11 شىلدە كۇنى ساعات 20: 00-دە «قازفوسفات» مينەرالدى تىڭايتقىشتار جشس جامبىل فيليالى كۇكىرت قىشقىلى تسەحىندا اۆاريالىق جاعداي ورىن الدى, دەپ حابارلايدى Egemen.kz.
زاۋىتتىڭ اقپاراتىنا قاراعاندا, ابسوربەردىڭ مونوگيدراتتى سورعىسى ىستەن شىققان. ناتيجەسىندە گاز (كۇكىرت تريوكسيدى) تاراعان.
«بولعان اپات تۋرالى جەدەل اقپارات العان جامبىل وبلىسى بويىنشا ەكولوگيا دەپارتامەنتىنىڭ باسشىلىعى مەن زەرتحانالىق تالداۋ ءبولىمىنىڭ باسشىسى تاراز قالاسىنىڭ پروكۋراتۋراسىمەن بىرلەسىپ, ساعات 21.20-دا سۇلەيمانوۆ كوشەسىندەگى زاۋىتتىڭ سانيتارلىق-قورعاۋ ايماعىن ولشەدى. ناتيجەسىندە فتورلى سۋتەگىنىڭ ەداۋىر ارتقانى انىقتالدى. اممياك, كۇكىرتسۋتەك جانە كومىرتەگى وكسيدى بويىنشا اسىپ كەتۋ انىقتالعان جوق.
سونداي-اق ساعات 22.05-تە شايقورىق كەنتىنىڭ ماڭىنداعى زاۋىتتىڭ سقا-دا ۇقساس لاستاۋشى زاتتارعا ولشەۋ جۇرگىزىلدى, لاستاۋشى زاتتاردىڭ ارتۋى انىقتالعان جوق», دەپ جازدى كاسىپورىننان.
«قازگيدرومەت» رمك جامبىل فيليالىنىڭ مالىمەتىنشە, قالادا اۋانىڭ لاستانۋى قالقىما بولشەكتەر بويىنشا 1 شجك اسپايتىن دەڭگەيدە بايقالادى.
زەرتحانالىق قۇرالدارمەن قايتا جاراقتانىپ, Polar گاز اناليزاتورىن العان دەپارتامەنت قىزمەتكەرلەرى, سوڭىنان پروكۋراتۋرا ماماندارى كۇكىرت قىشقىلى تسەحىنىڭ لاستاۋشى زاتتار شىعارىندىلارىنىڭ كوزىندە ولشەۋلەر جۇرگىزۋ ءۇشىن, كاسىپكەرلىك كودەكسىنىڭ نەگىزىندە «قازفوسفات» مينەرالدى تىڭايتقىشتار جشس-نا جوسپاردان تىس تەكسەرۋگە باردى. ولشەۋ كەزىندە تسەح جۇمىسىن توقتاتىپ ۇرلەۋ بويىنشا جۇمىستار جۇرگىزىلدى, الايدا مۇندا دا لاستاۋشى زاتتاردىڭ اسىپ كەتۋى انىقتالعان جوق.
«قازىرگى تاڭدا, دەپارتامەنت پەن «قازگيدرومەت» ماماندارى بىرلەسىپ اتموسفەرالىق اۋانىڭ جاي-كۇيىمەن ساپاسىنا مونيتورينگ جۇرگىزۋدە.
وسى وقيعاعا بايلانىستى وبلىس اكىمىنىڭ تاپسىرماسى بويىنشا ەكولوگيا دەپارتامەنتىنىڭ وكىلدەرى قۇرامىنا كىرەتىن جۇمىس توبى قۇرىلعانىن قوسىمشا حابارلايمىز», دەلىنگەن ۆەدومستۆونىڭ حابارلاماسىندا.