ءتورت ايدان بەرى ساتىپ الۋشى تابىلماي, يەسىز تۇرعان پەتروپاۆلدىڭ اۋەجايى ايتەۋىر ءتورتىنشى تەندەر وتكىزىلگەندە ساتىلىپ, جاڭا يەسىن تاپتى. تۇپكىلىكتى ساتىپ الۋ قۇقىمەن سەنىمدى باسقارۋعا العان جاڭا يەسى ونى جارتى باعاسىنا عانا الدى. ويتكەنى ناۋرىز ايىنان بەرى وتكىزىلگەن ءۇش كونكۋرستا الۋشى تابىلماعاندىقتان شۋ دەگەندەگى 5,640 ملرد تەڭگە باعاسى مەملەكەتتىك م ۇلىكتى ساتۋدىڭ ەرەجەسى بويىنشا ەكى ەسە ارزانداتىلعان ەدى.
ساتىپ الۋشى – الماتى قالاسىندا تىركەلگەن «ماك» جشس. «ماك»-تى تارقاتاتىن بولساق – «مەجدۋنارودنىي اەروپورت كىزىل-جار» دەگەن ءسوز شىعادى. دەمەك بۇل فيرما وسىعان دەيىن اۋەجايدىڭ جۇمىسىن جۇرگىزىپ كەلگەن ەكەن, ەندى ناقتى يەسى بولادى. بىراق كونكۋرستىڭ شارتى بويىنشا نىسان بەس جىل بويى مەملەكەتتىڭ يەلىگىندە قالا بەرەدى, تەك بەس جىل وتكەن سوڭ كونكۋرستىڭ بارلىق شارتى ورىندالسا عانا اۋەجايدىڭ تولىق بيلىگى يەسىنە تۇپكىلىكتى بەرىلەدى. ال «تۇپكىلىكتى ساتىپ الۋ قۇقى» دەگەن شارتتى ماعىنالى ءسوز وسى ءۇشىن جازىلادى.
كونكۋرستىڭ شارتى بويىنشا جاڭا يەسى اۋەجايدىڭ مۇلكىن ءتيىمدى باسقارا وتىرىپ, اۆياتاسىمالدىڭ قاۋىپسىزدىگىن قامتاماسىز ەتىپ, قارجىلىق ءىس-ارەكەتىن دە تۇراقتاندىرۋى كەرەك. ساتىپ الۋشىعا العاشقى قويىلعان تالاپتار – وسى. قازىر اۋەجاي تۇراقتى رەجىمدە جۇمىس ىستەپ تۇر. «ماك» جشس بىلتىردان بەرى بىرلەسكەن ءىس-ارەكەت جونىندەگى كەلىسىلگەن كەلىسىمشارت بويىنشا جۇمىس ىستەپ, اۋەجايدى قالىپتى جاعدايدا جۇمىس ىستەتىپ كەلگەن. قازىر حالىقارالىق رەيستەردى قابىلداۋ جانە ولاردى اۆياوتىنمەن تولىقتىرۋ جۇمىستارىنا سەرتيفيكات الۋ شارۋالارىمەن اينالىسۋدا.
كونكۋرستارعا قاتىسۋ ءۇشىن «ماك» جشس بيۋدجەتتىڭ كىرىس بولىگىنە 850 ملن تەڭگە جارنا تولەگەن. اۋەجايدىڭ وسى كۇنگە دەيىن باسقارۋشىسى بولىپ كەلگەن سولتۇستىك قازاقستان وبلىستىق جولاۋشىلار تاسىمالداۋ جانە اۆتوموبيل جولدارى باسقارماسىنان ونىڭ مۇلكىن اكتپەن قابىلداپ العان سوڭ «ماك» جشس-ى كاسىپورىننىڭ جۇمىسىن جاقسارتۋ بويىنشا ءوزىنىڭ جوسپارىن جاريالايدى.
وسى كۇنگە دەيىن ەلىمىزدىڭ كوپتەگەن قالاسىنىڭ اۋەجايلارى جەكەمەنشىككە بەرىلگەن. اتاپ ايتقاندا, الماتى, تۇركىستان, اقتاۋ, اتىراۋ جانە ت.ب. قالالاردىڭ اۋەجايلارى جەكەمەنشىكتە. ەندى سولاردىڭ قاتارىنا قىزىلجار اۋەجايى دا قوسىلاتىن بولدى.
پەتروپاۆل