وسى جىلدىڭ بەس ايىندا اۋىل شارۋاشىلىعى مەن وڭدەۋ ونەركاسىبىنە تارتىلعان ينۆەستيتسيا كولەمى ەداۋىر ازايعان, دەپ حابارلايدى Egemen.kz ۇلتتىق ستاتيستيكا بيۋروسىنا سىلتەمە جاساپ.
«2022 جىلدىڭ قاڭتار-ماۋسىم ارالىعىندا اۋىل, ورمان جانە بالىق شارۋاشىلىعىنىڭ نەگىزگى كاپيتالىنا سالىنعان ينۆەستيتسيالاردىڭ كولەمى - 342,9 ملرد تەڭگە. بۇل وتكەن جىلدىڭ سايكەس كەزەڭىمەن سالىستىرعاندا 3,5 پايىزعا از», دەدى بيۋرو ماماندارى.
ينۆەستيتسيانىڭ 155,4 ملرد تەڭگەسى اقمولا, قوستاناي جانە سولتۇستىك قازاقستان سياقتى استىق ەگەتىن وبلىستارعا باعىتتالعان. قارجىنىڭ 63,2 پايىزى ءبىر جانە ەكى جىلدىق داقىلداردى وسىرۋگە, ال 25,9 پايىزى مال شارۋاشىلىعىن دامىتۋ ءۇشىن جۇمسالادى.
«بيىل بەس ايدا وڭدەۋ ونەركاسىبىنە 599,1 ملرد تەڭگە ينۆەستيتسيا تارتىلدى. بۇل وتكەن جىلمەن سالىستىرعاندا 3,2 پايىزعا از. ينۆەستيتسيالاردىڭ 78,8 پايىزى - مەنشىكتى قاراجات. وڭدەۋ ونەركاسىبىنە تارتىلعان ينۆەستيتسيانىڭ 68 پايىزى مەتاللۋرگيا وندىرىسىنە, حيميا ونەركاسىبى مەن تاماق ونىمدەرىن وندىرۋگە باعىتتالدى», دەلىنگەن بيۋرو حابارلاماسىندا.