ەلوردا تورىندەگى ۇلتتىق اكادەميالىق كىتاپحانادا قازاقستان رەسپۋبليكاسىنىڭ ەڭبەك سىڭىرگەن عىلىم قايراتكەرى, حالىقارالىق جوعارى مەكتەپتەر عىلىم اكادەمياسىنىڭ قۇرمەتتى اكادەميگى, قازاقستان جازۋشىلار وداعىنىڭ ساكەن سەيفۋللين اتىنداعى سىيلىعىنىڭ لاۋرەاتى, «پاراسات» وردەنىنىڭ يەگەرى, فيلولوگيا عىلىمدارىنىڭ دوكتورى, پروفەسسور تۇرسىنبەك كاكىش ۇلىنىڭ تۋعانىنا 95 جىل تولۋىنا وراي دوڭگەلەك ۇستەل ءوتتى, دەپ حابارلايدى Egemen.kz.
كورنەكتى عالىمعا ارنالعان دوڭگەلەك ۇستەلدىڭ مودەراتورى اقىن, قازاقستاننىڭ ەڭبەك سىڭىرگەن قايراتكەرى, حالىقارالىق «الاش» ادەبي سىيلىعىنىڭ يەگەرى, قازاقستان جازۋشىلار وداعىنىڭ حاتشىسى, نۇر-سۇلتان قالاسى فيليالىنىڭ ديرەكتورى داۋلەتكەرەي كاپ ۇلى ۇستازىنىڭ ۇلتقا سىڭىرگەن ەڭبەگىن ەرەكشە اتاپ ءوتىپ, جۇرەكجاردى ەستەلىكتەرىمەن ءبولىستى.
جيىنعا قر ۇعا اكادەميگى, قر پرەزيدەنتىنىڭ كەڭەسشىسى باۋىرجان وماروۆ, عالىم, قازاقستان رەسپۋبليكاسىنىڭ ۇلتتىق عىلىم اكادەمياسىنىڭ اكادەميگى, فيلولوگيا عىلىمدارىنىڭ دوكتورى, پروفەسسور, ديحان قامزابەك ۇلى, اقىن, پروزاشى, پۋبليتسيست, اۋدارماشى قايىربەك سادۋاقاسوۆ, اقىن, قازاقستاننىڭ مادەنيەت قايراتكەرى باقىتجان توباياقوۆ, ادەبيەتتانۋشى, شايسۇلتان شاياحمەتوۆ اتىنداعى ءتىل-قازىنا (Til-Qazyna) عىلىمي-پراكتيكالىق ورتالىعىنىڭ ديرەكتورى ەربول تىلەشەۆ, الاشتانۋشى عالىم, فيلولوگيا عىلىمىنىڭ دوكتورى, پروفەسسور امانتاي ءشارىپ, فيلولوگيا عىلىمدارىنىڭ دوكتورى, پروفەسسور راحىمجان تۇرىسبەك, الاشتانۋشى عالىم, فيلولوگيا عىلىمدارىنىڭ كانديداتى, دوتسەنت قايرات ساق, بەلگىلى جازۋشى, تاريح زەرتتەۋشىسى, قازاقستان جازۋشىلار وداعى مەن ەۋرازيا جازۋشىلار وداعىنىڭ مۇشەسى ءجادي شاكەن ۇلى, جازۋشى, ادەبيەتتانۋشى, «دارىن» مەملەكەتتىك جاستار سىيلىعىنىڭ لاۋرەاتى ايگۇل كەمەلباەۆا, فيلولوگيا عىلىمدارىنىڭ دوكتورى, پروفەسسور ساعىمباي جۇماعۇل, تۇرسىنبەك كاكىش ۇلىنىڭ ءىنىسى جەڭىس, ەۋرازيا ۇلتتىق ۋنيۆەرسيتەتىندە فيلولوگيا عىلىمدارىنىڭ كانديداتى, تۇركىتانۋشى عالىم يمانعازى نۇراحمەت ۇلى جانە تاعى باسقا دا كوپتەگەن زيالى قاۋىم وكىلدەرى قاتىستى.
ءسوز زەرگەرىنىڭ سانالى عۇمىرى قازاق ادەبيەتتانۋ عىلىمىن زەردەلەۋ جولىندا ءوتتى. تاريح ءۇشىن «اقتاڭداقتار اقيقاتىن» اشۋداعى تاباندى كۇرەسكەرلىگى, شىنشىلدىعى ءۇشىن حالقىنىڭ قالاۋلى ازاماتتارىنىڭ بىرىنە اينالدى. وعان دالەل عالىم اعامىزدان قالعان مىنا ءتالسىم.
«شىندىقتىڭ شىرايىن كەلتىرىپ ايتپاساق, حالىقتى تاربيەلەۋ قيىن…», دەگەن.
جيىن بارىسىندا تۇرسىنبەك كاكىش ۇلىنىڭ ادەبي, مادەني مۇراسى سونداي-اق, قازاق ادەبيەتىنىڭ تاريحى مەن ادەبي سىنى تۋراسىنداعى زەرتتەۋلەردى جازۋداعى تاباندىلىعى, اقيقات ءۇشىن الىسىپ, قازاق ادەبيەتتانۋ عىلىمى ءۇشىن سىڭىرگەن ەڭبەكتەرى جايلى تاعىلىمدى ەستەلىكتەر ايتىلدى.
ۇلت رۋحانياتىنا ولشەۋسىز ۇلەس قوسقان قايراتكەردىڭ ەسىمى ەل جادىندا. جازۋشىنىڭ ۇلتشىلدىعى مەن ادەبيەتكە دەگەن ادالدىعى بۇگىنگى جاستارعا ۇلگى. ۇلتتىق كىتاپحانادا قايراتكەردىڭ ەسىمى بەرىلگەن «عالىم زالى» دا اشىلعان. وندا ونىڭ 800-گە جۋىق قولجازباسى مەن شىعارمالارى قويىلعان. جاقىندا جازۋشىنىڭ باعا جەتپەس مول مۇراسىن دارىپتەۋ ماقساتىندا حالىقارالىق عىلىمي كونفەرەنتسيا وتپەك.