بۇگىن ۇكىمەت وتىرىسىندا اقپارات جانە قوعامدىق دامۋ ءمينيسترى اسقار وماروۆ بيىل باسشىلاردىڭ حالىقپەن 227 كەزدەسۋى جوسپارلانعانىن ايتتى, دەپ حابارلايدى Egemen.kz
«بيىل بارلىعى 227 كەزدەسۋ وتكىزۋ جوسپارلانعان, ونىڭ 55-ءى - ءبىرىنشى, 172-ءسى ەكىنشى جارتىجىلدىقتا وتەدى. جىل باسىنان ماۋسىم ايىنا دەيىن 45 كەزدەسۋ ءوتتى. مينيسترلەر نەگىزىنەن اقتوبە, قاراعاندى جانە پاۆلودار وبلىستارىنا بارعان. سونىمەن قاتار الماتى, قوستاناي, ماڭعىستاۋ جانە سولتۇستىك قازاقستان وبلىستارىندا كەزدەسۋلەر از بولعان. كەزدەسۋلەردى وتكىزۋدىڭ مەرزىم ءتارتىبىن ساقتاماۋ فاكتىلەرىنىڭ بولعانىن اتاپ ءوتۋ كەرەك», دەدى اسقار وماروۆ.
ءمينيستردىڭ ايتۋىنشا, تاعى ءبىر ماڭىزدى ماسەلە - كەزدەسۋلەر تۋرالى اقپارات تاراتۋ قارقىنى.
«اقپاراتتىق مونيتورينگ كەزدەسۋلەردىڭ رەسپۋبليكالىق جانە وڭىرلىك تەلەارنالار مەن باسپاسوزدە, الەۋمەتتىك جەلىلەردە كەڭ جاريالانعانىن كورسەتتى. مەملەكەتتىك ورگاندار وتكەلى وتىرعان كەزدەسۋلەر تۋرالى انونستاردى رەسمي ينتەرنەت-رەسۋرستار مەن الەۋمەتتىك جەلىلەردەگى اككاۋنتتاردا جاريالادى. تاعى ءبىر ماڭىزدى ماسەلە – جارلىق تالاپتارىن ساقتاۋ. حالىقتان سۇراقتاردى الدىن الا جيناۋ, ونلاين ترانسلياتسيا, باق-قا ارنالعان بريفينگ وتكىزۋ, ازاماتتاردى جەكە قابىلداۋ, كوممەرتسيالىق ەمەس ۇيىمدارمەن كەزدەسۋ, پروبلەمالىق ماسەلەلەر بويىنشا ءىس-ارەكەت جوسپارىن دايىنداۋ. تالداۋ كورسەتكەندەي, مەملەكەتتىك ورگاندار جالپى جارلىق تالاپتارىن ورىنداعان. الايدا مەملەكەتتىك ورگاندار كەزدەسۋلەردىڭ الەۋمەتتىك جەلىلەردەگى ونلاين-ترانسلياتسيالارىن جانە جۋرناليستەرگە ارنالعان بريفينگىلەردى ءاردايىم وتكىزبەيدى. كەيبىر كەزدەسۋلەردىڭ قورىتىندىلارى بويىنشا پروبلەمالىق ماسەلەلەر تىزبەسى بار ءىس-ارەكەت جوسپارلارى جاسالماعان نەمەسە اشىق تۇردە ورنالاستىرىلماعان», دەدى ۆەدومستۆو باسشىسى.
ايتا كەتسەك, ۇكىمەت باسشىسى كەيبىر وڭىرلەردە باسشىلار حالىقپەن كەزدەسۋدىڭ جاڭا فورماتىنا بەيىمدەلمەگەنىن سىناعان ەدى.