ۇستەل تەننيسىنەن زور ۇمىتىمىزگە بالاعان الان قۇرمانعاليەۆ ءبىزدى تاعى دا تولايىم تابىسىمەن قۋانتتى. جاس سپورتشى شۆەتسيانىڭ حەلسينگبورگ قالاسىندا وتكەن WTT Youth Contender حالىقارالىق تۋرنيرىندە 15 جاسقا دەيىنگى تەننيسشىلەر اراسىندا چەمپيون اتاندى.
الان قۇرمانعاليەۆ وسىنىڭ الدىندا ماجارستان مەن تۋنيستە ەرەسەكتەر اراسىندا وتكەن جارىستاردا ءساتسىز ونەر كورسەتكەن بولاتىن. قازاقستان قۇراما كومانداسىنىڭ باس جاتتىقتىرۋشىسى جانە چەمپيوننىڭ جەكە باپكەرى ەلميرا اليەۆا جاس سپورتشىنىڭ وسى جەڭىلىستەن لايىقتى قورىتىندى شىعارا بىلگەنىن ايتادى.
– الان U-17 ساناتىنداعى سەگىزدىككە كىرۋ جولىندا ءۇندىستاننان كەلگەن مىقتى قارسىلاسىنا ەسە جىبەرىپ الدى. ءبىز وسى ويىنعا مۇقيات تالداۋ جاسادىق تا, قاتەلىكتەرمەن جۇمىس ىستەدىك. سول سەبەپتى, الان كورەي سپورتشىسىمەن بولعان فينالدىق جەكپە-جەككە ساقاداي-ساي دايىندىقپەن شىقتى, – دەدى ە.اليەۆا.
حەلسينگبورگتەگى تۋرنيردە قاراعاندىلىق تەننيسشى اۋەلى دانيالىق يانۋس بەدستەدتى 3:0 ەسەبىمەن تىزە بۇكتىردى. ودان كەيىن ۇندىستاندىق بالامۋرۋگان رادجاسەكاران مەن نەمىس فريدريح كۋن فون بۋرگسدورفتى 3:1 ەسەپتەرىمەن جانە شۆەد پيتەر الەستەدتتى 3:0 ەسەبىمەن جارىس جولىنان شىعاردى. جارتىلاي فينالدا ول كورەيالىق قارسىلاسى لي سىنسۋدى 3:0 ەسەبىمەن بەتقاراتپاي جەڭدى. ال فينالدا بولعان اسا تارتىستى وتكەن ماتچتا وڭتۇستىككورەيالىق تاعى ءبىر تەننيسشى كۆون حەكتەن باسىم ءتۇسىپ, ءتۋرنيردىڭ چەمپيونى اتاندى.
ەسكە سالار بولساق, بۇل – الان قۇرمانعاليەۆ سىندى تالانتتى تەننيسشىنىڭ حالىقارالىق تۋرنيرلەردە جەڭىپ العان 15-ءشى مەدالى.
قاراعاندى وبلىسى