دۇرىس سويلەي ءبىلۋ دە مادەنيەتتىلىك

ادەتتە ءتىلدى اۋىزەكى, جازباشا دەپ بولەتىنىمىز بار. ەكەۋىندە دە ءتىل نورمالارى قاتاڭ ساقتالۋعا ءتيىس.

اقىلىمىز اسىپ-تاسىعاندىقتان ەمەس, كۇندەلىكتى كوزبەن كورىپ, قۇلاقپەن ەستىپ جۇرگەندىكتەن بولار, كەيدە «وسى ءبىز دۇرىس سويلەۋدەن قالىپ بارامىز-اۋ» دەگەن ويعا قالاتىنىمىز راس. جاستارىمىز «براتان», «چتو تام», «كوروچە», «قۋماشى», «سىندىرامىن», ت.ب. وسى سياقتى ء«ساندى» سوزدەردى ءجيى ايتاتىن بولدى. باسقانى قايدام, ءبىز سياق­تى قارت ادامداردىڭ قۇلاعىنا ءبىرتۇرلى ەرسىلەۋ ەستىلەدى. بىرەۋلەر «وندا نە تۇر, اۋىزەكى تىلدە قولدانۋعا بولا بەرەتىن شىعار» دەگەن دە ءۋاج ايتۋى مۇمكىن. قالاي بولعاندا دا, وزىمبىلەمدىككە سالىنىپ, «بوتەن سوزبەن» ءسوز اراسىن «بىلعاۋعا» بولمايدى دەگەن ويدامىز.

تاعى ءبىر ماسەلە – سانداردى دا قاتە ايتاتىن بولدى: ماسەلەن, «بەس تە ەكى», ء«ۇش تە التى». دۇرىسىندا, ايتىلۋى «بەس ءبۇتىن وننان ەكى», ء«ۇش ءبۇتىن وننان التى» ەمەس پە ەدى؟ مەكتەپتە وسىلاي وقىتقان بولاتىن. ارينە, مەنىڭ بۇل ۇستانىمىممەن كەلىسپەيتىندەر دە تابىلار. ويتكەنى سپورت ويىندارىنىڭ ەسەبىن ايتقاندا «ەكى دە ءنول», ء«ۇش تە ءبىر» دەگەن سياقتى ساندار كولدەنەڭ تارتىلىپ جاتادى. ال بىراق كەز كەلگەن ساندى كەز كەلگەن جەردە وسىلايشا ورىنسىز قولدانا بەرۋ, قالاي دەگەندە دە, اقىلعا قونىمسىز بولىپ شىعاتىنى داۋ تۋعىزباسا كەرەك.

قىسقاسى, دۇرىس سويلەي ءبىلۋ دە مادەنيەتتىلىككە جاتادى. بۇل – مەنىڭ جەكە پىكىرىم. ال ونىمەن كەلىسۋ, كەلىسپەۋ – اركىمنىڭ ءوز ەركى.

كارىباي امزە ۇلى,

زەينەتكەر

تۇركىستان وبلىسى