تۇركىستان وبلىسىنىڭ تۇرعىنى اۋلاسىندا سورا وسىرگەن

پوليتسيا ينسپەكتورلارىمەن جۇرگىزىلگەن تەكسەرۋ كەزىندە جەرگىلىكتى تۇرعىننىڭ اۋلاسىندا ءىرى مولشەردە ەسىرتكىگە ۇقساس زات وسىرەتىندىگى انىقتالدى.

«كۇدىكتى تۇرعىننىڭ اۋلاسىنا ءتىنتۋ جۇرگىزگەن پوليتسەيلەر 19 ءتۇپ كۇتىپ-باپتاپ وسىرىلگەن ەسىرتكى زاتىنا ۇقساس وسىمدىك پەن كەپتىرىلگەن ەسىرتكى سەكىلدى ۇنتاق تاپتى. سونداي-اق ەسىرتكى قولدانۋعا ارنالعان ارنايى بوتەلكەدەن قولدان جاسالعان قۇرال تاركىلەنىپ الىندى. الىنعان زاتتارعا ساراپتاما تاعايىندالدى. زەرتتەۋ قورىتىندىسىمەن وسىمدىك تۇپتەرى 3,5 كەلىگە جۋىق سورا, ال كەپتىرىلگەنى ماريحۋانا بولىپ شىقتى. ول ەسىرتكى زاتتارىن ءوزى قولدانۋ ماقساتىندا وسىرگەنىن مويىندادى», دەلىنگەن پوليتسيا حابارلاماسىندا.

قازىرگى تاڭدا قر قك-ءنىڭ 300-بابى (قۇرامىندا ەسiرتكi زاتتار بار, وسiرۋگە تىيىم سالىنعان وسiمدiكتەردi زاڭسىز ەگىپ-ءوسىرۋ) مەن قك-ءنىڭ 296-بابىنا (ەسىرتكى, پسيحوتروپتىق زاتتارمەن, سول تەكتەستەرمەن وتكىزۋ ماقساتىنسىز زاڭسىز جۇمىس ىستەۋ) سايكەس, تەرگەۋ ارەكەتتەرى جۇرگىزىلۋدە.