«سارقىلمايتىن مۇحيتقا» كەش ارنالدى

سول ايتپاقشى سارقىلمايتىن مۇحيت قازاق دالاسىن ءالى دە ارلەندىرىپ, ءالى كوكىرەك كوزىن اشا تۇسۋدە. دانىشپاننىڭ بۇدان 1,5 عاسىر بۇرىن ايتقان سوزدەرى دە پەندەلەردىڭ كوكىرەك كوزدەرىن اشۋدا. ونىڭ تۋعان كۇنىندە ەلىمىزدىڭ سولتۇستىك قاقپاسى – قىزىلجار قالاسى دا ءبىر سىلكىنىپ قالدى.

الدىمەن ابايدىڭ ەسكەرتكىشىنە قالانىڭ زيالى قاۋىم, جەرگىلىكتى بيلىك, بيزنەس جانە باق وكىلدەرى گۇلدەستەسىن قويدى. ودان كەيىن س.مۇقانوۆ اتىنداعى وبلىستىق امبەباپ كىتاپحانادا «كەمەڭگەرلىكتىڭ بيىك شىڭى» اتتى ادەبي-مۋزىكالىق كەش بولدى. وندا م.قوزىباەۆ اتىنداعى «ابايتانۋ» ورتالىعىنىڭ باسشىسى جازيرا كوكباس, نازارباەۆ زياتكەرلىك مەكتەبىنىڭ قازاق ءتىلى مەن ادەبيەتى ءپانىنىڭ مۇعالىمى اينۇر قاليەۆا, جەرگىلىكتى اقىندار كۇلايحان راحمەت, مارال وسپانوۆا, دياس اياعان جانە ت.ب. ولەڭدەرىن وقىدى. كاسىپكەر جومارت وماروۆ اباي ولەڭدەرى وزىنە اقىل بەرىپ قانا قويماي رۋحاني قۋات بەرەتىندىگى جونىندە اعىل-تەگىل ايتىپ بەردى. ال اباي اتىنداعى مامانداندىرىلعان قازاق مەكتەپ-گيمنازياسىنىڭ وقۋشىلارى كارىباي ەرداۋلەت, جانسايا ماڭكوشەۆا, داريعا سەرىك, ادەمى امانگەلدى ۇلى اقىننىڭ ولەڭدەرىن وقىسا انەليا جاقسىلىق «جەلسىز تۇندە جارىق اي» ءانىن تاماشا ورىنداپ بەردى. اقان سەرى اتىنداعى وبلىستىق فيلارمونيانىڭ دومبىراشىسى بايىمبەت قۇبايدوللا ابايدىڭ كوپ ادام بىلە بەرمەيتىن كۇيىن تارتىپ بەردى.

كەشتى كىتاپحانانىڭ قىزمەتكەرلەرى مايرا تۇرعىنقىزى مەن قايىرجان مالىكوۆا ۇيىمداستىردى. ولاردىڭ كىتاپحانا قورىنان جيناعان «اباي مۇراسى – اسىل قۇندىلىق» دەگەن كورمەسى دە كەلگەندەردىڭ كوزايىمىنا اينالدى.

قىزىلجار