قازاقستاندا 2030 جىلعا قاراي سۋ رەسۋرستارىنىڭ تاپشىلىعى 23,2 تەكشە كيلومەترگە جەتۋى مۇمكىن, دەپ حابارلايدى Egemen.kz.
بۇل تۋرالى ەكولوگيا, گەولوگيا جانە تابيعي رەسۋرستار مينيسترلىگى سۋ رەسۋرستار كوميتەتىنىڭ توراعا ورىنباسارى دوسبول بەكماعامبەتوۆ ايتتى.
«وزەن اعىسىنىڭ كوپجىلدىق ديناميكاسى جەرگىلىكتى جانە ترانسشەكارالىق اعىنداردىڭ كەمۋىنەن سۋ رەسۋرستارىنىڭ ازايۋىن كورسەتەدى. 2000 جىلدارى ورتاشا كوپجىلدىق وزەن اعىسى 120 تەكشە كيلومەتر بولسا, قازىرگى ۋاقىتتا ول شامامەن 102 تەكشە كيلومەتردى قۇرايدى. بۇل كليماتتىڭ وزگەرۋىنە جانە انتروپوگەندىك فاكتورلارعا بايلانىستى», دەدى د. بەكماعامبەتوۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
ونىڭ ايتۋىنشا, 2030 جىلعا قاراي وزەن اعىنى ودان ءارى 99,4 تەكشە كيلومەترگە دەيىن قىسقارۋى بولجانىپ وتىر.
«قازىرگى كەزەڭدە سۋ رەسۋرستارىنىڭ تاپشىلىعى 17 تەكشە كيلومەتردەن اسادى, ول سۋ ەكوجۇيەلەرىنىڭ قاجەتتىلىكتەرى ەسەبىنەن ءماجبۇرلى تۇردە جابىلادى. سۋ رەسۋرستارىنىڭ ازايۋىنان جانە حالىقتىڭ, ەكونوميكا مەن ەكولوگيانىڭ قاجەتتىلىكتەرىنە سۋدى كوپ پايدالانۋىنان قازاقستاندا 2030 جىلعا قاراي سۋ رەسۋرستارىنىڭ تاپشىلىعى 23,2 تەكشە كيلومەترگە جەتۋى مۇمكىن», دەدى كوميتەت وكىلى.