ونىنشى قاباتتان قۇلاعان بالانى قاعىپ العان

«وسى جىلدىڭ 31 شىلدەسىندە ساعات 20:50-دە قۇتقارۋ قىزمەتىنە جەدەل جاردەمنەن قوڭىراۋ ءتۇستى. وندا قابانباي باتىر داڭعىلى, 42 مەكەنجايىندا ورنالاسقان ءۇيدىڭ 10-قاباتىنان بالا قۇلاعانى ايتىلعان. بيىكتەن قۇلاعان بالا 2017 جىلى تۋعان. ونى سول ۇيدە تۇراتىن 1988 جىلعى ازامات جولاي ءوتىپ بارا جاتىپ كەزدەيسوق كورىپ, دەرەۋ بالانى قاعىپ الۋعا تىرىسقان. ول وسىلايشا بالانى جەرگە قاتتى سوعىلۋدان ساقتاپ قالدى. دەگەنمەن ءبۇلدىرشىن قازىر №2 اۋرۋحانانىڭ جانساقتاۋ بولىمىندە اۋىر حالدە جاتىر», دەدى تجد ءباسپاسوز قىزمەتى.

دەپارتامەنت وكىلدەرى بالانى قۇتقارىپ قالعان تالعات ءابدىحان ۇلىن ماراپاتتاۋدى ءجون كورىپ, وعان حابارلاسقان. الايدا ول ءبۇلدىرشىننىڭ اۋىر حالدە جاتقانىن العا تارتىپ, ماراپاتتان باس تارتىپتى.

نۇر-سۇلتان قالاسىنىڭ قوعامدىق دەنساۋلىق ساقتاۋ باسقارماسى قۇلاپ كەتكەن بەس جاسار قىزدىڭ جاعدايى تۋرالى ايتتى.

«31 شىلدەدە اۋرۋحاناعا 2017 جىلى تۋعان ناۋقاس جەتكىزىلدى. بالا نەيروحيرۋرگيا بولىمشەسىندە ەمدەلىپ جاتىر. ول ءتۇرلى دەنە جاراقاتىن العان. قازىرگى ۋاقىتتا بالانىڭ جاعدايى اۋىر. ول جانساقتاۋ بولىمىندە ەم قابىلداپ جاتىر. بالا تولىقتاي ەمدەلىپ, تەكسەرىلۋدە», دەدى نۇر-سۇلتان قالالىق قوعامدىق دەنساۋلىق ساقتاۋ باسقارماسىنىڭ وكىلدەرى.

تجد وكىلدەرىنىڭ سوزىنە قاراعاندا, تەرەزەدەن قۇلاۋ – بالالاردىڭ جاراقاتتانۋى مەن ءولىمىنىڭ نەگىزگى سەبەپتەرىنىڭ ءبىرى. نەگىزىنەن, 3 جاستان 7 جاسقا دەيىنگى بالالار تەرەزەدەن قۇلاۋ قاۋپىنە ۇشىرايدى. ەلوردالىق تجد بۇل بالانىڭ ءوزى تەرەزە الدىندا ويناۋدىڭ قاۋىپتىلىگىن ءالى باعالاي المايتىن جاس ەكەنىن اتاپ ءوتتى. قۇلاۋ جاعدايلارىنىڭ كوپشىلىگى اتا-انالار بالالارىن قاراۋسىز قالدىرعان كەزدە ورىن الادى.

قالالىق تجد-دا اتا-انالار بالالارمەن تۇراقتى نەگىزدە اڭگىمە جۇرگىزىپ, ولارعا قاۋىپسىزدىك ەرەجەلەرىن ءتۇسىندىرىپ, كىشكەنتاي بالالاردى تەرەزەلەرى اشىق بولمەدە جالعىز قالدىرماۋ كەرەگىن اتاپ ءوتتى. ونىڭ ىشىندە بالالاردىڭ توسەكتە نەمەسە تەرەزەنىڭ جانىندا ورنالاسقان باسقا جيھازدا ويناۋىنا جول بەرمەۋ كەرەك.

«ەشقاشان موسكيت تورلارىنا سەنبەڭىز. بۇل قۇلاۋدان قورعاۋعا ارنالماعان. كەرىسىنشە, موس­كيت تورى قايعىلى جاعدايعا ىقپال ەتەدى. ويتكەنى بالا ءوزىن قاۋىپسىز سەزىنەدى جانە تەرەزەگە دە, وعان دا سۇيەنەدى. كوبىنەسە بالالار وسى تورلارمەن بىرگە قۇلاپ كەتەدى. مۇمكىندىگىنشە, تەرەزەلەردى (جەلدەتكىشتەردى) تومەننەن ەمەس, جوعارىدان اشىڭىز. ەگەر ۇيدە كىشكەنتاي بالالار بولسا, تەرەزەلەرگە قۇلپى بار ارنايى تۇتقالاردى (توردى) جانە كىشكەنتاي بالالاردىڭ تەرەزەنى اشۋىنا جول بەرمەيتىن باسقا قۇرىلعىلاردى ورناتۋ قاجەت», دەپ اتاپ ءوتتى نۇر-سۇلتان قالالىق تجد وكىلدەرى.

توتەنشە جاعداي تۋىنداعان جاعدايدا دەرەۋ 101, 112 نومىرىنە قوڭىراۋ شالۋ كەرەك.