ءابىلحان قاستەەۆ اتىنداعى ونەر مۋزەيىنە بارىپ, باۋىرلاس قىرعىز ەلىنىڭ شەبەر سۋرەتشىسى سابيدجان بابادجانوۆتىڭ «بۇلتقا اپارار جول» اتتى جەكە كورمەسىن تاماشالاۋدىڭ ءساتى ءتۇستى.
ەكسپوزيتسياعا اۆتوردىڭ 60-تان استام كەسكىندەمە جانە گرافيكالىق مانەردەگى كارتينالارى قويىلعان. قىرعىز دالاسىنىڭ سۇلۋلىعىن پاش ەتكەن پەيزاجدار, سيۋجەتتىك ءھام جانرلىق كومپوزيتسيالار مەن گرافيكالىق نوبايلار كورمە قۇندىلىعىن ارتتىرا تۇسكەن. ونەر جارمەڭكەسىنىڭ تاقىرىبى ءبىزدى تابيعات قۇبىلىسىنا مۇقيات زەر سالۋعا شاقىرادى. كەنەپتەگى جاعىندىلار دۇنيەدەگى ءار مينۋت تاۋ-تاس, وزەن-توعاي, گۇل-وسىمدىك, قۇس-جاندىككە قاراپ ويلانۋعا, سول ارقىلى جاراتقاننىڭ شەبەرلىگىن جان-جۇيەڭمەن تانۋعا جۇمسالۋى ءتيىس دەگەندى مەڭزەيتىندەي. ونەر ادامى كورەرمەنىن اسپاننىڭ اسقاقتىعىنا تامساندىرىپ, جۇرەك كوزىن بيىككە باعىتتايدى.
الەمگە ايگىلى نيكولاس رەريح بۇلتتاردى «اسپان ساۋلەتى» دەپ اتادى. ول: «ادامدار ەكىگە بولىنەدى. كەيبىرەۋلەر اسپان ساۋلەتىمەن قۋانۋدى بىلەدى, ال باسقالارى ءۇشىن بۇل جاي عانا ۇنسىزدىك, دالىرەك ايتقاندا, ولاردىڭ جۇرەكتەرى ءۇنسىز. ءبىر عاجابى, بالالار بۇلتقا قاراپ قۋانىپ, قيالىن قالاي اسقاقتاتۋ كەرەگىن بىلەدى. ءبىزدىڭ قيالىمىز تەك باقىلاۋدىڭ سالدارى. اينالانى تانۋعا ۇمتىلعان العاشقى كۇندەردەن باستاپ ءاربىر ادام سوزبەن جەتكىزە المايتىن كوكتەگى كىتاپتىڭ كىلتىن تابۋعا تالپىنۋى كەرەك», دەپ جازادى. رەريح ءوز ەڭبەكتەرىندە مادەنيەت پەن ونەردىڭ ادامزات بولاشاعى ءۇشىن الاتىن ورنى مەن ماڭىزىن ۇنەمى اتاپ وتكەن. سابيدجان بابادجانوۆ ءۇشىن دە ونەر ءومىردى تانۋدىڭ وزەگى ەكەنىن قولتاڭباسىنا قاراپ اڭعارۋ قيىن ەمەس.
«سۋرەتشى ءارتۇرلى تەحنيكا مەن ءادىستى جەتىك مەڭگەرگەن. بۇل اكۆارەل پاراقتارى, سيا مەن قالاممەن جاسالعان جۇمىستار, كەنەپكە, كارتون مەن قاعازداعى مايلى بوياۋ, ارالاس تەحنيكا. جۇمىستا جارىق, جىلۋ, اۋا كوپ. كەيبىر شىعارمالار اشىق تۇستەرمەن جانە تەمپەرامەنتتىك جازۋىمەن ەرەكشەلەنەدى, وزگەلەر ءۇشىن ۇستامدى جانە مونوحرومدى. بىراق تۇتاستاي العاندا سۋرەتشىنىڭ ومىرلىك ىسىنە, سۇلۋلىعىنا, ونەرىنە دەگەن شىنايىلىعى مەن سۇيىسپەنشىلىگىن سەزىنۋگە بولادى. قازاق كورەرمەنى كەزەكتى رەت تالانتتى ونەر يەسى ءسابيدجان كامال ۇلىنىڭ سان قىرلى شىعارماشىلىعىمەن تانىسۋعا مۇمكىندىك الدى. 2012 جىلى ءا.قاستەەۆ اتىنداعى ونەر مۋزەيى سۋرەتشىنىڭ «كەتىپ بارا جاتقان كەرۋەننىڭ ىزىمەن» اتتى جەكە كورمەسىن, 2014 جىلى شىڭعىس ايتماتوۆتىڭ شىعارماشىلىعىنا ارنالعان «ول اسپان دا, جەر دە, تاۋلار دا ەدى» اتتى بەينەلەر مەن سيمۆوليكاعا تولى كورمەسىن ءساتتى وتكىزگەن بولاتىن», دەيدى كورمە جەتەكشىسى ونەرتانۋشى ناتاليا باجەنوۆا.
ماڭگىلىك تاقىرىبى سۋرەتشىنىڭ بۇكىل جۇمىسىندا قىزىل سىزىق ارقىلى وتەدى. سۋرەتتەر عارىش رۋحىنا تولى. تالعامپاز كورەرمەن اقشاعىل بۇلتتاردان, وزەن بۇرىلىستارىنان, جاقپار تاۋلاردىڭ كەرىم-كەلبەتىنەن ۋاقىت ءۇنىن تىڭدايدى. كەنەپتەگى كەمەڭگەر ۋاقىت ءبىزدى ارمانداردىڭ, اڭىزدار مەن ميفتەردىڭ الەمىنە جەتەلەيدى.
سابيدجان باباجانوۆ قىرعىزستاننىڭ ەڭبەك سىڭىرگەن مادەنيەت قايراتكەرى. گرافيك. ديزاينەر. 1941 جىلى قىتايدىڭ قۇلجا قالاسىندا دۇنيەگە كەلگەن. 1955 جىلى وتباسى قىرعىزستانعا كوشىپ كەلدى. 1963 جىلى فرۋنزە كوركەمسۋرەت ۋچيليششەسىن بىتىرگەن. 1970 جىلدان باستاپ ماسكەۋدە بەس جىل ديزاينەر ماماندىعى بويىنشا وقىدى. ءسابيدجان كامال ۇلى كوپتەگەن رەسپۋبليكالىق, بۇكىلوداقتىق, حالىقارالىق كورمەنىڭ قاتىسۋشىسى. 1986 جىلدان كسرو سۋرەتشىلەر وداعىنىڭ مۇشەسى. 1998 جىلدان بەرى كاليفورنيا عىلىم, ونەركاسىپ, ءبىلىم جانە ونەر حالىقارالىق اكادەمياسىنىڭ قۇرمەتتى مۇشەسى. سۋرەتشىنىڭ تۋىندىلارى قىرعىزستان, قازاقستان, رەسەي, فرانتسيا, يتاليا, گەرمانيا, كانادا, تۇركيا, يران, جاپونيا جانە الەمنىڭ باسقا ەلدەرىنىڭ كوپتەگەن مۇراجايى مەن جەكە كوللەكتسيالارىندا ساقتاۋلى.
الماتى