اباي وبلىسىنىڭ اكىمى ەۋروپا قايتا قۇرۋ جانە دامۋ بانكىنىڭ وكىلىمەن كەزدەسىپ, وڭىردەگى بىرلەسكەن جوبالاردىڭ جۇزەگە اسىرۋ بارىسىن تالقىلادى. ماسەلەن, قارجى ينستيتۋتى سەمەيدەگى سۋمەن قامتاماسىز ەتۋ جۇيەلەرى مەن كوشە شامدارىن جاڭارتۋعا, سونداي-اق اياگوزدەگى كارىز-تازارتۋ جۇيەلەرىن جاڭعىرتۋعا سەپتەسىپ كەلەدى.
سونىمەن بىرگە ەۋروپا قايتا قۇرۋ جانە دامۋ بانكى وبلىستىڭ مەديتسيناسى مەن ەكولوگياسى سالاسىندا دا بىرلەسىپ جۇمىس ىستەۋگە نيەتتى. قازىر وبلىس ورتالىعىنداعى سۋمەن جابدىقتاۋ جوباسى اياقتالۋعا جاقىن. ال جارىقتاندىرۋ ماسەلەسىنە كەلسەك, سەمەيدىڭ كوشەلەرىنە ءالى 7 مىڭعا جۋىق جارىق نۇكتەسى جەتىسپەيدى. ەقدب باعالاۋىنا سايكەس بۇل ءۇشىن شامامەن 2,4 ملرد تەڭگە قاجەت. ونىڭ 500 ملن تەڭگەگە جۋىق سوماسىن وبلىس اكىمدىگى بولسە, قالعان بولىگىن ەۋروپالىق بانك نەسيەلەۋگە دايىن. ءوڭىر باسشىسى نۇرلان ۇرانحاەۆ كوشەلەردىڭ جارىقتاندىرىلۋى ورتالىقتا عانا ەمەس, بۇكىل قالا بويىنشا لايىقتى دەڭگەيدە قامتىلىپ, قاراڭعى ۋچاسكەلەردە جارىق بارىنشا جوعارى بولۋعا ءتيىس ەكەنىن ايتتى.
سەمەيدە ەقدب-نىڭ قولداۋىمەن جۇزەگە اسىرىلىپ جاتقان ەكىنشى جوبا – قاتتى تۇرمىستىق قالدىقتار پوليگونىنىڭ قۇرىلىسى. سوعان سايكەس بىلتىر كرەديتتىك كەلىسىمگە قول قويىلعان ەدى.
«پوليگوندى جاڭا جەردە ورنالاستىرۋ كوزدەلىپ وتىر. ويتكەنى ەسكى پوليگون ەكولوگيالىق كودەكس نورمالارىنا ساي كەلمەيدى, سونداي-اق قاتتى-تۇرمىستىق قالدىقتاردىڭ بيولوگيالىق وڭدەۋىن كوزدەيتىن جەلىنى سالۋ قاراستىرىلعان. جالپى العاندا, بۇل كەشەن الداعى 30-40 جىلدا پوليگوندى ودان ءارى كەڭەيتىپ, قتق-نى تەرەڭ وڭدەيتىن تەحنولوگيالار ارقىلى قالانىڭ بارلىق تۇرمىستىق قالدىعىن كادەگە جاراتۋعا مۇمكىندىك بەرەدى», دەدى ەۋروپا قايتا قۇرۋ جانە دامۋ بانكى ديرەكتورىنىڭ قازاقستان بويىنشا ورىنباسارى باقتيار فايزەەۆ.
ايتسە دە وبلىس اكىمدىگى قازىرگى پوليگوننىڭ دا پايداسىز قالماۋىنا مۇددەلى. بۇل ءۇشىن رەكۋلتيۆاتسيانى جۇرگىزۋ قاجەت دەپ سانايدى جاۋاپتى ۆەدومستۆوداعىلار.
ءۇشىنشى باعىت – كارىز-تازارتۋ جۇيەلەرىنىڭ قۇرىلىسىنا بايلانىستى. قازىر قازاقستاندا 27 كارىز-تازارتۋ جۇيەسىن جاڭعىرتۋعا قاتىستى باعدارلاما قابىلدانىپ, اياگوزدەگى قۇنى 6 ملن ەۋرو بولاتىن جوبا ەڭ نەگىزگىلەرىنىڭ ءبىرى سانالادى. ول تاريفتەردى سۋبسيديالاۋ قاعيدالارىنا سايكەس رەسپۋبليكالىق بيۋدجەت قاراجاتى ەسەبىنەن قارجىلاندىرىلادى.
«بىرلەسىپ جۇمىس ىستەۋگە مۇمكىندىك بەرەتىن باسقا دا جوبالاردى قاراستىرۋعا بولادى. مىسالى, ەرتىس پەن الاكولدىڭ جاعالاۋىن نىعايتۋعا, ءشۇلبى گەس-ءتىڭ كونتر-رەتتەۋىشىنىڭ قۇرىلىسىنا جانە سەمەي قالاسىنداعى ەرتىس وزەنىنىڭ سول جاعالاۋىندا جاڭا جەدەل مەديتسينالىق جاردەم ستانساسىن سالۋعا بايلانىستى. ىنتىماقتاستىقتى ناقتى پايدا اكەلەتىن جوبالار بويىنشا تالقىلاۋعا دايىنبىز», دەدى وبلىس اكىمى.
سەمەي ەقدب-نىڭ «جاسىل قالا» باعدارلاماسىنا قاتىسىپ كەلە جاتقان ەلىمىزدەگى ءتورت قالانىڭ ءبىرى سانالادى.
سەمەي