بارشاعا بەلگىلى, ەلدىڭ الەۋمەتتىك-ەكونوميكالىق جانە قوعامدىق-ساياسي دامۋىن اقپاراتتىق تۇرعىدان قامتاماسىز ەتۋ ىسىندە بۇقارالىق اقپارات قۇرالدارى ەلەۋلى ءرول اتقارادى. وسى تاياۋدا عانا بۇقارالىق اقپارات قۇرالدارى قىزمەتكەرلەرىنىڭ كۇنى قارساڭىندا «Qazaq radiocy» راديوستانساسى مەن «Qazaqstan» ۇلتتىق تەلەارناسى باسشىلارىنىڭ قازاقستان رەسپۋبليكاسى پرەزيدەنتىنىڭ بۇقارالىق اقپارات قۇرالدارى سالاسىنداعى سىيلىقتارىمەن ماراپاتتالۋى جوعارىداعى سوزىمىزگە دالەل بولا الادى.
بۇقارالىق اقپارات قۇرالدارى, بەينەلەپ ايتساق, ءبىزدىڭ كۇندەلىكتى تىنىس-تىرشىلىگىمىزدىڭ بولىنبەس ءبىر بولشەگى. ونى اسىرەسە ءبىز سەكىلدى جاسى ەگدە تارتقان ادامدار ەرەكشە سەزىنەدى.
كەزىندە «حابار», «Qazaqstan» ۇلتتىق تەلەارنالارىنان «شىننىڭ ءجۇزى», «دارا جول», «نۇر تىلەۋ», «جۇزدەن جۇيرىك», تاعى باسقا دا وسى سەكىلدى مازمۇندى حابارلاردى ءجيى تاماشالاۋشى ەدىك. وكىنىشكە قاراي, كەيىنگى كەزدەرى ونداي حابارلاردان كوز جازىپ قالدىق. تەلەكورسەتىلىمدەردىڭ كوپشىلىگى ءبىر سارىندى, كورەرمەندەردى وزىنە تارتپايدى. كوبىنە-كوپ بۇرىن تۇسىرىلگەن حابارلاردى قايتالاپ بەرىپ جاتادى.
«Qazaq radiocy»-نان گورى, «شالقار» راديوسىنىڭ حابارلارى تارتىمدىراق ءارى ۇلتتىق قالىپقا جاقىنداۋ سەكىلدى اسەر قالدىرادى. راديودان ونەر ادامدارى تۋرالى تانىمدىق حابارلاردىڭ ءجيى بەرىلگەنىن قالار ەدىك.
ادەتتە كۇز ايلارىندا راديو مەن تەلەارنالاردىڭ حابارلاردىڭ جاڭا فورماتىنا كوشىپ جاتاتىنىنان حابارىمىز بار. ولاي بولسا, ءبىز دە تىڭدارمان ءارى كورەرمەن رەتىندە مازمۇندى دا تارتىمدى حابارلاردىڭ كوپ بولعانىن قۇپتايمىز.
كارىباي امزە ۇلى,
ەڭبەك ارداگەرى
تۇركىستان وبلىسى