استانادا زياندى گازداردى شامادان تىس بولەتىن 260-تان استام كولىك انىقتالدى, دەپ حابارلايدى Egemen.kz قالا اكىمدىگىنىڭ Facebook-تەگى پاراقشاسىنا سىلتەمە جاساپ.
«نۇر-سۇلتان قالاسىنىڭ اۋماعىندا اۆتوكولىك قۇرالدارىنىڭ ەكولوگيالىق مونيتورينگى» جوباسى اياسىندا 2,7 مىڭنان استام كولىك تەكسەرۋدەن ءوتتى.
شىلدەدەن باستاپ جىلجىمالى تەكسەرۋ توبى كولىك قۇرالدارىنان شىعاتىن گازداردىڭ ۋىتتىلىعىنا ولشەۋ جۇرگىزىپ جاتىر. ناتيجەسىندە ۋلى گازداردى شامادان تىس ءبولىپ شىعاراتىن 260-تان استام كولىك انىقتادى. بۇل – تەكسەرىلگەن اۆتوموبيلدەردىڭ 9,9 پايىزى. ال, جوبا بارىسىندا جالپى 25 مىڭعا جۋىق كولىك تەكسەرۋدەن وتەدى», دەپ حابارلادى نۇر-سۇلتان قالاسى اكىمدىگىنىڭ ءباسپاسوز قىزمەتىنەن.
اكىمدىك دەرەگىنشە, جوبا قورىتىندىسى بويىنشا الىنعان دەرەكتەر ەلوردانىڭ اۋا ساپاسىن جاقساتۋ جۇمىستارىنا ىقپال ەتەدى.