Amanat پارتياسى «جاستار رۋحى» جاستار قاناتىنىڭ كەزەكتەن تىس VI سەزى اياقتالدى, دەپ حابارلايدى پارتيانىڭ ءباسپاسوز قىزمەتى. جاستار فورۋمىنىڭ سوڭعى كۇنى پارتيانىڭ اتقارۋشى حاتشىسى اسحات ورالوۆ ءتورت كۇن بويى بەلسەندى جۇمىس ىستەگەنى ءۇشىن بارلىق وڭىردەن كەلگەن دەلەگاتتارعا العىس ايتىپ, ەستەلىك سەرتيفيكاتتار تاپسىردى.
ا.ورالوۆ بۇگىندە «جاستار رۋحى» قازاقستان بويىنشا 100 مىڭنان اسا جاس ازاماتتى بىرىكتىرەتىنىن, ولاردىڭ 90 پايىزى وڭىرلەردەگى بەلسەندىلەر ەكەنىن اتاپ ءوتتى.
«مەملەكەت باسشىسى قاسىم-جومارت توقاەۆ سەزد دەلەگاتتارىنا ارناعان ۇندەۋىندە وتانعا قاجەت ءارى پايدالى بولۋعا ۇمتىلۋ – ءاربىر ادامنىڭ ماقساتى بولۋعا ءتيىس ەكەنىن اتاپ ءوتتى. بۇل ءىس-شارا جاستاردىڭ بىرلىگى مەن ىنتىماعىن ايقىندادى. «جاستار رۋحى» جاستار ءۇشىن تولىققاندى الەۋمەتتىك ليفت بولاتىنىنا كامىل سەنەمىن», دەدى Amanat پارتياسىنىڭ اتقارۋشى حاتشىسى.
ا.ورالوۆتىڭ پىكىرىنشە, جاس ازاماتتار قۋات-كۇشىمەن, جاڭا قازاقستاندى قۇرۋعا بەلسەندى قاتىسۋىمەن پرەزيدەنت باستاماسىمەن قولعا الىنىپ جاتقان رەفورمالاردى ءتيىمدى ىسكە اسىرۋعا ءوز ۇلەسىن قوسادى.
ءوز كەزەگىندە قىزىلوردالىق دەلەگات نۇربول سەرىكباي سەزدە پارتيانىڭ جاستار قاناتىن ودان ءارى دامىتۋ ءۇشىن ماڭىزدى شەشىمدەر قابىلدانعانىن اتاپ ءوتتى.
«ۇيىمنىڭ اتاۋى وزگەرگەنى ونىڭ 20 جىلدان استام ۋاقىت تاريحىنداعى جاڭا كەزەڭدى بىلدىرەدى. بۇگىندە ەلىمىزدە تەرەڭ رەفورمالار ءجۇرىپ جاتىر. جاستار وسى وزگەرىستەردىڭ بەل ورتاسىندا بولۋعا ءتيىس», دەدى ول.
اقمولا وبلىسىنان كەلگەن زارينا قايىرجاننىڭ ايتۋىنشا, Jas Talks الاڭىندا قىزىقتى سپيكەرلەر بولدى. «وزگە وڭىرلەردىڭ جاستارىمەن كەزدەستىك. تاجىريبە الماسىپ, ءوز يدەيالارىمىزبەن ءبولىسىپ قانا قويماي, باسقا قالالاردان كەلگەن ارىپتەستەرىمىزدىڭ ۇسىنىستارىن تالقىلادىق. جاستار قاناتىن ترانسفورماتسيالاۋ باعدارلاماسىن ەسكەرە وتىرىپ, العا قويعان مىندەتتەردى ىسكە اسىرۋ ءۇشىن تىڭ كۇش-قۋات پەن ەرەكشە شابىت الدىق», دەپ اتاپ ءوتتى ز.قايىرجان.
نۇر-سۇلتاننان كەلگەن دەلەگات ەرلان مارات سەزد جۇمىسىنىڭ بەيرەسمي بولىگىن جوعارى باعالادى. «پلەنارلىق وتىرىستان بولەك, وتە مازمۇندى باعدارلامالار بولدى. ياعني اقپاراتتىق ترەنينگتەر, سەمينارلار, قىزىقتى مادەني باعدارلامالار ۇيىمداستىرىلدى. الاۋدىڭ اينالاسىندا وتىرىپ, گيتارامەن ءان شىرقادىق», دەدى ە.مارات.
اقمولا وبلىسىنىڭ زەرەندى اۋىلىندا وتكەن سەزد جۇمىسىنا بارلىق وڭىردەن 350-دەن استام دەلەگات كەلدى. قاتىسۋشىلار ءۇشىن ءبىلىم بەرۋ ترەنينگتەرى ۇيىمداستىرىلدى. بەلگىلى مەملەكەت جانە قوعام قايراتكەرلەرى Jas Talks اشىق ديالوگ الاڭىنىڭ قوناعى بولدى.
كەزەكتەن تىس VI سەزدىڭ شەشىمىمەن جاستار قاناتىن ترانسفورماتسيالاۋدىڭ جاڭا باعدارلاماسى قابىلداندى. جاستار ۇيىمىنىڭ اتاۋى مەن ورتالىق كەڭەستىڭ قۇرامى وزگەردى.