بۇل تۋرالى وبلىستىق پوليتسيا دەپارتامەنتىنىڭ ءباسپاسوز قىزمەتى مىلىمدەدى, دەپ حابارلايدى Egemen.kz.
«اقتوبەدە 66 جاستاعى زەينەتكەر ءوزىنىڭ جىلجىمايتىن مۇلكى مەن بارلىق قاراجاتىنان ايىرىلدى. ناقتىلاساق, شىلدە ايىندا ءوزىن بانك قىزمەتكەرى دەپ تانىستىرعان بەلگىسىز ەر ادام زەينەتكەرگە قوڭىراۋ شالعان. الاياق بۇل وپەراتسيانى ادەتتەگى جۇمىس دەپ تۇسىندىرەدى. ءتىپتى, جابىرلەنۋشىگە بانك شوتىن قورعاۋ تۋرالى ۇسىنىس ايتادى. ءسويتىپ, كۇدىكتى زەينەتكەردەن بارلىق جيناعىن دەپوزيتتەن «قاۋىپسىز» شوتقا اۋدارۋعا كەڭەس بەرەدى. مۇلكىن ساتۋدى ۇسىنادى. جابىرلەنۋشى سەنىپ, جالپى كولەمى 24 ملن تەڭگە اقشاسىنان ايىرىلدى», دەدى وبلىستىق پد ءباسپاسوز قىزمەتىنىڭ جەتەكشىسى ەربولات سارقۇلوۆ.
قازىر قر قك-ءنىڭ «الاياقتىق» بابى بويىنشا سوتقا دەيىنگى تەرگەۋ جۇرگىزىلىپ, كۇدىكتىلەردى انىقتاۋ مەن ۇستاۋعا باعىتتالعان جەدەل ءىس-شارا جۇرگىزىلىپ جاتىر.
ءتارتىپ ساقشىلارى الاياقتاردان ساقتانۋ قاجەتتىگىن, ءتىپتى بانك قىزمەتكەرىنە دە جەكە شوتتارى مەن كارتالارىنا قاتىستى SMS كود جانە باسقا دا دەربەس اقپاراتتى ايتۋعا بولمايتىنىن ەسكەرتەدى.
«بانكتەر مەن تولەم جۇيەلەرى ەشقاشان حات جىبەرمەيدى نەمەسە كليەنتتەردىڭ تەلەفوندارىنا قوڭىراۋ شالىپ, شوت دەرەكتەرىن بەرۋدى سۇرامايدى. بانك قىزمەتكەرلەرىندە بارلىق قاجەتتى مالىمەت بار», دەيدى ەربولات سارقۇلوۆ.