27 شىلدە كۇنى ساعات 15:00-دە تۇران داڭعىلى مەن قابانباي باتىر كوشەسى بويىنداعى اۆتوبۋس جولاعىنىڭ قوزعالىسى قايتا ىسكە قوسىلدى, دەپ حابارلايدى Egemen.kz نۇر-سۇلتان اكىمدىگىنىڭ رەسمي سايتىنا سىلتەمە جاساپ.
«ەلوردالىق تسيفرلاندىرۋ جانە مەملەكەتتىك قىزمەتتەر باسقارماسى ءمالىم ەتكەندەي, بۇگىن, 27 شىلدە كۇنى ساعات 15.00-دە م-1 كوپىرىندەگى جول توسەمىنىڭ جوندەۋ جۇمىستارىنىڭ اياقتالۋىنا بايلانىستى تۇران داڭعىلى مەن قابانباي باتىر كوشەسى بويىنداعى اۆتوبۋس جولاعىنىڭ قوزعالىسىن تىركەۋ قايتا باستالادى», دەلىنگەن حابارلامادا.
ەسكە سالا كەتەيىك, جوندەۋ جۇمىسىنا بايلانىستى باۋىرجان مومىش ۇلى داڭعىلىنان باستاپ ماڭگىلىك ەل داڭعىلى مەن سارايشىق كوشەسىنىڭ قيىلىسىنداعى كولىك ايىرىمىنا دەيىنگى ارالىقتا كولىك قوزعالىسى ۋاقىتشا جارتىلاي جابىلعان بولاتىن.
قالا تۇرعىندارى مەن قوناقتارىنا ىڭعايلى بولۋ ءۇشىن وسى ارالىقتا تۇران داڭعىلى مەن قابانباي باتىر كوشەسىندە Bus Lane قوزعالىسى الىنعان.