مەتروپوليتەننىڭ جاڭا ستانسالارىنىڭ ىسكە قوسىلعانىنا بايلانىستى قالانىڭ باتىس بولىگىندەگى مارشرۋت جەلىسىن تۇزەتۋ جۇمىستارى اياسىندا ءۇش جاڭا باعىت اشىلادى, دەپ حابارلايدى Egemen.kz.
15 تامىزدان باستاپ اباي شاعىناۋدانىنان كارەرنايا كوشەسى ارقىلى مومىش ۇلى مەترو ستانتسياسىنا دەيىن جۇرەتىن №49 جانە اسىل ارمان ىقشاماۋدانىنان بەساعاش شاعىن اۋدانىنا دەيىن قاتىنايتىن №100 مارشرۋتتاردى اشۋ جوسپارلانعان.
سونداي-اق 30 تامىزدان باستاپ كەمەرتوعان شاعىم اۋدانىنان مومىش ۇلى مەترو ستانتسياسىنا دەيىن قاتىنايتىن №53 مارشرۋتتى ىسكە قوسۋ جوسپاردا بار.
ال قولدانىستاعى №137 مارشرۋت ەكىگە بولىنەدى. وسىلايشا, باتىس بولىكتە ناۋرىزباي اۋدانىنىڭ اكىمشىلىك ورتالىعىنان ادەم سو دەيىن قىسقارتىلعان №137 مارشرۋت قالادى, ال شىعىس بولىكتە ادەم سو مەن قايرات شاعىناۋدانى ارالىعىندا №138 قاتىنايدى.
№55 مارشرۋت مەترو ستانتسيالارىنا دەيىن جەتكىزۋشى رەتىندە اشىلىپ, باستاپقىدا ونى مومىش ۇلى ستانتسياسىنا دەيىن قىسقارتۋ جوسپارلانعان ەدى. الايدا جولاۋشىلاردىڭ سۇرانىسى جوعارى ەكەندىگى ەسكەرىلىپ, باعىتتى التىنسارين داڭعىلىنان كەرى بۇرۋ تۋرالى شەشىم قابىلداندى.
№110 مارشرۋت 10 تامىزدان باستاپ ءبىر ايالداماعا ۇزارتىلىپ, مومىش ۇلى مەترو ستانتسياسىمەن بايلانىساتىن بولادى.
№212 مارشرۋتتى 15 تامىزدان باستاپ قالا ورتالىعىنا دەيىن قىسقارتۋ جوسپارلانعان. ەندى مارشرۋت جاندوسوۆ ەلدى مەكەنىنەن ساين-جاندوسوۆ كوشەلەرى قيىلىسىنا دەيىن جۇرەدى.
قوسا كەتسەك, 15 تامىزدان باستاپ №78 مارشرۋت الماتىعا سولتۇستىك باتىس بولىكتەن كىرەتىن قالا ماڭى تۇرعىندارى ءۇشىن مومىش ۇلى مەترو ستانتسياسىنا جەتكىزەتىن مارشرۋت بولادى. ال №23 مارشرۋت الماتى-2 تەمىر جول ۆوكزالىنا دەيىن قىسقارتىلادى.