگاندارىنا ەلەكتروندىق قىلمىستىق ىستەردىڭ ماتەريالدارىن قاعاز جەتكىزگىشتە باستاماشىلىق جىبەرۋ جانە ەلەكتروندىق ىستەر بويىنشا قاعاز فورماتتا تەرگەۋ ارەكەتتەرىن جۇرگىزۋ پراكتيكاسىن الىپ تاستاي وتىرىپ, قىلمىستىق ىستەردى ەلەكتروندىق تەرگەپ-تەكسەرۋ بويىنشا جۇمىستىڭ جاي-كۇيىنە ۆەدومستۆولىق باقىلاۋدى ارتتىرۋ ۇسىنىلدى.
«قاداعالاۋشى پروكۋرورلاردىڭ نازارى ەلەكتروندىق ىستەر بويىنشا قاعاز قۇجاتتاردى تالاپ ەتۋدى بولدىرماي, سدتبت-دە پروتسەستىك شەشىمدەردى تەك ەلەكتروندىق فورماتتا بەكىتۋ قاجەتتىگىنە اۋدارىلدى. باس پروكۋراتۋرا جوعارعى سوتپەن بىرلەسىپ ەلەكتروندىق قىلمىستىق ىستەردى ۇزدىكسىز تىركەۋ ماقساتىندا سدتبت جانە «تورەلىك» اقپاراتتىق جۇيەلەرىنىڭ تەحنيكالىق ءوزارا ءىس-قيمىلى بويىنشا جۇمىستى جالعاستىرادى», دەلىنگەن قۇقىقتىق ستاتيستيكا جانە ارنايى ەسەپكە الۋ كوميتەتىنىڭ حابارلاماسىندا.
كەزدەسۋ سوڭىندا قاتىسۋشىلار قىلمىستىق ىستەردى تەرگەۋدىڭ ەلەكتروندىق فورماتىن ودان ءارى جەتىلدىرۋ بويىنشا بىرلەسكەن شەشىمدەر قابىلدادى.