جول اپاتى ازايار ەمەس

– وڭىردەگى جول-كولىك اپاتىنىڭ بىر­نەشە سەبەبىن ايتۋعا بولادى. بىرىنشىدەن, قارسى باعىتتاعى جولاققا شىعۋ, ەكىنشىدەن جاياۋ جۇرگىنشىلەردى قاعۋ, ۇشىنشىدەن جول قيىلىستارىنان ءوتۋ ەرەجەسىن بۇزۋ, تورتىنشىدەن جىلدامدىقتى شامادان تىس اسىرۋ, بەسىنشىدەن, ماس كۇيدە رۋلگە وتىرۋ. وبلىس اۋماعىندا جىل باسىنان بەرى جىلدامدىقتى شامادان تىس اسىرعان 153 مىڭنان, قارسى باعىتقا شىققان 130-دان, جاياۋ جۇرگىنشىلەرگە جول بەرمەگەن 800-دەن, جاياۋ جۇرگىنشىلەرگە ارنالعان جولاقتان ءوتۋ كەزىندە 5 مىڭنان استام قۇقىق بۇزۋشىلىق دەرەگى انىقتالىپ وتىر, – دەيدى ە.بيعامباەۆ.

ونىڭ ايتۋىنشا, جول-كولىك وقيعا­لارىنا ارمەنيا مەن گرۋزيا رەسپۋبليكا­سى, رەسەي فەدەراتسياسى سەكىلدى شەتەلدەردە تىركەلگەن كولىك جۇرگىزۋشىلەرىنىڭ دە قاتىسى بار. وسىنداي تەمىر تۇلپاردى تىزگىندەگەن جۇرگىزۋشىلەرگە قاتىستى جول-كولىك وقيعاسىنان 75 ادام ءارتۇرلى دەنە جاراقاتىن العانى تىركەلگەن. قازىر اتىراۋ وبلىسىنىڭ اۋماعىندا شەتەلدە تىركەلگەن 30 مىڭعا جۋىق كولىك بار.

– بيىلعى بەس ايدا كولىك رۋلىنە وتىر­عان ماس جۇرگىزۋشىلەردىڭ كەسىرىنەن 8 جول-كولىك وقيعاسى تىركەلدى. سالدارىنان ەكى ادام قازا تاۋىپ, 8 ادام ءارتۇرلى دەنە جاراقاتىن الدى. پاترۋلدىك پوليتسيا قىزمەتكەرلەرى 300-دەن استام ماس جۇرگىزۋشىنى انىقتاپ, اكىمشىلىك جاۋاپقا تارتتى. ونىڭ 270-گە جۋىعى اتىراۋ قالا­سىندا ۇستالدى. ال جاسوسپىرىمدەر ۇشى­راعان 23 جول-كولىك وقيعاسىنان 2 بالا قازا تاۋىپ, 30 بالا ءارتۇرلى دەنە جاراقاتىن الدى, – دەپ ءمالىم ەتتى ە.بيعامباەۆ.

قازىر وبلىس اۋماعىنان وتەتىن جول­دار­دا كولىك اعىنى كوبەيگەن. بۇل جۇرگىزۋ­شىلەردەن ساقتىقتى قاجەت ەتەدى. ماسە­لەن, رەسپۋبليكالىق ماڭىزى بار اقتوبە – اتىراۋ – رەسەي فەدەراتسياسىنىڭ شەكا­راسى باعىتىنداعى جولمەن 9 مىڭ, اتى­راۋ – ورال جولىمەن 7 مىڭ, «دوسسور – قۇل­سارى – بەينەۋ جولىمەن 9 مىڭ, وبلىس­تىق اتىراۋ – يندەر جولىمەن 5 مىڭ اۆتو­كولىك وتەدى. وڭىردەگى تاسجولداردا تاۋ­لىك­تىك كولىك اعىنى شامامەن 9 مىڭ­دى قۇراپ وتىر. اتالعان جولداردىڭ دەڭ­گەيى 3-ساناتقا جاتقىزىلۋىنا بايلانىس­تى تاۋلىگىنە 3 مىڭ 500 كولىكتى وتكىزۋ كوز­دەل­گەن.

