سەمەي قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ وقۋشىسى شىڭعىس توقانوۆ XXIX حالىقارالىق «تۋيماادا» وقۋشىلار وليمپياداسىندا 1 ورىندى جەڭىپ الدى.
رەسەي فەدەراتسياسىنىڭ ياكۋتسك قالاسىندا ۇيىمداستىرىلعان وليمپيادا ماتەماتيكا, فيزيكا, حيميا جانە ينفورماتيكا پاندەرى بويىنشا ءوتتى. جاس ەرەكشەلىكتەرىنە قاراي كىشى جانە ۇلكەن ليگاعا بولىنگەن وليمپيادادا شىڭعىس حيميا ءپانى بويىنشا باق سىنادى.
«وليمپياداعا شىڭعىس تىڭعىلىقتى دايىندالدى. ءتۇرلى ەسەپتەردى شىعارىپ, تەوريالىق ءبىلىمىن تولىقتىردى. رەسەي, سينگاپۋر, يندونەزيا, رۋمىنيا سىندى كوپتەگەن الپاۋىت ەلدىڭ ورەندەرىمەن ءبىلىم جارىستىرعان شاكىرتىمىز العاشقى كەزەڭدە كۇردەلى تەوريالىق ەسەپتەردى شىعارسا, كەلەسى پراكتيكالىق كەزەڭدە الدىن الا جاسالعان ەكسپەريمەنتتەر بويىنشا قورىتىندى جاسادى. ناتيجەسىندە, وزگەلەردەن وزىپ شىقتى», دەدى جەڭىمپازدىڭ عىلىمي جەتەكشىسى, حيميا ءپانىنىڭ مۇعالىمى اسىلبەك ورازبەكوۆ.
ۇيىمداستىرۋشىلار بيىلعى وليمپيادانى ىشتەي جانە قاشىقتان ارالاس ۇلگىدە وتكىزۋدى ءجون كورگەن. رەسەيلىك جاس دارىنداردان وزگە شەتەلدىك وقۋشىلارعا قاشىقتان قاتىسۋعا مۇمكىندىك بەرىلدى. دەسە دە بۇل وليمپيادا بارىسىن قاداعالاۋدى جەڭىلدەتكەن جوق. ويتكەنى ءار قاتىسۋشى پروكتورينگ جۇيەسى بويىنشا قاتاڭ باقىلاندى.
اباي وبلىسى