قازاقستان رەسپۋبليكاسى سىرتقى ىستەر مينيسترلىگىنىڭ الماتىداعى وكىلدىگىندە قازاقستاننىڭ ديپلوماتيالىق قىزمەتىنىڭ 30 جىلدىعىنا وراي مەملەكەت قايراتكەرلەرىن ماراپاتتاۋ ءراسىمى ءوتتى.
سالتاناتتى ءىس-شاراعا گرەك-ريم كۇرەسىنەن كسرو-نىڭ ەڭبەك سىڭىرگەن سپورت شەبەرى, ەكى دۇركىن وليمپيادا جۇلدەگەرى, جەتى دۇركىن كسرو چەمپيونى, الەم, ەۋروپا, ازيا جانە ازيا ويىندارىنىڭ جەڭىمپازى, UWW بيۋروسىنىڭ مۇشەسى, ازيا كۇرەس فەدەراتسياسىنىڭ پرەزيدەنتى (ازيا كەڭەسى UWW) جانە قازاقستان رەسپۋبليكاسى كۇرەس فەدەراتسياسىنىڭ باسشىسى داۋلەت تۇرلىحانوۆ قاتىستى.
وكىلدىكتىڭ داۋلەت تۇرلىحانوۆتىڭ اتىنا جازىلعان قۇتتىقتاۋ حاتىندا ونىڭ الەمدىك سپورت ارەناسىندا حالىقارالىق ىنتىماقتاستىق پەن مەملەكەت مۇددەسىن قورعاۋدىڭ باستاۋىندا تۇرعان تاۋەلسىز قازاقستاننىڭ العاشقى سپورت قاھارماندارنىڭ ءبىرى ەكەنى, وتانىمىزدىڭ حالىقارالىق سپورت سالاسىنداعى ەلشىسى ەكەنى اتالىپ وتكەن.
ء«سىزدىڭ جارقىن دا تاماشا جەتىستىكتەرىڭىز جانە 30 جىل بويى ءوزىڭىز باسقارىپ كەلە جاتقان قازاقستان قۇراماسىنىڭ زور تابىستارى – قازاقستان سپورتىنىڭ دامۋىنا قوسىلعان لايىقتى ۇلەس! بەلارۋس رەسپۋبليكاسىنىڭ قۇرمەتتى كونسۋلى رەتىندەگى جوعارى ديپلوماتيالىق سالاداعى قىزمەتىڭىز ءبىزدىڭ حالىقتارىمىز اراسىنداعى دوستىق پەن ىنتىماقتاستىقتىڭ دانەكەرى, ادامگەرشىلىك پەن مەيىرىمدىلىكتىڭ جالپىادامزاتتىق قۇندىلىقتارىن ناسيحاتتاۋدىڭ وزىق ۇلگىسى! ءسىز جانە ءسىزدىڭ وتباسىڭىزعا, سپورت ۇجىمدارىنا جانە قۇرمەتتى كونسۋلدىق ۇجىمىنا جاڭا جەتىستىكتەر, تابىستار مەن جەڭىستەر, ساتتىلىك, ءومىردىڭ بارلىق سالاسىندا بەرەكە, وتباسىلىق اماندىق پەن باقىت تىلەيمىز», دەلىنگەن وكىلدىكتىڭ چەمپيوننىڭ اتىنا جازىلعان قۇتتىقتاۋ حاتىندا.
سونداي-اق اۋستريانىڭ قۇرمەتتى كونسۋلى, قازاقستان رەسپۋبليكاسى دەنساۋلىق ساقتاۋ مينيسترلىگىنىڭ ەڭبەك سىڭىرگەن قىزمەتكەرى يليا زالتسمان مەن قازاقستان رەسپۋبليكاسى ديپلوماتيالىق قىزمەتىنىڭ ارداگەرى لەيلا بايشينا دا مەرەيتويلىق مەدالدارمەن ماراپاتتالدى.
ءوز كەزەگىندە قازاقستان سىرتقى ىستەر مينيسترلىگى الماتى قالاسىنداعى وكىلدىگىنىڭ باسشىسى اسقار شوقىباەۆ ارىپتەستەرىن قۇتتىقتاپ, حالىقارالىق ىنتىماقتاستىقتى نىعايتۋ جانە الەمدىك ارەنادا ەل مۇددەسىن قورعاۋ جولىندا ودان ءارى جەمىستى جۇمىس تىلەدى.
الماتى