جاز – دەمالۋ جانە كۇش پەن دەنساۋلىق جيناۋ ۋاقىتى. ارينە, ءبىز دەمالىستىڭ كوپ بولىگىن سۋ جاعاسىندا نەمەسە ارنايى ساناتوريلەردە وتكىزەمىز. تازا اۋا, ىستىق كۇن, شومىلۋ اعزانى قاتايتۋعا جاقسى سەبەپ. بىراق تاڭدالعان جەر جانە شومىلۋعا ارنالعان سۋ ايدىنىنىڭ سۋى ەڭ الدىمەن قاۋىپسىز بولۋى كەرەگىن ءبىلۋ كەرەك.
وكىنىشكە قاراي, كەيبىر دەمالۋشىلاردان كەيىن قالعان قوقىستاردىڭ سالدارىنان سۋ ايدىندارىنىڭ جانە جاعالاۋداعى توپىراقتىڭ لاستانۋ پروبلەماسى بار. دەمالۋشىلاردىڭ مۇنداي نەمقۇرايدىلىعى سۋ ارقىلى تارالاتىن جۇقپالى جانە پارازيتتىك اۋرۋلاردى ادامدارعا جۇقتىرۋ قاۋپىن تۋدىرادى.
بۇگىندە الماتى وبلىسى سانيتارلىق-ەپيدەميولوگيالىق باقىلاۋ دەپارتامەنتىنىڭ اۋماقتىق باسقارمالارىنىڭ باقىلاۋىندا سانيتارلىق-ەپيدەميالىق سالاماتتىلىعى سالاسىندا رۇقسات قۇجاتتارىن العان الاكول كولىنىڭ بويىنداعى 72 دەمالىس ايماعى, بالقاش كولىنىڭ بويىندا – 10, قاپشاعاي سۋ قويماسىنىڭ بويىندا – 58, ەڭبەكشىقازاق اۋدانىندا – 5, تالدىقورعان قالاسى مەن بالقاش اۋدانىندا 1 دەمالىس ورىندارى بار. الايدا بارلىق كاسىپكەرلەر سانيتارلىق زاڭنامانىڭ تالاپتارىنا جانە سانيتارلىق-ەپيدەميالىق قورىتىندىنىڭ بولۋىنا سايكەس قىزمەت كورسەتە بەرمەيدى. وسىعان بايلانىستى, ماماندار كاسىپكەرلەردى وسىنداي بۇزۋشىلىقتار اكىمشىلىك ايىپپۇلدى تولەۋ بويىنشا ۇلكەن قيىندىققا اكەلەتىنىن ەسكەرتەدى.
سۋ ايدىندارىنداعى سۋدىڭ, جاعالاۋداعى توپىراقتىڭ قاۋىپسىزدىگى مەن ساپاسى سانيتارلىق قىزمەتتىڭ تۇراقتى باقىلاۋىندا. اعىمداعى شومىلۋ ماۋسىمىندا زەرتتەلگەن سۋ ۇلگىلەرىنىڭ 2,9 پايىزى (175/5) جانە توپىراقتىڭ 3, پايىزى (85/3) ميكروبيولوگيالىق كورسەتكىشتەر بويىنشا سانيتارلىق قاعيدالاردا بەلگىلەنگەن كورسەتكىشتەرىنە سايكەس كەلمەدى. باكتەريالىق لاستانۋدىڭ سەبەپتەرى جاعالاۋ ايماقتارىن قوقىسپەن تولتىرۋ جانە ولاردى ۋاقتىلى جيناماۋ بولىپ وتىر.
دەپارتامەنت باسشىلىعى «تازالىق تازالاناتىن جەردە ەمەس, قوقىس تاستامايتىن جەردە» ەكەنىن ەسكە سالۋدا. مۇنى ءوزىڭىز قاداعالاۋىڭىز شارت. بالالارىڭىزدى جانە كوشەنىڭ كەز كەلگەن جەرىنە قوقىس تاستاعان تۇرعىندى وسى قاعيدانى ساقتاۋعا شاقىرىڭىز.
جەتىسۋ وبلىسى