– بىراق بۇل جولدارمەن تاۋلىگىنە شامامەن 5 500 كولىك وتەتىنى تىركەلىپ وتىر. وسىعان بايلانىستى قالا سىرتىنداعى رەس­پۋبليكالىق, وبلىستىق ماڭىزى بار اق­توبە – اتىراۋ – رەسەي فەدەراتسياسىنىڭ شە­ك­اراسى, اتىراۋ – ورال, اتىراۋ – يندەر تاسجو­لىنا جىلدامدىق ولشەۋگە ارنالعان 3 «كاردون» ستاتسيونارلىق قۇرىلعى ورنا­تىل­دى. بۇل جولدارعا تاعى وسىنداي 14 قۇ­رىلعى ورناتۋ جالعاسىپ جاتىر. اتى­راۋ قالاسىنىڭ اۋماعىندا 6 «كار­دون» ستاتسيونارلىق جىلدامدىق ول­شە­گىش قۇرىلعىسى ىسكە قوسىلدى. قالا سىر­تىنداعى جولدارعا اۆتوماتتى باعدار­لامامەن جابدىقتالعان ءۇش اياقتى جىلجى­مالى قۇرىلعىنى پايدالانۋ ءۇشىن مەردى­گەر مەكەمەمەن بىرلەسكەن جۇمىستار قول­عا الىندى, – دەيدى جەرگىلىكتى پوليتسيا قىز­مەتى باسقارماسىنىڭ باستىعى.

مۇنايلى شاھار سىرتىنداعى تاسجول­دارعا «سەرگەك» كامەرالارى ورناتىلادى. مۇنداي قادامعا بارۋعا ادام ولىمىنە سوقتىرعان جول اپاتىنىڭ كوبەيۋى سەبەپ بولىپ وتىر.

– قوعامدىق ءتارتىپتى ساقتاۋ جانە جول قاۋىپسىزدىگىن قامتاماسىز ەتۋ ماقساتىندا «كوركەمتەلەكوم» كومپانياسىنىڭ قىز­مەت­كەرلەرىمەن «سەرگەك» كامەرالارىن ورناتۋ ماسەلەسى تالقىلاندى. ماقسات – اتىراۋ وبلىسى اۋماعىندا قىلمىستار سانىن ازايتۋ, جول-كولىك وقيعالارىن الدىن الۋ. «كوركەم – جايىق» فيليالى­مەن جاسالعان كەلىسىمشارتقا سايكەس اتىراۋ قالاسىنىڭ اۋماعىندا 2020 جى­لى­ «سەرگەك» جۇيەسىنىڭ 2 748 كامەراسى ورناتىلدى. اتالعان قۇرىلعىلار قوعامدىق ءتارتىپتى ساقتاۋ ماقساتىندا ءۇي اۋلالا­رىندا, ادامدار كوپ شوعىرلاناتىن ورىن­دار مەن جول قاۋىپسىزدىگىن قامتاماسىز ەتۋ ءۇشىن اۆتوكولىك جولدارىنىڭ بويىندا, كوشە قيىلىستارىندا جۇمىس ىستەپ تۇر. بۇل كامەرا­لار ءتۇرلى قىلمىستى بولدىرماۋ مەن جول قاۋىپسىزدىگىن ساقتاۋعا سەپ­تىگىن تيگىزدى, – دەيدى وبلىستىق پوليتسيا دەپارتامەنتى باستىعىنىڭ ورىنباسارى رۋسلان ساديروۆ.

ەندى قىسقا مەرزىمدە اتىراۋ قالاسىندا «سەرگەك» قۇرىلعىلارىنىڭ سانىن ارتتىرۋ, سونداي-اق شاھار سىرتىنداعى رەس­پۋب­ليكالىق, وبلىستىق ماڭىزى باسىم جول­دار­عا ورناتۋ كوزدەلگەن. وسىعان باي­لانىس­تى رەسپۋبليكالىق اقتوبە – اتىراۋ – رەسەي فە­دەراتسياسىنىڭ شەكاراسى, اتى­راۋ – ورال, دوسسور – قۇلسارى – بەينەۋ جانە وب­­­لىس­­تىق ماڭىزى بار اتىراۋ – يندەر, ين­دەر – قاراباۋ – ميالى – ساعىز باعى­تىن­داعى تاسجولدارعا كامەرا ورناتۋ ماسە­­لەسى پى­سىقتالدى. جول بويىنداعى كامە­را­­لاردىڭ اراقاشىقتىعىن دا جيىلەتۋ جوسپارلانعان.

اتىراۋ وبلىسى